‘Saam bereik ons meer’

“Ons sien uit na ’n toekoms waar onderwys die topprioriteit bly en waar elke kind die geleentheid geniet om te leer, te groei en uit te blink.”

Só het die hoofseun van Laerskool Eros, Isheanesu Teta, gister in sy uitmuntende verwelkomingstoespraak in die skoolsaal gesê.

Hy was eerste aan die woord by die geleentheid vir amptenare van Namibië se grootste, en nuut uitgebreide, ministerie van onderwys, vernuwing, jeug, sport, kuns en kultuur.

Minister Sanet Steenkamp sê haar ministerie se begroting van ongeveer N$26,1 miljard, die grootste onder die 14 ministeries, en waarvan vier uit sewe van die regering se topprioriteite onder haar ministerie se pligte val, sal doelbewuste toewyding en samewerking verg.

Sy sê staatspresident Netumbo Nandi-Ndaitwah het die ministerie uitgebrei om ’n sinergistiese netwerk te skep, met die geleentheid om bedrywighede stroombelyn te maak en ’n ligvoetige entiteit met sy eie identiteit en kultuur te skep.

“Julle moet my help om hierdie mandaat te vervul, met ’n groter impak. Die impak is al wat ek wil sien,” het die minister aan haar amptenare gesê.

“Ons pogings moet geharmoniseer word om ons hulpbronne en ons sterkpunte tot voordeel van alle Namibiërs te maksimaliseer,” het sy gesê.

Steenkamp het haar adjunk- uitvoerende direkteur vir skole, Edda Bohn, aangehaal: “TEAM staan vir Together Each Achieves More.”

“Soos ons saamsmelt, wil ek hê ons moet die beste in mekaar omhels,” het die minister haar amptenare aangemoedig.

Voorheen was jeug, sport en vernuwing deel van ander ministeries.

Steenkamp sê sy duld nie ’n houding van “dit is nie my werk nie” en eis dat haar personeel voortgaan om te "leer soos jy werk”.

“Ons het nie tyd vir professionele jaloesie, negatiwiteit, teenstand of onbuigsaamheid nie. Ons het net vyf jaar en drie maande is reeds verby.

“Daar is nie tyd om te sê ek raak nog gemaklik nie. Hardloop asseblief, en hardloop vinnig,” het sy gesê.

Die minister sê sy is op soek na voorbeeldige amptenare, wat leierskap op elke vlak uitleef en die ministerie se leuse vir die komende termyn “Foundation first, excellence always!” bewaarheid.



ONTWIKKELINGSPRIORITEITE

Adjunkminister Dino Ballotti het in sy toespraak uitgebrei oor die ontwikkelingsprioriteite waarvoor die ministerie verantwoordelik is.

Sport, jeugbemagtiging, gehalte-onderwys en die ontwikkeling van die kreatiewe sektor is die vier beloftes uit Swapo se verkiesingsmanifes waarop die president aandring, en waarvoor die ministerie verantwoordelik is.

Ballotti het pastoor Timotheus Mutambo se boodskap vir die dag aan almal teenwoordig beklemtoon.

“Julle is gebore vir ’n tyd soos hierdie,” het hy herhaal.

“Nou, meer as ooit, is my roeping en doel om te dien,” het die voormalige sokkerafrigter en administrateur, onderwyser, kleinsakepromotor en entrepreneuriese kenner gesê.

Die uitvoerende direkteur van die ministerie (nie-rekenpligtige), Gerard Norman Vries, het op sy beurt die “gewaardeerde en kundige vergadering van burgers” daaraan herinner om te vra: “Hoe maak ek die lewe vir my gemeenskap beter?”

Hy bevorder samewerking en om saam te leef op grond van wedersydse respek, het hy gesê.

Die ander uitvoerende direkteur, Mbumba Haitengala, is die ministerie se rekenpligtige amptenaar.

Hy dring daarop aan dat Namibië se grootste bate die land se jongmense is.

“Hierdie ministerie is die grondslag van Namibië se mensekapitaal, vernuwing en maatskaplike welvaart,” voer hy aan.

Hy sê die verwagtinge is hoog vir die minister om onderwys en opleiding te prioritiseer, die jeug se deelname in die ekonomie uit te brei, belegging in sport te verhoog en die skeppende kunste te bevorder.

“Ons kan nie bekostig om in afsondering te werk nie. Sukses hang af van geïntegreerde werksaamhede. Ons fokus moet daarop wees om brûe te bou en interne samewerking te bevorder,” sê hy.

Laerskool Eros se skoolhoof en gasheer van die geleentheid, Poppy Hamata, het afgesluit met: “Ons is toegewyd aan eenheid en is toevertrou met ’n opregte verantwoordelikheid. Met professionaliteit, inklusiwiteit en integriteit sal ons wys dat onderwys die grondslag van vooruitgang is,” sê sy.

– [email protected]