Tente, sinkhuise dien as klaskamers

Leerlinge aan die Senior Primêre Skool Joy Mungungu ontvang steeds onderrig onder bome, in tente en tydelike sinkstrukture, met die skool wat gebuk gaan onder ’n ernstige tekort aan klaskamers. Die skool, wat in die informele nedersetting van Rundu in Kavango-Oos geleë is, het ’n skerp toename in die aantal ingeskrewe leerlinge ervaar van die net meer as 800 leerlinge verlede jaar tot die 1 408 wat tans geregistreer is. Die beskikbare infrastruktuur kon nie tred hou met die geweldige groei nie. Volgens die skoolhoof, Annely Masambo, het die regering net 15 klaskamers gebou, wat skaars genoeg is om leerlinge vanaf preprimêr tot graad 3 te akkommodeer.“Die klaskamers is nie genoeg nie. Die 15 wat deur die regering gebou is, maak net voorsiening vir die laer grade. Drie junior primêre klasse is steeds buite en vanaf graad 4 tot 7 word die leerlinge in tente of onder bome onderrig. Ons het tans ’n tekort van 15 klaskamers,” het Masambo gesê.’n Besoek van Network Media Hub (NMH) aan die skool het bevestig meer as tien tydelike klaskamers is opgerig in ’n poging om die groeiende aantal leerlinge te akkommodeer, wat hulle noodgedwonge aan strawwe weersomstandighede en ongemak blootstel. Die gebrek aan behoorlike sanitasiegeriewe dra by tot die skool se uitdagings. “Ons het net een ablusieblok, wat nie vir al 1 408 leerlinge voorsiening maak nie. Ons het ten minste nog twee ablusieblokke dringend nodig,” het Masambo gesê.Ten spyte van die moeilike en uitdagende leeromgewing, sê Masambo maak die skool akademiese vordering.“Ons het verlede jaar 50% van ons prestasieteiken bereik, ’n verbetering vanaf 43% wat ons die vorige jaar behaal het,” het sy gesê.In nog ’n positiewe ontwikkeling het die skool sy personeel versterk met die aanstelling van vyf nuwe onderwysers wat aan die Universiteit van Namibië (Unam) gegradueer het.“Al die nuwe personeellede is jonk en vars uit Unam. Ten minste het die regering ’n poging aangewend om personeel in te bring. Ons is nou 32 in totaal en wag nog vir meer poste om geadverteer te word.”Die skool het ’n beroep op skenkers en rolspelers gedoen om in te tree en te help om die leerlinge se leeromgewing te verbeter. – republikein@republikein.com.na

Tente, sinkhuise dien as klaskamers

Kommentaar

Republikein 2025-04-08

Meld asseblief aan om kommentaar te lewer

Tente, sinkhuise dien as klaskamers

Kommentaar

Republikein 2025-04-08

Meld asseblief aan om kommentaar te lewer

MELD AAN

Advertensie