Vliegtuig te swaar in Impalila-ongeluk

Ellanie Smit- Die vliegtuig wat verlede jaar in die Zambezirivier neergestort het nadat dit van die Impalila-eiland-landingstrook opgestyg het, was oor die gewigsbeperking.Vyf mense - ’n Duitse gesin en &#039;n Suid-Afrikaanse vlieënier – is verlede jaar in die ongeluk dood. Die gesin is geïdentifiseer as Thomas Rings (59), sy vrou Evelyn (57) en hulle dogters, Alicia Maria (19) en Paulina Lucia (17).Die vlieënier is geïdentifiseer as Nicole Minnie.Volgens die finale ondersoekverslag van die direktoraat van vliegtuigongelukondersoeke in die ministerie van werke en vervoer het die Cessna C210-vliegtuig met registrasiemerk V5 LMK op 30 Augustus 2022 omstreeks 05:55 vanaf die Eros-lughawe in Windhoek na Impalila-eiland vertrek met slegs die vlieënier aan boord.Die vliegtuig het genoeg brandstof aan boord gehad om sewe uur en 30 minute in die lug te bly.Die doel van die vlug was om vier passasiers vanaf Impalila-eiland terug te bring na Eros via Rundu.Rundu was &#039;n tegniese stilhoupunt vir brandstof, luidens die verslag.Die vliegtuig het die oggend omstreeks 09:43 op die Impalila-eiland-landingstrook geland, waar die passasiers reeds gewag het.“Die landing was nie stabiel nie omdat dit geballon het voordat dit tot stilstand gekom het en aan die einde van die aanloopbaan afgeskakel het (Threshold 28).”Terwyl die passasiers aan boord was, het die vlieënier besef hulle bagasie is te swaar en toe twee sakke afgelaai.Sy het met die aanloopbaanoperateur gekommunikeer om reëlings te tref vir die sakke om opgetel te word en verduidelik dat dit te swaar was, aangesien die stert van die vliegtuig amper aan die grond geraak het.Luidens die verslag het die vliegtuig vanaf die aanloopbaan vertrek nadat die passasiers aan boord geklim het, maar toe in die Zambezirivier neergestort en alle insittendes is noodlottig beseer.Daarvolgens het die vlieënier ná opstyging vroeg links gedraai en die vliegtuig het skerp gekantel en na links weggedraai. Dit het daarna verder na links gerol.“Die linkervlerk het 90 grade afwaarts gewys en het ’n boom langs die rivier getref, waarna die vliegtuig in die rivier neergestort het - waar die regtervlerk eers die water getref het, gevolg deur die neus van die vliegtuig.”Volgens die verslag het die impak veroorsaak dat die enjin en skroef uit die romp losgebreek het.Die vliegtuig het in &#039;n regop posisie tot stilstand gekom, met die stertgedeelte wat uit die water gesteek het.Dit was baie moeilik om by die ongelukstoneel uit te kom weens die lekkende brandstof en plantegroei in die gebied, en omdat daar geen boot beskikbaar was nie.Die reddingspan kon uiteindelik ’n boot leen by &#039;n ooggetuie wat naby die ongelukstoneel gebly het.Luidens die verslag het die reddingspan ’n gat bo-op die vliegtuig tussen die vlerke gesny om toegang tot die kajuit te verkry.Alle insittendes was vasgegord in hul veiligheidsharnasse, maar is noodlottig beseer.Daar is bevind dat die vliegtuig vanaf Impalila-eiland opgestyg het met 75 pond (sowat 34 kg) meer as die vliegtuig se maksimum opstyggewig, wat 3 800 pond was.Verdere bevindinge toon dat die vlieënier &#039;n geldige kommersiële vlieënierslisensie gehad het asook &#039;n geldige mediese sertifikaat tot September 2022. Die vlieënier het altesaam 310 ure gevlieg - 82 ure op die soort vliegtuig wat op Impalila neergestort het.“Die ontleding van die bevindinge van die ondersoek en die landingsmaneuver wat die vlieënier tydens die landingsfase gemaak het, wys dat die vlieënier gesukkel het om by die landingstrook te land. Die bewyse wat tydens die ondersoek verkry is, toon dit was weens &#039;n gebrek aan ervaring, die feit dat sy nie vooraf op hoogte gebring is van sake nie en die feit dat sy nie met die landingstrook vertroud was nie.”Die vliegtuig is beskikbaar gestel met &#039;n sertifikaat van lugwaardigheid wat op 16 Februarie vanjaar verval het. Dit was lugwaardig, sonder enige foute wat voor die ongeluk aangemeld is.Die verslag het verder gesê data wat ingesamel is, het tot die gevolgtrekking gelei dat die vliegtuig tot stilstand gekom en neergestort het.republikein@republikein.com.na

Vliegtuig te swaar in Impalila-ongeluk

Kommentaar

Republikein 2024-11-25

Meld asseblief aan om kommentaar te lewer

Vliegtuig te swaar in Impalila-ongeluk

Kommentaar

Republikein 2024-11-25

Meld asseblief aan om kommentaar te lewer

MELD AAN

Advertensie