Hentiesbaai beëindig RedForce se kontrak

RedForce Debt Management betwis die Hentiesbaai-munisipaliteit se besluit om sy kontrak te beëindig. Dié skuldinvorderaar meen die munisipaliteit oortree die oorgangsklousule (wind-down period clause) in die getekende kontrak.Die waarnemende uitvoerende hoof, Ignasia Neis, het Woensdag bevestig die kontrak het op 17 Januarie verstryk, maar is tot 31 Januarie verleng vir die oorhandiging van stelsels en sagteware.Neis het verlede maand in ’n amptelike brief bevestig dat RedForce nie meer enige skuldinvordering namens die munisipaliteit sal behartig nie. Alle toegang tot munisipale stelsels is opgeskort en geen verdere inligting sal glo met RedForce gedeel word nie.Die munisipaliteit het opdrag gegee dat inwoners en besighede nie met RedForce moet saamwerk ten opsigte van uitstaande munisipale rekeninge nie.RedForce het egter in ’n brief gedateer 5 Februarie die beëindiging van sy kontrak met die Hentiesbaai-munisipaliteit betwis met verwysing na ’n klousule dat die maatskappy by die verstryking van die kontrak geregtig is om skuldinvorderingsdienste op ’n nie-eksklusiewe basis voort te sit vir tot twaalf (12) maande as deel van ’n oorgangsperiode.In die regsbrief wat aan Neis gerig is, het RedForce se prokureurs ’n onmiddellike terugtrekking van die kennisgewing geëis en gedreig met dringende regstappe indien die munisipaliteit nie binne 24 uur daaraan gehoor gee nie. Hulle het die munisipaliteit ook daarvan beskuldig dat hulle in slegte trou opgetree het deur ’n “vals en bedrieglike narratief” te skep oor RedForce se kontraktuele status.RedForce het ook dringende toegang tot die finale ouderdomsontleding vir Februarie 2025 en die lêer met uitstaande betalings vir Januarie 2025 versoek, met verwysing na die behoefte om hul rekords by te werk in ooreenstemming met die bestaande kontraktuele raamwerk. Die maatskappy voer verder aan dat die munisipaliteit ondanks talle opvolgings nog nie betaal het vir dienste wat in November en Desember 2024 gelewer is nie. Die regskorrespondensie eis ’n opdatering oor die rede vir die vertraagde betaling en ’n verwagte tydlyn vir betaling.HOFGESKILIn November verlede jaar het die hoërhof in Windhoek die munisipaliteit tydelik verbied om die kontrak te beëindig. RedForce het die hof genader met ’n dringende aansoek nadat die munisipaliteit sy kontrak in September 2024 beëindig het. Die munisipaliteit het ses redes vir die beëindiging van die kontrak aan RedForce verskaf en een van die redes was dat RedForce na bewering onderpresteer het in sy skuldinvordering.RedForce het dié bewerings ontken en aangevoer dat hy sedert Februarie 2022 sowat N$43 miljoen suksesvol vir die munisipaliteit ingevorder het en geen klagtes voorheen in dié verband ontvang het nie.RedForce het in hofstukke aangevoer die beëindiging van die kontrak was “onverwags” en het die maatskappy onkant gevang.RedForce het ook in die hof beweer dat hy nie geleentheid gegun is om sy saak te stel voor die besluit geneem is nie. Die munisipaliteit het ’n teeneis gebring waarin hy die geldigheid en wettigheid van die kontrak onder die loep gebring het. Die munisipaliteit het aangevoer dat die kontrak buite die aangewese tydperk van 30 dae onderteken is en dus nie geldig was nie.Waarnemende regter George Coleman het beslis dat beide partye langer as twee jaar by die kontrak gehou het sonder om kommer oor die wettigheid daarvan te opper.“Die ooreenkoms is al langer as twee jaar sonder besware van krag. Dit sal onredelik wees om nou skielik die geldigheid daarvan te betwis,” het Coleman beslis.Hy het ook beklemtoon dat die kontrak spesifieke prosedures uiteengesit het vir die beëindiging daarvan en geskilbeslegting, insluitend arbitrasie, wat die munisipaliteit glo nie gevolg het nie. Hy het dus die bevel uitgereik wat die munisipaliteit tydelik verbied het om die kontrak te beëindig en hy het ook die munisipaliteit en sy uitvoerende hoof beveel om RedForce se regskoste vir die aansoek te betaal.ANDER SAKEDié hofsaak was die jongste in ’n reeks hofsake waarby RedForce en verskeie munisipaliteite betrokke was. In April 2024 het die hoërhof in Windhoek die Walvisbaai-munisipaliteit se besluit om sy kontrak met RedForce te kanselleer, tersyde gestel en beslis dat die besluit ongeregverdig was.RedForce het aangevoer dat hy sy kontraktuele verpligtinge nagekom het en beweer die beëindiging was polities gemotiveerd, beïnvloed deur munisipale wanbetalers.In November 2020 het die hoërhof ook beveel dat Rundu se dorpsraad RedForce weer moet aanstel nadat die minister van landelike en stedelike ontwikkeling, Erastus Uutoni, opdrag gegee he dat dié kontrak beëindiging moet word ná openbare onrus.BEWEERDE KORRUPSIE Buite vir die talle hofsake waarby RedForce betrokke is, het ’n aktivis van Windhoek, Shaun Gariseb, en ander aktiviste van Gobabis en Okahandja, verlede maand ’n klagskrif in Windhoek aan die Teenkorrupsiekommissie van Namibië (ACC) oorhandig. Die optoggangers het optrede geëis teen die korrupsie wat glo veral in plaaslike owerhede voorkom. Die klagskrif eis klaring oor langdurige klagtes van korrupsie en wanbestuur. Dit sluit ook navrae in oor klagtes met betrekking tot RedForce se aanstelling en hernuwing van hul kontrak in sommige dorpe. – republikein@republikein.com.na

Hentiesbaai beëindig RedForce se kontrak

Kommentaar

Republikein 2025-04-02

Meld asseblief aan om kommentaar te lewer

Hentiesbaai beëindig RedForce se kontrak

Kommentaar

Republikein 2025-04-02

Meld asseblief aan om kommentaar te lewer

MELD AAN

Advertensie