Kiaatreuse val onwettig in bewaringsgebied

Die gefrustreerde voorsitter van ’n bewaringsgebied suidoos van Rundu waar 96 onwettig afgekapte kiaatbome (Pterocarpus angolensis) in Februarie gevind is, sukkel meer as ’n maand later steeds om antwoorde te kry oor waarom die vermeende verdagtes nog nie aangekla en voor die hof gebring is nie.Mnr. Thomas Muronga, voorsitter van die Kapinga KaMwalye-bewaringsgebied, sê ’n saak (CR106/02/2022) is in Februarie by die polisie op Rundu aanhangig gemaak teen ’n 43-jarige onderwyseres en haar 39-jarige sakevennoot.Hy sê die onwettige oes van die kiaatbome het aan die lig gekom toe een van die bewaringsgebied se hulpbronbeamptes, mnr. Mutundu Pius, in die veld daarop afgekom het.’n Moratorium op die oes van bome is op 26 November 2018 afgekondig ná ’n wekroep deur bewaringsinstellings oor die plundering van skaars bome in die Kavango- en Zambezistreek.Murango sê hy en mnr. Sakeus Kupepa, ’n bosboubeampte van die direktoraat bosbou in die ministerie van die omgewing, bosbou en toerisme, het op 9 Februarie die Cima-nedersetting in dié bewaringsgebied besoek en die 86 afgesaagde bome gevind, met etlike ander kiaatbome wat nog in die veld gelê het en wat na bewering ook onwettig afgekap is. Hulle het glo op ’n trekker en sleepwa afgekom waarop ’n masjien was wat gebruik is om die bome te saag.Dit blyk uit ’n verslag deur Kupepa hulle het die trekker se battery verwyder en die sleepwa met die masjien daarop agter hulle voertuig gehaak om dit as bewysstuk na die bosboukantoor op Rundu geneem.Murango en Kupepa se ondersoek het hulle daarna na die huis van die onderwyseres op Rundu gelei, wat volgens die verslag erken het die hout behoort aan haar en dat sy nie oor ’n oespermit beskik nie.Dit blyk hulle is die volgende dag saam met haar en twee polisiebeamptes na die huis van haar vennoot. Kupepa sê in sy verslag volgens dié man het die onderwyseres gesê hy moet voortgaan om die bome af te kap, “want sy sal binnekort die permit kry wat deur die bosboukantoor aan haar beloof is”. Hy het glo ook aan hulle gesê hy het agt mans aangestel om te help om die bome af te saag.Muronga sê sedertdien sukkel hy om antwoorde by die bosboukantoor en die polisie op Rundu oor die vervolging van die onderwyseres en haar vennoot te kry.“Ons kom nie reg nie; hulle los die saak net so en doen nie iets daaraan nie,” sê hy.Die nuwe direkteur van bosbou, mnr. Johnson Ndokosho, het in reaksie op vrae hieroor gesê dit moet aan die ministerie se amptelike woordvoerder, mnr. Romeo Muyunda, gerig word.Laasgenoemde het bykans twee weke later nog nie eens ontvangs erken het, hoewel hy die navraag op WhatsApp gelees het.Kupepa het gister telefonies bevestig niemand is tot nou toe in hegtenis geneem nie. – ronelle@republikein.com.na

Kiaatreuse val onwettig in bewaringsgebied

Kommentaar

Republikein 2025-04-07

Meld asseblief aan om kommentaar te lewer

Kiaatreuse val onwettig in bewaringsgebied

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie