Tien mense tans in Visrivier vermis

Tien mense word tans in die Visrivier-canyon vermis. Volgens Namibia Wildlife Resorts (NWR) se woordvoerder, Nelson Ashipala, is soekspanne tans besig om na 'n groep van ses mense en nog 'n groep van vier te soek. Ashipala kon nie bevestig of die Suid-Afrikaanse egpaar van Franschoek, Trevor (63) en sy vrou Samantha (50) Burger wat ook vermis word, deel van een van die twee groepe is nie. Die Burgers se dogter, Tana Lancaster, het vroeër op sosiale media gesê drie noodroepe is van die egpaar ontvang wat Donderdagaand by die canyon aangekom en Vrydag begin stap het. Volgens Lancaster is dit nie die eerste keer wat haar ouers die staptog aanpak nie en is hulle "baie fiks en aktief".