Meer as 12 witrenosters al na VSA uitgevoer

Namibië as deurgangsroete geag
Verlede jaar is Suid-Afrikaanse witrenosters weer via Namibië na Amerika uitgevoer – die getal is egter onbekend, aangesien statistiek van Cites se handelsdatabasis van 2023 nog nie op sy webtuiste gelaai is nie.
Francoise Steynberg
Twaalf witrenosters van Suid-Afrikaanse oorsprong is reeds in 2022 van Namibië na die Verenigde State van Amerika (VSA) uitgevoer.

Dit is volgens die handelsdatabasis van die Konvensie oor Internasionale Handel in Bedreigde Spesies van Wilde Fauna en Flora (Cites).

Daar is wel weer verlede jaar Suid-Afrikaanse witrenosters via Namibië na Amerika uitgevoer. Die getal is egter onbekend, aangesien statistiek van Cites se handelsdatabasis van 2023 nog nie op sy webtuiste gelaai is nie.

Nóg verskeie aansoeke is glo in Namibië ingedien om vanjaar witrenosters na die VSA en ander oorsese lande uit te voer.

Volgens Cites is Namibië die enigste land in Afrika wat witrenosters vir teeldoeleindes uitvoer, met kommer wat heers dat die land beskou word as ’n deurgangsroete na oorsese lande buite hul natuurlike habitat.

Die Suid-Afrikaanse omgewingsminister, Barbara Creecy, het einde Maart aangekondig dat dié land se kabinet hersiene beleide goedgekeur het om die intensiewe bestuur en teling van renosters in aanhouding vir kommersiële doeleindes uit te faseer en wilde bevolkings te bevorder.

Die Namibiese ministerie van die omgewing, bosbou en toerisme het einde 2023 al in ’n mediaverklaring hul kommer uitgespreek oor Namibies-geregistreerde wildhandelaars wat lewende witrenosters van Suid-Afrika na Namibië invoer om die diere weer vir teeldoeleindes na lande buite hul natuurlike habitat uit te voer.

Dit beteken gebiede waar dié bevolking van witrenosters nog nooit voorgekom het nie en moeilik sal vind om te oorleef.

Wetenskaplikes is van mening dat renosters wel na Afrikalande uitgevoer kan word om die bedreigde spesie se voortbestaan te verseker. Daar is teenkanting teen die uitvoer van renosters na oorsese lande, soos onder meer die VSA, Rusland, die Midde-Ooste, Asië en Australië wat nie die natuurlike habitat van renosters is nie.

Dit geld ook vir ander wilde diere, soos koedoes, gemsbokke en volstruise, wat reeds in ander oorsese lande, veral op Amerikaanse plase in Texas gevestig is, en daar gejag kan word.

Destyds met die uitvoer van Namibiese volstruise, het die land se volstruisbedryf binne een jaar in duie gestort.

KNIEHALTER JAGBEDRYF

Belanghebbendes in die jagbedryf is van mening dat die uitvoer van witrenosters (en ander endemiese wildspesies) na oorsese lande, trofeejag in Namibië sal belemmer. Amerikaanse of ander internasionale trofeejagters sal dan eerder die wildspesies op Amerikaanse plase jag as om na Namibië te reis.

Dit sal derhalwe weer ’n impak op die inkomste van die toerismesektor hê, asook op kommunale bewaringsgebiede wat afhanklik is van hul inkomste uit die jag- en toerismesektor.

“Persoonlik is ek gekant teen die uitvoer van witrenosters na enige lande buite Afrika. Die spesie hoort in Afrika,” het die president van die Namibiese Professionele Jagtersvereniging (Napha), Axel Cramer, op navraag aan Namibia Media Holdings (NMH) gesê.

“Wild is wild en moet wild bly,” het hy beklemtoon.

STROPERY VIER HOOGTY

Met renosterstropery wat hoogty vier, is bewaringskenners van mening dat Westerse lande die in situ-bewaring van renosters in Namibië moet ondersteun, eerder as om spesies buite hul habitat in te voer.

Renosterstropery raak Namibië, Suider-Afrika en die hele vasteland.

“Almal moet renosters teen stropery beskerm. As witrenosters boonop die vasteland verlaat, is dit neusie verby. Ons wil nie Afrikaspesies buite Afrika hê nie, want dit belemmer nie net die genetika van spesies nie, maar ook ons jag- en toerismebedryf.”

Bewaringskenners is van mening “ons erfenis is besig om geld vir ander Westerse lande te maak”.

Die ministerie se woordvoerder, Romeo Muyunda, het in November in ’n verklaring gemaan Suid-Afrika het strenger maatreëls in plek wat insluit dat sommige wildlewespesies nie uitgevoer mag word nie.

“Namibiese private boere en veral geregistreerde wildhandelaars, word gemaan om nie sulke transaksies aan te gaan nie omdat hulle nie binne die voorsiening van die Cites-konvensie ondersteun sal word nie,” het hy gesê.

“Op die lange duur sal dit nadelig vir ons bewaring wees aangesien dit tot internasionale handelsopskortings vir Namibië kan lei weens die nienakoming van die bepalings van die Cites-konvensie,” het die verklaring gelui.

“Die invoer van witrenosters van Suid-Afrika kan ook ons boere of wildhandelaars benadeel indien hulle witrenosters van Namibiese oorsprong wil uitvoer.”

Muyunda het benadruk die ministerie sal nie sulke aansoeke verwerk nie, tog is verskeie aansoeke glo reeds vanjaar ingedien.

[email protected]

Kommentaar

Republikein 2025-04-05

Geen kommentaar is op hierdie artikel gelaat nie

Meld asseblief aan om kommentaar te lewer