'Wonderwerke verras ons'

Henriette Lamprecht – Die huidige ekonomiese klimaat, saam met die ernstige droogte, plaas geweldige druk op liefdadigheidsorganisasies in Namibië wat hoofsaaklik op die goedheid van die nasie aangewese is. Ten spyte van dié uitdagings kon die Kankervereniging van Namibië (CAN) steeds ‘n verskil in verskeie mense se lewens maak.CAN se uitvoerende hoof, mnr. Rolf Hansen, het van die organisasie se hoogtepunte die afgelope jaar uitgesonder as CAN se 50ste verjaarsdagvieringe verlede jaar, die inwyding van die Kurt Johannesson-vleuel by Huis Acacia en die nasionale uitreikprogram waartydens meer as 30 000 Namibiërs teen 2018 gratis vir kanker getoets is. “Wonderwerke verras ons,” het Hansen gesê met verwysing na verlede jaar se Bank Windhoek-kankerappelprojek waartydens N$3 miljoen vir die stryd teen kanker ingesamel is. Die projek is ook gekies as ‘n suksesverhaal van hoop en is tydens die wêreldkankerkongres in Kuala Lumpur in Maleisië voorgelê.Voorts is CAN as een van 17 wêreldprojekte vir die internasionale toekenning vir innoverende fondsinsamelings benoem.Volgens Hansen het die organisasie 3 778 vroue vir servikale kanker getoets, 1 083 vroue verwys en is 31 bevestigde gevalle van servikale kanker behandel. Meer as 4 500 kliniese borsondersoeke is uitgevoer, terwyl 788 vir prostaatkanker getoets is. Hiervan is 54 verwys en 17 gevalle van prostaatkanker bevestig. Voorts is 91 hospitaalbesoeke gedoen en was CAN die gasheer van 57 dae vir korporatiewe welsyn en bewusmaking.By Huis Acacia is 484 kankerpasiënte oor ‘n tydperk van 3 317 dae gratis gehuisves. Die organisasie het voorts kankerpasiënte deur die finansiële ondersteuningsprogram met N$1,9 miljoen en Chica (Kinders met Kankerfonds) met sowat N$216 000 ondersteun. Die bedrae sluit volgens Hansen die verblyf by Huis Acacia en die Chica Tydelike Tuiste, sowel as die boukoste uit om die nuwe vleuel by Huis Acacia aan te bou.Hy het voorts gesê die totale uitgawe vir gemeenskapsgebaseerde papsmere om servikale kanker in die land te bestry, was sowat N$383 000 terwyl navorsing vir die nasionale kankerregister CAN N$155 000 gekos het. Die koste van mediese klinieke en om pasiënte te toets het die organisasie sowat N$1,4 miljoen gekos. Met die hulp van onder meer fondsinsamelings is ‘n surplus van sowat N$4,8 miljoen vir CAN ingebring. Weens die huidige ekonomiese klimaat was die organisasie volgens Hansen genoodsaak om ‘n nominale skenkingstruktuur vir pasiënte in te stel wat tot dusver gratis verblyf, maaltye en vervoer by Huis Acacia gekry het terwyl hulle behandeling ontvang het. “Pasiënte wat werklik nie die daaglikse skenking van N$150 kan betaal nie, word aangemoedig om aansoek vir hulp te doen. Ons is egter steeds vol vertroue dat ons die tydelike tuistes se deure kan oophou en voortgaan om ons pasiënte in hul kankerreis te kan help,” het Hansen gesê.Hy het ook sy dank uitgespreek teenoor een van CAN se langsdienende direkteure, dr. Thys Greeff, wat 30 jaar op die raad gedien en nou bedank het. ‘n Nuwe uitvoerende komitee vir ‘n termyn van twee jaar is ook in ooreenstemming met CAN se grondwet verkies. Die lede is me. Lynn Swart (voorsitter, president), me. Saima Nambinga (visevoorsitter/visepresident), me. Monique Cloete (tesourier) en me. Harmut Diehl (visetesourier).

'Wonderwerke verras ons'

Kommentaar

Republikein 2025-04-09

Meld asseblief aan om kommentaar te lewer

'Wonderwerke verras ons'

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie