Swakop neem afskeid van geliefde slangpark

Die atmosfeer by die Living Desert Snake Park in Swakopmund het verander. 

Bouwerk is reeds aan die gang en die eienaars sê die gebou gaan gesloop word. 

Vir Swakopmunders is dit nie net ’n fasiliteit wat sy deure sluit nie. Die slangpark het oor drie dekades ’n bekende plek vir gesinne en besoekers geword om te besoek asook ’n gewilde bestemming vir skoolgroepe en ’n veilige hawe vir reptiele wat nie in die natuur vrygelaat kan word nie.

Stretch en Angela Combrink, mede-eienaars van die slangpark, sê hulle het 69 reptiele in hul sorg, insluitend slange, akkedisse en skilpaaie, wat elkeen van ’n gewisse dood gered is.

Daarom weeg die besluit om te trek swaar. Dis nie net om toerusting en hokke te verskuif nie, maar ook verantwoordelikheid.

Die egpaar sê hulle het probeer om in Swakopmund te bly.

“Ons probeer al die afgelope ses maande om ’n plek hier te vind om onsself in Swakopmund te vestig,” het Stretch gesê, daardie opsies is egter uitgeput. 

“Aan die begin van Januarie het ek net vir Angela gesê: ‘Dis dit… ons moet alternatiewe reëlings soek’, en ongelukkig kan ons niks in Swakopmund vind nie.”

Hy sê: “As ’n wonderwerk nie gebeur nie, moet ons ons deure in Swakopmund sluit.”

Angela het die impak van die sluiting op die dorp as “baie, baie hartseer” beskryf. Stretch sê die verlies sal veral deur skole gevoel word. Hy het bygevoeg dat hulle reeds skole wegwys aangesien besprekings gewoonlik nou vir later in die jaar inkom.

Verlede jaar het 6 000 leerlinge en 800 onderwysers die slangpark besoek.

Hulle sê die slangpark sal nou na Mount Etjo Game Ranch naby Kalkveld trek, waar hulle hul werk sal voortsit. 

“Ons sal daar in dieselfde formaat voortgaan as wat ons in Swakopmund doen,” het Stretch gesê.

Maar kusbewoners sal die maklike toegang verloor wat hulle al vir dekades lank gehad het en die park sal nie meer ’n eenvoudige uitstappie vir talle leerlinge en gesinne wees nie.

Op die oomblik is die welstand van die diere die grootste prioriteit. Stretch het gesê die diere moet op een slag verskuif word. 

“Jy kan nie bietjies-bietjies trek nie,” het hy gesê.

Stretch het verduidelik hulle sal waarskynlik ’n vraghouer gebruik, die hokke en diere sal laai, snags tydens koeler temperature sal reis en dan onmiddellik met hul aankoms die diere sal aflaai. Die diere kan nie te lank in bokse gehou word nie.

“Hulle kan ’n maksimum van 48 uur in die bokse bly,” het hy gesê. 

“Dis moeilik vir die diere en vir ons,” het Stretch bygevoeg en die stres beskryf van die voorbereiding om te trek wat versigtig en vinnig gedoen moet word.

Vir talle Swakopmunders sal die afwesigheid van die park ’n groot impak hê, nie net omdat die park ’n instelling is nie, maar omdat dit stilweg ’n gespesialiseerde verantwoordelikheid namens die gemeenskap gedra het, naamlik die omgee vir reptiele, wat van ’n gewisse dood gered is, en nêrens anders heen kan gaan nie. 

– [email protected]