Trek jou stapskoene aan vir olifantbewaring

Die tweede Kunene Elephant Walk vind volgende week plaas. Alle natuurliefhebbers, stap-entoesiaste, en mense wat die belange van die woestynaangepaste olifante op die hart dra, is welkom om die vyf dae lange staptog oor 150 kilometer mee te maak. Die geld wat ingesamel word, is geoormerk om onder meer waterpunte vir olifante buite nedersettings op te rig; om mure rondom groentetuine op te rig; toerusting vir tien olifantbewaarders aan te skaf en opleiding te bied aan gemeenskapswildwagters oor olifante en tegnieke om konflik te verlig. Volgens me. Josephine Kamelo van die Tourism Supporting Conservation Trust (Tosco) help die organisasie vanjaar om die olifantstaptog te organiseer. “In die verlede het Tosco onder meer die Kunene-gemeenskappe gehelp om krale te bou wat teen roofdiere bestand is, met vroeë waarskuwingstoere, ’n nuwe sonkragpomp en om die De-Riet-sonkragpomp reg te maak.In vennootskap met Elephant Human Relations Aid (EHRA) het Tosco die People and Elephants Amicably Co-Existing(Peace)-opleiding vir olifantwagte aangebied. Die hoofdoel van die Peace-projek is om mense van alle ouderdomsgroepe en sosiale agtergronde meer oor olifante te leer, wat help om hul vrese te verminder,” het sy gesê. Almal is welkom om aan die staproete teen ’n fooi van N$500 deel te neem, wat vir konflikvoorkomingsprojekte aangewend sal word.“Alternatiewelik, as jy help om geld in te samel, kan jy gratis deelneem. Die minimum wat jy moet insamel, is N$1 000. Jy sal aan ons aanlyn geldinsamelingspan gekoppel word en ’n persoonlike skakel kry wat jy maklik met jou vriende, familie en kollegas op sosialemediaplatforms kan deel.”Die stappers gaan die vyf dae sonder enige stort- of toiletgeriewe kamp en is verantwoordelik vir hul eie vervoer, kos en kamptoerusting. ’n Voertuig sal beskikbaar gestel word om kos en kamptoerusting te vervoer.Die staptog is vanaf 5 tot 9 Julie en begin by die Ongongo-bewaringsgebied deur die Otjiu-Wes-, Ombuijokanguindi-, Ozondundu- Okangundumba- en Omatendeka-bewaringsgebied. Die Kunene Elephant Walk is ’n inisiatief van mnr. John Kasaona, die direkteur van Integrated Rural Development and Nature Conservation (IRDNC), saam met vyf lede van die bewaringsgebiede van die noordwes-Kunene. “Saam met ons bewaringsvennote EHRA, Conservations Film Foundation, Desert Elephant Conservation en IRDNC help Tosco dié organisasie met die geldinsamelingsveldtog asook om die geleentheid te reël.”Die noordweste van Namibië is die tuiste van ’n unieke groep Afrika-olifante, wat oor talle jare by die dorre omgewing van die Namibwoestyn aangepas het. Afgesien van hierdie groep kan daar nog net in Mali in die Saharawoestyn woestynaangepaste olifante gevind word. In Namibië kom hulle in die Hoarusib-, Hoanib-, Huab-, Aba Huab- en Ugabrivier voor. In vergelyking met ander olifante kan woestynaangepaste olifante vir ’n paar dae sonder water oorleef, en lang afstande aflê op soek na water. As gevolg van die beperkte kos en natuurlike waterbronne in dié dorre deel van die land, lok die nabygeleë nedersettings in die omgewing gereeld die olifante. Plaaslike gemeenskappe, in hul pogings om by voortdurende klimaatverandering en langdurige droogtes aan te pas, wend hul meer en meer na landbou om hul afhanklikheid van veeboerdery te verminder. Wanneer olifante die nedersettings binnekom, plunder hulle dikwels die oeste en vernietig waterinfrastruktuur soos watertenks en -pype. Die kwessie van mens-olifant-konflik (HEC) word steeds nie heeltemal verstaan nie en met die staptog deur die olifante se habitat, poog die stappers om lig op hierdie kwessie te werp. Die stappers sal onder meer met boere gesels oor hoe hulle met die olifante saamleef.Mense wat saam wil stap of net ’n skenking wil maak, kan ’n e-pos na info@tosco.org stuur. –

Trek jou stapskoene aan vir olifantbewaring

Kommentaar

Republikein 2025-04-21

Meld asseblief aan om kommentaar te lewer

Trek jou stapskoene aan vir olifantbewaring

Kommentaar

Republikein 2025-04-21

Meld asseblief aan om kommentaar te lewer

MELD AAN

Advertensie