Hoofstad geprys vir diensbillikheid
Tydens ’n raadsvergadering vroeër vandeesweek het Windhoek se burgemeester, Queen Kamati, onder meer ’n A-gradering vir die voldoening aan diensbillikheid aangekondig.
Die kommissie vir diensbillikheid het die gradering aan Stad Windhoek (CoW) toegeken vir sy regstellende aksie-program gedurende die 2023-’24-oorsigtydperk.
Volgens Kamati het die stadsraad 95,56% behaal, wat sy verbintenis tot die skep van ’n regverdige en inklusiewe werkplek ten toon stel wat historiese ongelykhede takel.
Die kommissie se beoordeling het die raad se algehele vordering geprys, maar het kennis geneem van die behoefte aan verdere verbetering in die indiensneming van persone met gestremdhede.
In reaksie hierop ontwikkel die raad se departement van menslike kapitaal en korporatiewe dienste glo nou doelgerigte strategieë om die deelname van mense met gestremdhede in die arbeidsmag te verbeter.
“Hierdie A-gradering beklemtoon die munisipale raad se toewyding aan diversiteit en inklusiwiteit om te verseker dat onderverteenwoordigde groepe, insluitend vroue, rasseminderhede en mense met gestremdhede, billike geleenthede gebied word.
“Die erkenning weerspieël ook Windhoek se langtermynstrategie om ’n bekwame, uiteenlopende en gemotiveerde arbeidsmag te bou wat in ooreenstemming is met die stad se breër ontwikkelingsdoelwitte,” lui ’n verklaring wat CoW uitgereik het.
VENNOOTSKAPPE
CoW het bygevoeg dat die munisipaliteit hoop om samewerkingsooreenkomste met verskeie plaaslike owerhede oraloor Namibië te hernu.
“Hierdie ooreenkomste, wat gewoonlik vyf jaar duur, help om verhoudings tussen verskillende rade te versterk en bevorder samewerking in sleutelsektore, soos ekonomiese ontwikkeling, afvalbestuur, gesondheidsdienste en openbare veiligheid.
“Verskeie ooreenkomste met rade, insluitend die Outjo-munisipaliteit, die Otjinene-nedersettingsraad, en Aranos, Otavi en Opuwo se dorpsrade, het verstryk en samesprekings is aan die gang om dit te verleng.
“Boonop het Windhoek versoeke vir nuwe samewerkingsooreenkomste van plaaslike owerhede ontvang, insluitend die Omaruru-munisipaliteit en Bethanie, Aroab en Kalkrand se nedersettingsrade,” het die verklaring verder bygevoeg.
Die hernude en nuwe ooreenkomste het ten doel om dienslewering te verbeter, volhoubare ontwikkeling asook die deel van kennis op verskeie gebiede soos stadsbeplanning en grondbestuur, te bevorder.
– [email protected]
Die kommissie vir diensbillikheid het die gradering aan Stad Windhoek (CoW) toegeken vir sy regstellende aksie-program gedurende die 2023-’24-oorsigtydperk.
Volgens Kamati het die stadsraad 95,56% behaal, wat sy verbintenis tot die skep van ’n regverdige en inklusiewe werkplek ten toon stel wat historiese ongelykhede takel.
Die kommissie se beoordeling het die raad se algehele vordering geprys, maar het kennis geneem van die behoefte aan verdere verbetering in die indiensneming van persone met gestremdhede.
In reaksie hierop ontwikkel die raad se departement van menslike kapitaal en korporatiewe dienste glo nou doelgerigte strategieë om die deelname van mense met gestremdhede in die arbeidsmag te verbeter.
“Hierdie A-gradering beklemtoon die munisipale raad se toewyding aan diversiteit en inklusiwiteit om te verseker dat onderverteenwoordigde groepe, insluitend vroue, rasseminderhede en mense met gestremdhede, billike geleenthede gebied word.
“Die erkenning weerspieël ook Windhoek se langtermynstrategie om ’n bekwame, uiteenlopende en gemotiveerde arbeidsmag te bou wat in ooreenstemming is met die stad se breër ontwikkelingsdoelwitte,” lui ’n verklaring wat CoW uitgereik het.
VENNOOTSKAPPE
CoW het bygevoeg dat die munisipaliteit hoop om samewerkingsooreenkomste met verskeie plaaslike owerhede oraloor Namibië te hernu.
“Hierdie ooreenkomste, wat gewoonlik vyf jaar duur, help om verhoudings tussen verskillende rade te versterk en bevorder samewerking in sleutelsektore, soos ekonomiese ontwikkeling, afvalbestuur, gesondheidsdienste en openbare veiligheid.
“Verskeie ooreenkomste met rade, insluitend die Outjo-munisipaliteit, die Otjinene-nedersettingsraad, en Aranos, Otavi en Opuwo se dorpsrade, het verstryk en samesprekings is aan die gang om dit te verleng.
“Boonop het Windhoek versoeke vir nuwe samewerkingsooreenkomste van plaaslike owerhede ontvang, insluitend die Omaruru-munisipaliteit en Bethanie, Aroab en Kalkrand se nedersettingsrade,” het die verklaring verder bygevoeg.
Die hernude en nuwe ooreenkomste het ten doel om dienslewering te verbeter, volhoubare ontwikkeling asook die deel van kennis op verskeie gebiede soos stadsbeplanning en grondbestuur, te bevorder.
– [email protected]
Kommentaar
Republikein
Geen kommentaar is op hierdie artikel gelaat nie