Gemengde reaksie oor Duin 7 se ingangsfooie

Ellanie Smit – Mense het in die sosiale media gal gebraak oor die hoë ingangstariewe wat vanaf 1 Desember en op die vooraand van die feesseisoen geld vir besoekers aan een van die gewildste toerisme-aantreklikhede aan die kus, Duin 7. Die meerderheid was dit eens dat dié stap toerisme in die gebied gaan vernietig. Ander was meer simpatiek en het die besluit ondersteun, omdat vandalisme en rommelstrooiery ’n reuseprobleem in die land is en Namibiërs nie infrastruktuur beskerm en onderhou nie. Nog inwoners was nie heeltemal oortuig dat die nuwe infrastruktuur by Duin 7 in stand gehou gaan word nie, selfs met ingangsfooie wat hiervoor bestem is.Die implementering van die parkfooie volg ná die opgradering van infrastruktuur by dié gewilde toeriste-aantreklikheid. Volgens die ministerie van die omgewing, bosbou en toerisme se woordvoerder, mnr. Romeo Muyunda, word die ministerie finansieel ondersteun deur die Wildleweprodukte Trustfonds, met die bestaande toiletgeriewe wat opgeknap en nuwes wat gebou word. Die braaigeriewe word ook opgeknap, terwyl vyf nuwe braaigeriewe opgerig word. Die opgraderingswerk sluit ook ’n kabelheining vir die ontspanningsarea, ’n toegangshek, sowel as ’n ontvangskantoor in.“Duin 7 is ’n gewilde toerisme-aantreklikheid vir beide plaaslike en buitelandse besoekers. Die bestuur van die ontspanningsarea was vir die miniserie moeilik weens veral vandalisme en rommelstrooi,” sê Muyunda. Volgens hom het die toiletgeriewe en ander infrastruktuur by die ontspanningsarea so onder vandale deurgeloop, dat dit tans nie gebruik kan word nie en beduidende bedrae kos om te herstel. “Die opgradering van die geriewe en die infrastruktuur sal die ministerie in staat stel om ingangstariewe by Duin 7 te implementeer soos goedgekeur en in die Staatskoerant in 2021 gepubliseer. Die tariewe geld vanaf 1 Desember.”Muyunda sê die goedgekeurde ingangstariewe het ’n omvattende konsultasieproses ondergaan. Volgens hom sal die beoogde tariewe help om te verseker dat die standaarde van die gewilde ontspanningsarea by Duin 7 onderhou word en besoekers se ervaring ’n hupstoot sal gee. Op die lang termyn gaan die ministerie die ontspanningsarea as ’n toerisme-konsessie aanbied in oorleg met die toerisme-ontwikkelingsplan vir die Dorob Nasionale Park. “Deur middel van die konsessie gaan nog toerismeprodukte en -dienste ontwikkel word om nie net aanvaarbare standaarde van die gebied te verseker nie, maar ook om besoekers se ervaring van die gebied op te hef.”Dié konsessie sal eersdaags in die media geadverteer word.“Ons doen ’n beroep op besoekers aan die gebied om hul samewerking aan die ministerie te gee om te verseker dat die nuwe geriewe onderhou en nie gevandaliseer word nie. Die ministerie is besig om voortgeset en voortdurend programme en aktiwiteite te implementeer wat verseker ons voer ons mandaat uit.” – republikein@republikein.com.na

Gemengde reaksie oor Duin 7 se ingangsfooie

Kommentaar

Republikein 2025-03-31

Meld asseblief aan om kommentaar te lewer

Gemengde reaksie oor Duin 7 se ingangsfooie

Kommentaar

Republikein 2025-03-31

Meld asseblief aan om kommentaar te lewer

MELD AAN

Advertensie