Geingob: Hoekom wag skole vir staatshulp?

President Hage Geingob sê onderwysers by skole wat onder skadubome klasgee, “doen nie hul beste nie” en hy moedig hulle aan om tydelike strukture op te rig terwyl die regering aan oplossings werk. Tydens sy openingsrede van die kabinet het hy erken dat ernstige probleme in die land se onderwysstelsel bestaan, maar het onderwysers aangemoedig om te red sover hulle kan by hul skole se vervalle strukture. Die ministerie van onderwys, kuns en kultuur het die land se swakste eksamenuitslae in 2022 aangeteken, toe meer as 80% van die leerders wat die Nasionale Senior Sertifikaat Gewone Vlak (NSSCO)-eksamens afgelê het, gedruip het. “Ek hoor in sommige lande is daar ’n 85%-slaagsyfer vir matriek. Dan vat hulle dit, diploma soveel, soveel vir sertifikate en soveel vir beroepsopleiding en tel dit bymekaar en sê 80% slaagsyfer in matriek. Dis die nuwe styl; so ons moet daarna kyk,” het Geingob gesê. Die president het bygevoeg hy was verbaas om te sien hoe algemeen kinders deesdae onder bome onderrig word. “Ek het al hierdie land deurgereis en ek het dit nie tevore gesien nie. Onderwysers probeer hul bes, maar die regering is nie hier nie. Ek het een voorbeeld by een skool gegee, waar iemand gesê het: ‘Ons het nie ’n kombuis nie, dis waar ons kook. As dit reën, word ons nat.’ “Ek het na hierdie persoon gekyk en gesê: ‘Ja, terwyl jy wag vir die regering, hoekom sit jy nie een paal hier, een paal daar, een paal daar en sit die blikkies bo-op nie. Ten minste sou jy daar kook en dit sal nie nat wees terwyl jy vir die regering wag nie’,” het hy gesê. Hy het bevraagteken waarom skole nie hul jong leerlinge mobiliseer om hul skoolwerwe skoon te maak nie en eerder die regering se hulp vra. “Om daar op te ruim, stuur jy iemand van Windhoek af? Daar is geen inisiatiewe om skoon te maak nie. “Toe ons jong kinders in hierdie land was, was ons besig om ons skoolwerwe skoon te maak en so aan. Onderwys is ’n probleem, maar onderwys is ook die groot gelykmaker. Dis ons almal se bekommernis, daarom sal ons vergader om menings te deel oor watter rigting ons kan volg. Om soort van weer te kyk na wat gebeur het. Is dit so erg, of word die prentjie aangebied om dit nog erger te laat lyk?” het Geingob gevra. – [email protected]