‘Eerste minister moet antwoorde verskaf’

Okahandja se nedersetting-inwoners beplan weer ’n betoging in Windhoek vir beter lewensomstandighede, dienslewering en die ontwikkeling van hul woonbuurte.

Dié keer is die optog na die kantoor van die eerste minister, me. Saara Kuugongelwa-Amadhila.

Die gemeenskapsaktivis, mnr. Sethy Gariseb, het bewyse van hul betaling van N$450 vir begeleiding deur die Namibiese polisie. Sy kopie van die brief na die eerste minister se kantoor is ook gestempel dat dit in ontvangs geneem is.

Die protesoptog sal op Vrydag 21 Oktober plaasvind. Die groep sal vanaf die Riverside-vulstasie deur die middestad na die parlementsgeboue stap.

“Die onwettige gemeenskap van Okahandja, naamlik die Vergenoeg-gemeenskap en al die ander onwettige en naamlose gemeenskappe, wil hiermee u kantoor in kennis stel van ons beplande optog op 21 Oktober 2022. Die doel van hierdie optog is om ’n klagskrif persoonlik aan die kantoor van die eerste minister van die Republiek van Namibië te oorhandig. Die verwagte opkoms is tussen 150 en 200 betogers,” luidens die brief.

In Julie het Gariseb saam met ’n groep per bus na die hoofstad gereis en na die kantoor van die minister van stedelike en landelike ontwikkeling, mnr. Erastus Uutoni, opgeruk.

Bejaardes en kinders in die groep het voor Uutoni gekniel toe hy by die ministerie se hoofkantoor uitgestap het. Die 17-jarige Emily Malwena het hul pleidooie voorgelees.

“Om onwettig genoem te word, is nie wat ons wil hê of nodig het nie, maar ons omstandighede dwing ons om die lewe te leef waarin ons nou is.”

Die inwoners van Okahandja se nedersettings soek onder meer eienaarskap van die grond waarop hulle woon, die voorsiening van rioolgeriewe en toegang tot elektrisiteit.

Uutoni se beloftes dat die Okahandja-dorpsraad sal ingryp, het nog nie vrugte afgewerp nie.

“Verlede week Woensdag het die kantoor van die uitvoerende hoof my gebel. Toe ek daar kom, het hulle gesê hulle het nog niks ontvang nie. Dit ten spyte daarvan dat die minister gesê het hy sou lank al die klagskrif deurgestuur het, wat daarop wys hy is ook nie ernstig nie,” sê Gariseb.

Hy sê die minister, die Okahandja-dorpsraad en munisipaliteit het die inwoners in die steek gelaat, en dat die eerste minister antwoorde moet verskaf.

“Hierdie keer gaan ons nie sonder ’n antwoord terug nie,” dring hy aan.

Uutoni sê egter hy was verlede Maandag op Okahandja en dat die dorp se munisipaliteit dienste moet lewer, maar dat inwoners beter ingelig moet word.

“Ek sê hulle moet met die gemeenskappe vergader en dinge verduidelik. Dit is die gebrek aan inligting wat die gemeenskap so frustreer,” sê hy.

Okahandja se burgemeester, mnr. Issascar Katuuo, sê die dorp se leierskap het met Garisb ontmoet, maar dat die gemeenskapsaktivis nie die nodige prosesse wil verstaan nie.

Volgens hom vorder samewerking met studente van die Namibië Universiteit van Wetenskap en Tegnologie (Nust) wat vrywilliglik huise in die nedersettings tel en ʼn databasis opbou.

Verder is nuwe aansoeke ingedien om Okahandja se nedersettings in die Staatskoerant te publiseer en te proklameer, nadat vorige aansoeke verstryk het.

Katuuo sê die dorp se ontwikkelingsbegroting vir die huidige boekjaar is van N$8 miljoen na net N$1,8 miljoen verminder terwyl ʼn gebrek aan wetlike ooreenkomste invordering van skuld verder belemmer.

“Ons probeer, ons slaap nie, maar die mense wil nie wag nie,” sê hy. “Om Windhoek toe te gaan, om na die minister te gaan, of na die eerste minister, of selfs na die president, sal nie Okahandja se probleme oplos nie. Dit is alleenlik deur Okahandja se eie mense dat oplossings gevind sal word,” sê hy.

– [email protected]