Grenspos by Oranjemund ná bykans 2 jaar weer oop

Die grensposte aan weerskante van die Oppenheimer-brug oor die Oranjerivier by Oranjemund en Alexanderbaai, is van vandag af weer oop. Dit is die eerste van die kleiner landsgrense tussen Namibië en Suid-Afrika wat heropen. Met die uitsondering van die grensposte by Ariamsvlei en Noordoewer, was nie een van die ander landsgrensposte sedert die afkondiging van die streng Covid-19-inperkingsmaatreëls in Maart 2020, in gebruik nie.

Beamptes van beide lande se immigrasie- en gesondheidsowerhede asook die streeksleiers was teenwoordig.

Monique Adams, Republikein se korrespondent wat die geleentheid bygewoon het, sê groot opgewondheid heers op Oranjemund. Dit bied verkorte toegang vir die oorgrens beweging van mense, goedere en dienste tussen Suid-Afrika en dié suidwestelike deel van Namibië.