Groeipyne beperk Lüderitz-uitbreiding

Lüderitz, met ’n geskatte bevolking van 30 000 inwoners, ervaar ’n invloei van mense en besighede wat “menslike kapitaal bring en ’n welkome hupstoot vir die dorp is.” Dit volgens die dorpsraad se woordvoerder, Elwin !Gaoseb.

“Ons verwag meer mense en besighede om na die dorp te stroom na die onlangse ontdekkings,” het hy bygevoeg.

“Ons verwagting is dat inwonersgetalle sal verdriedubbel, as mens kyk na die Kudu-gas, Hyphen (groenwaterstof), die olieontdekkings en die ondersteuningsdienste vir hierdie bedrywe,” brei hy uit.

!Gaoseb erken daar is reeds onvoldoende behuising vir die huidige inwoners van die dorp, en hoewel die omvang van die tekort aan erwe nog nie spesifiek bepaal is nie, beraam die dorpsraad ʼn bykomende 2 600 erwe sal verligting bied. Daarvoor is grond egter nodig.

Bronne in die dorp se bestuur, sê Lüderitz is prakties ingehok deur nasionale natuurreserwes, beperkte diamantmyngebiede, die Atlantiese Oseaan en die Sperrgebiet-diamantmyn.

“Dit is ons grootste kopseer,” het die bron uitgebrei en sê onderhandelinge vir bykomende grond is dus ingewikkeld.

!Gaoseb sê die grond wat vir uitbreiding en vir ’n tweede middedorp geïdentifiseer is, is sowat 25 km oos van die bestaande dorp geleë.

Die grond behoort aan die regering, spesifiek die ministerie van myne en energie en die ministerie van die omgewing, bosbou en toerisme, en ook aan die mynbouer Sperrgebeit Diamond Mining.

“Die uitbreiding van die dorpsgebied word in fases beplan, waarvan die Sperrgebiet Diamond Mining oor fase 1 ingestem het, onderhewig aan ons nakoming van die maatskappy se bepalings en voorwaardes.

“Die raad het in 2021 met verbintenisse begin, waar daar ’n ooreenkoms bereik is vir Sperrgebiet Diamond Mining om sy mynregte in die gebied prys te gee. Die raad sal beraadslaag oor die bepalings en voorwaardes, soos uiteengesit deur Sperrgebiet Diamond Mining, voor ’n aankondiging oor die ooreenkoms gemaak sal word,” het hy gesê.

Volgens die bron sien dié maatskappy egter ’n geleentheid om wins uit die grond – waarop hulle sukkel om mynbedrywighede weer op die been te bring – te maak.

Sperrgebiet Diamond Mining besit vier diamantlisensiegebiede suid, oos en ook noord van Lüderitz. Die maatskappy is verlede jaar aan die Zimbabwiese groep Global Emerging Markets (GEM) verkoop.

Ná die transaksie op 20 Mei 2022 afgehandel is, besit GEM 78% van Sperrgebiet Diamond Mining se aandele, Lewcor Holdings en sy minderheidsaandeelhouer David Sheehama 22%, en ’n werknemerstrust 2%.

Ná vele pogings kon Sperrgebiet Diamond Mining nie vir kommentaar bereik word nie.

Die dorpsraad skat sowat 4 000 hektaar sal benodig word vir die dorp se uitbreiding. Die raad hoop om in die eerste fase ’n bykomende 1 405 erwe te kry, en om verder nog 1 200 erwe te ontwikkel.

“Die raad word oorval met die behoefte om grond aan swaar tot ligte nywerhede en vir residensiële gebruik, te voorsien, insluitend die behoefte aan meer skole. Die behoefte aan woongebiede is hoog in aanvraag; met die oog op die konstruksie van hoë geboue,” brei !Gaoseb uit.

Duitsland het ook onlangs bekendgemaak dat dié land tot N$100 miljoen vir Lüderitz se uitbreiding beskikbaar sal stel. Die munisipale bron sê egter dié geld sal waarskynlik vir beplanning, konsultasies en grondontwikkeling gebruik word, eerder as vir die aankoop van grond.

!Gaoseb sê die dorpsraad se volgende stap is om die betrokke belanghebbers te betrek om fase een van die dorpsuitbreiding te voltooi, en dit teen November 2023 te laat afteken, met die voorgestelde fase twee wat vir middel 2024 vir konsultasies beplan word.

– [email protected]