Wiese plaas is Lanzerac?
Sedert die bom gebars het, hang vraagtekens oor wie die eintlike eienaars van die Lanzerac-wynlandgoed is.
Nellie Brand-Jonker
'n Eiendom van Markus Jooste, voormalige uitvoerende hoof van Steinhoff, op Hermanus is in die mark. Inwoners van dié dorp het voorheen hewig kapsie gemaak teen 'n gastehuis met die naam Lanzerac Beach Manor House wat hy glo daar wou open.
Stefan Potgieter, Jooste se skoonseun, het die plan vir die hersonering van die erf laat opstel.
Buitelandse beleggers
Hoe Jooste by Lanzerac betrokke is, is 'n raaisel omdat Christo Wiese, 'n groot aandeelhouer in Steinhoff, in 2012 aan Die Burger en Fin24 gesê het hy het die wynlandgoed aan 'n “buitelandse koper vir 'n onbekende bedrag verkoop”.
Wiese het verlede week in die parlement op 'n gesamentlike sitting van drie staande komitees oor die gebeure by Steinhoff, spesifiek na Lanzerac verwys toe hy verduidelik het hoe hy 'n aandeelhouer van Steinhoff geword het.
“In 2011 het ek 'n eiendom in Stellenbosch, Lanzerac, verkoop en 'n aandeleblok wat ek toe in PSG gehou het, aan die Steinhoff-groep verkoop en so 'n aandeelhouer (van Steinhoff) geword . . .” het Wiese gesê.
Hy het by navraag verduidelik dat hy nie bedoel het hy het die plaas aan Steinhoff verkoop nie.
Hy het die plaas en sy PSG-aandele vir Steinhoff-aandele verruil.
Steinhoff-aandele
Volgens hom het hy die landgoed, wat hy twee dekades lank besit het, aan die maatskappy Morpheus verkoop. Morpheus het sy aandele in Steinhoff gebruik om vir die landgoed te betaal.
Steinhoff se aandele was in Maart daardie jaar sowat R27,40 per aandeel werd. Dit het toe die bom oor boekhou-onreëlmatighede in Desember gebars het, met byna 90% getuimel en staan tans op net meer as R6.
“Ek het daardie tyd afgelei dat van die mense wat in die konsortium is, oorsese mense is,” sê Wiese.
Hy weet nie of Jooste 'n belang in Morpheus gehad het nie. Jooste was glo wel deel van die groep wat die onderhandelinge oor die verkoop met Wiese gevoer het.
Lanzerac swyg
Die bekende wynskrywer Neil Pendock het vier jaar gelede in 'n rubriek geskryf Jooste is die eienaar van Lanzerac.
Danie van der Merwe, jarelange direkteur van Steinhoff en tans waarnemende uitvoerende hoof, wou nie 'n vraag oor Lanzerac beantwoord nie.
'n Steinhoff-woordvoerder sê: “Steinhoff besit nie Lanzerac nie en ons het nie insae in die eienaarstruktuur van Lanzerac nie.”
Steinhoff Properties het Lanzerac wel bestuur van Julie 2012 tot Maart 2013.
Lanzerac self het ook geen vrae oor wie hom besit, beantwoord nie.
Jo-Anna Looms, bemarkingbestuurder van Lanzerac, het gesê dit is “vertroulike inligting”.
Koopsom
Die akteskantoor toon die Lanzerac-wynlandgoed is in 2012 vir R131,9 miljoen verkoop en word deur Lanzerac Estate Investments besit. Tot in Julie 2012 was dié maatskappy bekend as Morpheus Property Investments.
Potgieter, Jooste se skoonseun, is sedert Maart 2013 'n direkteur van Lanzerac Estate Investments.
Potgieter is ook 'n direkteur van Mayfair Speculators, 'n beleggingsvoertuig waarin 'n groot deel van Jooste se welvaart gehou is.
Lanzerac Estate Investments het dieselfde adres as Mayfair.
Lanzerac wou Netwerk24 nie met die ander twee gelyste direkteure van Lanzerac Estate Investments in verbinding bring nie, naamlik Malcolm William King (73) en Paula Louise King (46).
King is 'n Britse sakeman. Netwerk24 het onlangs berig King is 'n vriend van Jooste.
Twyfel
Iemand wat Jooste baie goed ken, maar nie aangehaal wou word nie, sê daar is aan hom gesê Malcolm King besit Lanzerac.
“(Maar) ek het altyd daaroor getwyfel. Hulle het al die besluite daar geneem asof hulle dit besit,” sê die bron oor Jooste-hulle.
'n Bron in die wynbedryf sê almal weet dis 'n “Steinhoff-Jooste-affêre”. Van Jooste se familielede was na verneem word by die bestuur betrokke. Jooste kan steeds nie vir kommentaar opgespoor word nie.
Potgieter het nie op vrae gereageer wat per e-pos aan hom gestuur is nie.
Hermanus
Die vraag oor Lanzerac se werklike eienaars het verdiep toe berig is Jooste het 'n eiendom in Voëlklip in Hermanus in die mark vir R22 miljoen.
