Wildsmokkelaars vlieg hoog én ver

Francoise Steynberg - Beslaglegging op renosterhorings het in 2017 verdriedubbel, terwyl lughawens in meer as 130 lande voorvalle van wildsmokkelary in die afgelope dekade ervaar het. 'n Nuwe analise van wêreldwye beslagleggings op onwettige wildprodukte in die lugvervoersektor dui aan dat smokkelaars hoogs afhanklik van kommersiële lugvervoerstelsels is om bedreigde wild te smokkel. Volgens 'n verslag, “In Plane Sight: Wildlife Trafficking in the Air Transport Sector”, saamgestel deur C4ADS in samewerking met USAid se “Reducing Opportunities for Unlawful Transport of Endangered Species (ROUTES) Partnership”, is wêreldwye beslagleggings van onwettige wildprodukte tussen 2009 en 2017 geanaliseer. Die verslag het wildsmokkelary in meer as 130 lande gevind. Nuwe data van 2017 dui op 'n massiewe styging in die beslaglegging van renosterhorings wat sedert 2016 byna verdriedubbel het. NAMIBIESE DATANamibië is deel van dié data van 2017. 'n Koerierpakkie met 16 renosterhorings versteek in koffiebone is vanaf Eros-lughawe in Windhoek na Hongkong gevlieg. “Dié beslaglegging weerspieël die modus operandi van 'n beslaglegging van renosterhoring van 6,6 kg in Maart 2017 in Hongkong. In beide gevalle is die pakkies met koffiebone en stukkies renosterhoring uit Namibië na Asië gevlieg,” lui die verslag. “Namibiese owerhede glo beide beslagleggings word met dieselfde Namibies-gebaseerde smokkelsindikaat verbind.” Volgens die woordvoerder van die ministerie van die omgewing en toerisme, mnr. Romeo Muyunda, is 25 renosters vanjaar gestroop teenoor 2017 se 27 renosters.Van die 25 renosters wat vanjaar gestroop is, was 13 in die Etosha Nasionale Park, ses op private plase en ses wat onder bewaringskap was. In Januarie is twee gestroop, ses in Februarie , vyf in Maart en April onderskeidelik, vier in Mei en drie in Junie. Vanjaar is 16 olifante gestroop teenoor verlede jaar se 12 grootvoete. In die Kunenestreek is ses olifante gestroop, terwyl vyf in die Zambezi- en Kavangostreek onderskeidelik gestroop is. In Januarie is drie olifante gestroop, twee in Februarie, vyf in Maart, een in April, drie in Mei en twee in Junie. Die beslagleggingsdata dui aan dat wildsmokkelaars ivoor, renosterhoring, reptiele, voëls, ietermagôs, mariene produkte en soogdiere op vliegtuie vervoer, en afhanklik is van groot lughawens in die wêreld. Saam het hierdie kategorie vir sowat 81% van alle gesmokkelde wildprodukte uitgemaak, volgens die Verenigde Nasies se kantoor vir dwelms en misdaad (UNODC), en dien dit as aanwysers vir breër neigings in wildsmokkelary. Volgens die verslag van “In Plane Sight”, vlieg wildprodukte soos ivoor, renosterhoring en ietermagôs op roetes van Afrika na Asië em dikwels eers via die Midde-Ooste en Europa. Wildsmokkelaars wat lewende diere soos voëls en reptiele vervoer, vlieg oor die algemeen op direkte vlugte wêreldwyd met verskillende gevaarpunte van wildsmokkelary in elke streek. China is by verre die algemeenste bestemming vir alle wildprodukte waarop tussen 2009 en 2017 beslag gelê is. 133 RENOSTERHORINGsVolgens C4ADS is tussen 2009 en 2017 op 133 renosterhorings wat 1 920 kg weeg, beslag gelê. In 2017 is 'n aansienlike styging in die beslaglegging van renosterhoring getoon met 'n totaal van 41 beslagleggings van renosterhoring wat 636,2 kg weeg, in vergelyking met 14 beslagleggings van renosterhorings van 299,7 kg in 2016. Dit is gelyk aan 'n styging van 193% in beslagleggings en 'n styging van 112% in gewig. China bly die grootste sondaar wat betref renosterhoringsmokkelary in die lugvaartbedryf en het in 2017 met 73% gegroei. Suid-Afrika is nie net 'n oorsprongpunt van renosterhoring- asook ivoorsmokkelary nie. Johannesburg se O.R. Tambo Internasionale Lughawe is ook 'n transitopunt vir renosterhoring wat hul oorsprong in Namibië, Mosambiek en Zambië het en vir die Ooste en Suidoos-Asië bestem is. Smokkelmetodes wat in 2017 gebruik is, is renosterhorings wat per koerierlugvrag gestuur word, in tinfoelie en aluminiumhouers weggesteek word, asook in kos. Dit word in stukkies opgesny of verpoeier. Dit word aan passasiers se liggame vasgeplak of horings word in verlate bagasie gevind. Die afgelope jaar is renosterhorings veral saam met ivoor en leeukloue- en tande gesmokkel.

Wildsmokkelaars vlieg hoog én ver

Kommentaar

Republikein 2025-04-07

Meld asseblief aan om kommentaar te lewer

Wildsmokkelaars vlieg hoog én ver

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie