Voorraad vir koshuis 'verkoop'

Die polisie in die Omusatistreek moes verlede week ingryp en 100 brode konfiskeer wat vir die Senior Sekondêre Skool Onawa bestem was, maar nooit afgelewer is nie. Die maatskappy wat die aflewering by die skool moes doen, het die brood aan ’n bekende sakeman op Onandjaba verkoop. Inligting oor wat presies gebeur het, is skraps en geen saak is by die polisie geopen nie wat dit onduidelik maak wie die besluit geneem het dat die brode by die perseel van die sakeman opgeëindig het in plaas van by die skool. Eloolo Food Services is deur die regering aangewys om kos na alle skoolkoshuise in die Omusatistreek te versprei. Lede van die gemeenskap het egter die polisie laat weet ’n misdaad word gepleeg toe die voertuig wat die brode by die staatskool moes aflaai, gesien is waar iemand besig was om die brode in ’n private voertuig langs die pad by Onandjaba te laai. Voor dié ‘omruiling’ is brood by die Senior Sekondêre Skool Onawa afgelaai en die broodwa was op pad na die koshuis van die Senior Sekondêre Skool Haudano, ’n topskool in die streek. ’n Bron wat verkies het om anoniem te bly, beweer dat die bestuurder van die broodwa nie al die brode by die koshuis van die Senior Sekondêre Skool Onawa afgelaai het nie, maar 100 teruggehou het. Dit is dié brode wat beweer word aan die sakeman verkoop is. Die beplande transaksie met die sakeman is egter kortgeknip toe die polisie die bestuurder van die broodwa by die Senior Sekondêre Skool Haudano voorgekeer en navraag gedoen het oor wat in die private voertuig gelaai is.“Hy wou eers alles ontken, maar het later met die sak patats vorendag gekom. Die polisie het die sakeman gekontak en die brood is by hom afgeneem en terug na die ‘wettige’ eienaars by die koshuis geneem,” het die bron gesê.Die koördineerder van misdaadondersoeke in die streek, kommissaris Ismael Basson, het die voorval bevestig. Volgens hom het die skool nie ’n saak geopen nie en kan die polisie dit gevolglik nie verder ondersoek nie. Die bestuur by die geraakte skool is verdeel oor of daar wel ’n saak geopen moet word. By navraag het die Senior Sekondêre Skool Onawa se waarnemende hoof, Asser Joseph, die voorval bevestig, maar gesê die skool gaan nie ’n saak open nie, omdat die brood toe wel by hulle afgelewer is.“Ons gaan nie ’n saak oopmaak nie. Op die dag van die voorval wou ons ons brood hê. Nadat die bestuur van die maatskappy gesorg het dat ons die brood kry, het ons ooreengekom dat die situasie nie herhaal moet word nie,” het Joseph gesê.Op ’n vraag of die direktoraat van onderwys vir die streek oor die voorval ingelig is, het Joseph gesê die skool het ’n verslag aan die streekkantoor gestuur. Die bron het egter gewonder of dit die eerste voorval is waar voedselvoorrade wat vir staatskoshuise bestem was, aan private individue verkoop is.“Hoe lank gebeur dit al? Sê ons dit is die eerste keer dat dit gebeur het omdat hulle gevang is? Dit is belastingbetalers se geld wat gebruik word vir persoonlike gewin. “Die Teenkorrupsiekommissie (ACC) kan dit ondersoek as die polisie nie wil nie. Wat is die rol van die ACC as sulke goed gebeur?” wou die bron weet. Hy het ook daarop aangedring dat die betrokke maatskappy diegene ondersoek wat by die voorval betrokke was. – republikein@republikein.com.na

Voorraad vir koshuis 'verkoop'

Kommentaar

Republikein 2025-04-10

Meld asseblief aan om kommentaar te lewer

Voorraad vir koshuis 'verkoop'

Kommentaar

Republikein 2025-04-10

Meld asseblief aan om kommentaar te lewer

MELD AAN

Advertensie