Zwane su00ea Gupta-myn het geld vir rehabilitasie
Zwane su00ea Gupta-myn het geld vir rehabilitasie

Zwane sê Gupta-myn het geld vir rehabilitasie

Die trustfonds is by die Bank of Baroda in Indië.
Liesl Peyper - Mosebenzi Zwane, die Suid-Afrikaanse minister van minerale bronne, sê die Optimum-steenkoolmyn wat deur die Guptas besit word, beskik wel oor 'n rehabilitasietrustfonds van R1,5 miljard.

Só 'n fonds is volgens wet 'n vereiste.

Luidens 'n geskrewe antwoord van Zwane op 'n vraag wat deur die DA se James Lorimer in die parlement gevra is, is die trustfonds by die Bank of Baroda in Indië.

Fin24 het vroeër berig die bank, wat in Moembai gebaseer is, het maatskappye wat deur die familie beheer word se bankrekeninge begin sluit.

Oakbay Investments, die Guptas se hoofhouermaatskappy, het die beweringe ontken.

Lorimer het gevra presies hoeveel geld die myn vir rehabilitasie be­skikbaar het.

“Volgens maatskappyrekords is daar 'n bedrag van R1 523 405 982,36 in 'n trustfonds by die Bank of Baroda beskikbaar,” sê Zwane in die antwoord.

Lorimer se vraag volg nadat die amaBhungane sentrum vir ondersoekende joernalistiek in Oktober 'n artikel op Daily Maverick se webtuiste gepubliseer het wat beweer die departement van minerale bronne het skriftelik toestemming gegee dat R1,3 miljard van die trustfonds na die bank oorgeplaas kan word.

Pravin Gordhan, voormalige minister van finansies, het ook in 2016 in 'n beëdigde verklaring daarna verwys.

Dit was deel van 'n verslag deur die Finansiële Intelligensiesentrum waar 'n aantal verdagte en ongewone transaksies geïdentifiseer is.

Volgens amaBhungane was daar spekulasie dat Tegeta – waarin Optimum 'n 29%-belang het – geld van die rehabilitasiefonds wou gebruik om lenings terug te betaal wat hy waarskynlik gekry het juis om Optimum te koop.

Oakbay het daarop aangedring dat hy bloot die fonds geskuif het omdat Standard Bank al sy rekeninge gesluit het.

Die wet vereis dat myne R1,5 miljard in 'n omgewingstrustfonds opsy sit wat dan vir rehabilitasie gebruik word wanneer die myn sluit.

Tegeta het na bewering hierdie geld “geërf” toe hy Optimum in November 2015 gekoop het.

Zwane het in sy antwoord bevestig die R1,5 miljard is nog in plek.

“Volgens die maat­skappy se rekords het die bedrag nie verander nie. Dit is egter waarskynlik dat dit wel kan verander weens rente wat teen die vervaldatum opgeloop het.”

- Netwerk24

Kommentaar

Republikein 2025-04-19

Geen kommentaar is op hierdie artikel gelaat nie

Meld asseblief aan om kommentaar te lewer