Geen motors, geen CO2-vrystellings

“Met die toename van klimaatsverandering en kommer oor lugbesoedeling, bied elektriese voertuie wêreldwyd ’n volhoubare alternatief vir tradisionele brandstofaangedrewe motors.

“Herlaaibare batterye dryf hierdie voertuie aan en skep geen uitlaatgasse nie, wat dit ’n meer omgewingsvriendelike keuse vir bestuurders maak.”

So het dr. Cedric Limbo, die direkteur vir vervoerbeleid en regulasies in die ministerie van werke en vervoer, Maandag tydens die amptelike opening van die Windhoek-munisipaliteit se netto nul-vrystellingsweek gesê.

Hy het ook gesê dat elektriese voertuie mense se denke oor vervoer verander.

Die munisipaliteit het die geleentheid ook gevier met ’n uitstalling van elektriese voertuie en ander vervoer wat ’n minder negatiewe impak op die omgewing het.

Limbo het erken dat die ondersteunende infrastruktuur vir elektriese voertuie steeds ontbreek, en noem die verskaffing van herlaaistasies en ander nodige infrastruktuur “ongekende waters wat nog gekarteer en volledig ondersoek moet word”.

Nietemin bevorder die regering ’n beleid rakende vervoer wat vra vir die beskerming van die omgewing en reaksie op die uitdagings van klimaatsverandering, die handhawing van internasionale omgewingskonvensies en die vermindering van uitlaatgasse om dorpe te skep waar mense kan woon.

“Die vervoersektor dra aansienlik by tot die vrystelling van koolstofdioksied, as gevolg van lang afstande wat afgelê word om goedere en dienste binne die land te lewer.

“Om die agteruitgang van luggehalte te versag, word vinnig ’n beduidende uitdaging. Dit is omdat eienaarskap van voertuie, veral in stedelike gebiede, vinnig toeneem.

“Mense besit meer voertuie as wat hulle nodig het,” sê hy.

Limbo haal die vervoerbeleid van 2018 aan, wat vra vir die gebruik van meer niegemotoriseerde vervoer, die gebruik van voertuie wat minder uitlaatgasse vrystel, en die toepassing van voertuigontwerpe wat minder uitlaatgasse vrystel, veral ten opsigte van openbare vervoer soos busse en taxi's.

Ook aan die woord was die burgemeester van Windhoek, Queen Kamati.

“Dié week merk nie net ons verbintenis tot die bekamping van klimaatsverandering nie, maar vier ook die kragtige impak wat klein, individuele optredes kan hê om ons omgewing te bewaar,” sê sy.

Kamati het die kwesbaarheid van die hoofstad vir klimaatsverandering beklemtoon.

“Windhoek maak baie staat op reënval en damme vir water, wat dit veral vatbaar maak vir die impak van droër toestande en onvoorspelbare reënvalpatrone,” sê sy.

Tans het die hoofstad beperkings ingestel op die hoeveelheid water wat in Windhoek gebruik mag word, met boetes in plek vir diegene wat te veel water mors.

Verder gaan die netto nul-vrystellingsweek hand aan hand met mobiliteitsweek, “wat ’n wêreldwye veldtog vanaf 16 tot 21 September is om die gebruik van aktiewe mobiliteit, openbare vervoer en skoon vervoeroplossings aan te moedig,” sê sy.

Volgens haar sal die week Saterdag ’n hoogtepunt bereik, wanneer die hoofstad op 21 September ’n dag sonder motors sal vier.

Dit sal motorvrye gebiede behels, waar Windhoekers eerder sal moet stap, fietsry of openbare vervoer moet gebruik en minder van motors afhanklik moet wees.

Gedurende die week sal universiteitstudent met idees na vore kom om die uitleg van die stad meer toeganklik vir voetgangers te maak, die geleentheid om vandag fiets te ry werk toe, en ’n korporatiewe vasvra-geleentheid insluit, sê sy.

– [email protected]