Wêreld se grootste drywende boekwinkel kom Namibië toe

Anneli Erasmus - 'n Boot gelaai met die Blye Boodskap op 'n toep vir kinders en meer as 5 000 boeke teen sakpaspryse is stadig maar seker al langs die Suid-Afrikaanse kus op pad na Walvisbaai waar dit op 15 Julie gaan vasmeer.
Die Logos Hope, 'n skip van Operasie Mobilisasie (OM Ships) met sy bemanning van vierhonderd Christelike vrywilligers uit vyftig lande, lê nou in die hawe van Port Elizabeth voordat dit op 21 Junie na Kaapstad vertrek en daarna na Walvisbaai.
'n Paradys vir boekwurms gaan wees om vir 'n volle twaalf dae op Walvisbaai die geleentheid hê om teen 'n geringe toegangsgeld in die boekwinkel te gaan rondsnuffel tussen duisende boeke van kinder- tot opvoedkundige boeke, fiksie en nie-fiksie en oor alle onderwerpe vir alle ouderdomme. En dit teen 'n fraksie van normale kleinhandelpryse.
Daarby sal kinders wat die boot besoek, die Bible App for Kids wat deur OneHope ontwikkel is, gratis kan aflaai. Hierdie toep word as 'n groot deurbraak beskou om die gospel in die hande van elke kind te plaas. Dit bevat onder meer ook riglyne vir ouers om die Bybel saam met hul kinders te lees. Mnr. Brian Esterhuizen van OneHope sê dié gospelwerktuig is indrukwekkend. “Jy kan dit saam met jou neem waar jy ook al gaan, ook na lande waar jy nie 'n boek mag saambring nie. Meer en meer mense het toegang tot slimfone, selfs in Afrika.”
OneHope het meer as dertig jaar navorsing gedoen oor hoe om vernuwende maniere te vind om die Bybel met die jeug wêreldwyd te deel. OneHope se jeugbediening sal ook aan boord die Logos Hope wees om slypskole aan te bied.
Die doel van Operasie Mobilisaie se uitreik is om wêreldwyd met die hulp van plaaslike kerke en sendingaksies kennis, hulp en hoop aan soveel mense as moontlik te bring. Sedert die ontstaan van OM Ships in 1970 het meer as 44 miljoen mense van 150 verskillende lande hierdie besonderse boekwinkel besoek.
Die Logos Hope is twee keer so groot soos sy voorganger, die Doulos, wat Walvisbaai in 2002 besoek het.
Die loopplank gaan op 16 Julie vir besoekers sak om aan boord die Logos Hope te gaan en sal elke dag oop wees tot op 27 Julie voordat die boot op 28 Julie na Libreville vertrek.


Onderskifte
Die Logos Hope gaan op 15 Julie in die Walvisbaai se hawe vasmeer waar dit tot 28 Julie sal lê.


Die boekwinkel van die Logos Hope wat meer as 5 000 boeke oor 'n wye verskeidenheid onderwerpe bevat.