Drie bronne het bevestig die eiendom behoort aan Jooste.
– Netwerk24
'n Eiendom van Markus Jooste, voormalige uitvoerende hoof van Steinhoff, op Hermanus is in die mark. Inwoners van dié dorp het voorheen hewig kapsie gemaak teen 'n gastehuis met die naam Lanzerac Beach Manor House wat hy glo daar wou open.
Stefan Potgieter, Jooste se skoonseun, het die plan vir die hersonering van die erf laat opstel.
Buitelandse beleggers
Hoe Jooste by Lanzerac betrokke is, is 'n raaisel omdat Christo Wiese, 'n groot aandeelhouer in Steinhoff, in 2012 aan Die Burger en Fin24 gesê het hy het die wynlandgoed aan 'n “buitelandse koper vir 'n onbekende bedrag verkoop”.
Wiese het verlede week in die parlement op 'n gesamentlike sitting van drie staande komitees oor die gebeure by Steinhoff, spesifiek na Lanzerac verwys toe hy verduidelik het hoe hy 'n aandeelhouer van Steinhoff geword het.
“In 2011 het ek 'n eiendom in Stellenbosch, Lanzerac, verkoop en 'n aandeleblok wat ek toe in PSG gehou het, aan die Steinhoff-groep verkoop en so 'n aandeelhouer (van Steinhoff) geword . . .” het Wiese gesê.
Hy het by navraag verduidelik dat hy nie bedoel het hy het die plaas aan Steinhoff verkoop nie.
Hy het die plaas en sy PSG-aandele vir Steinhoff-aandele verruil.
Steinhoff-aandele
Volgens hom het hy die landgoed, wat hy twee dekades lank besit het, aan die maatskappy Morpheus verkoop. Morpheus het sy aandele in Steinhoff gebruik om vir die landgoed te betaal.
Steinhoff se aandele was in Maart daardie jaar sowat R27,40 per aandeel werd. Dit het toe die bom oor boekhou-onreëlmatighede in Desember gebars het, met byna 90% getuimel en staan tans op net meer as R6.
“Ek het daardie tyd afgelei dat van die mense wat in die konsortium is, oorsese mense is,” sê Wiese.
Hy weet nie of Jooste 'n belang in Morpheus gehad het nie. Jooste was glo wel deel van die groep wat die onderhandelinge oor die verkoop met Wiese gevoer het.
Lanzerac swyg
Die bekende wynskrywer Neil Pendock het vier jaar gelede in 'n rubriek geskryf Jooste is die eienaar van Lanzerac.
Danie van der Merwe, jarelange direkteur van Steinhoff en tans waarnemende uitvoerende hoof, wou nie 'n vraag oor Lanzerac beantwoord nie.
'n Steinhoff-woordvoerder sê: “Steinhoff besit nie Lanzerac nie en ons het nie insae in die eienaarstruktuur van Lanzerac nie.”
Steinhoff Properties het Lanzerac wel bestuur van Julie 2012 tot Maart 2013.
Lanzerac self het ook geen vrae oor wie hom besit, beantwoord nie.
Jo-Anna Looms, bemarkingbestuurder van Lanzerac, het gesê dit is “vertroulike inligting”.
Koopsom
Die akteskantoor toon die Lanzerac-wynlandgoed is in 2012 vir R131,9 miljoen verkoop en word deur Lanzerac Estate Investments besit. Tot in Julie 2012 was dié maatskappy bekend as Morpheus Property Investments.
Potgieter, Jooste se skoonseun, is sedert Maart 2013 'n direkteur van Lanzerac Estate Investments.
Potgieter is ook 'n direkteur van Mayfair Speculators, 'n beleggingsvoertuig waarin 'n groot deel van Jooste se welvaart gehou is.
Lanzerac Estate Investments het dieselfde adres as Mayfair.
Lanzerac wou Netwerk24 nie met die ander twee gelyste direkteure van Lanzerac Estate Investments in verbinding bring nie, naamlik Malcolm William King (73) en Paula Louise King (46).
King is 'n Britse sakeman. Netwerk24 het onlangs berig King is 'n vriend van Jooste.
Twyfel
Iemand wat Jooste baie goed ken, maar nie aangehaal wou word nie, sê daar is aan hom gesê Malcolm King besit Lanzerac.
“(Maar) ek het altyd daaroor getwyfel. Hulle het al die besluite daar geneem asof hulle dit besit,” sê die bron oor Jooste-hulle.
'n Bron in die wynbedryf sê almal weet dis 'n “Steinhoff-Jooste-affêre”. Van Jooste se familielede was na verneem word by die bestuur betrokke. Jooste kan steeds nie vir kommentaar opgespoor word nie.
Potgieter het nie op vrae gereageer wat per e-pos aan hom gestuur is nie.
Hermanus
Die vraag oor Lanzerac se werklike eienaars het verdiep toe berig is Jooste het 'n eiendom in Voëlklip in Hermanus in die mark vir R22 miljoen.
Drie bronne het bevestig die eiendom behoort aan Jooste.
– Netwerk24
Kommentaar
Republikein
Geen kommentaar is op hierdie artikel gelaat nie