Matyayi kap terug na ECB

Ogone Tlhage – Die uitvoerende hoof van Stad Windhoek (CoW), Moses Matyayi, het na die Elektrisiteitsbeheerraad (ECB) teruggekap oor sy “onrealistiese” planne om ’n sentrale streekkragverspreider (RED) te vestig.

Hy het die opmerkings gemaak in reaksie op Robert Kahimise, die uitvoerende hoof van die ECB, se bewerings dat die Stad – oor die langtermyn – nie in staat sal wees om elektrisiteit doeltreffend aan sy inwoners te verskaf nie, en dat hy nie bereid is om landelike gemeenskappe binne die groter Khomasstreek te subsidieer nie.

“Die ECB se assessering van die Stad se toekomstige vermoë om krag te verskaf, is betreurenswaardig, en ewe misleidend en onprofessioneel. Na my mening is dit ’n lae hou, om die minste te sê.

“Ons verwag eerder om ondersteun te word in hoe ons die beste vir die toekoms kan beplan met die hulpbronne tot ons beskikking, en hoe om dit volhoubaar te bestuur,” het Matyayi gesê.

Die ECB doen verder afstand van sy mandaat om elektrisiteit te reguleer, en is besig om homself uitermatig die rol van ’n voorstander van hervorming wederregtelik toe te eien, het hy gesê.

“Dit is dan duidelik dat hulle reeds kant gekies het en hulle is nou tegelykertyd ’n speler en ’n skeidsregter,” het Matyayi verder gesê.

“Die munisipaliteit het sy standpunt aan die minister van myne en energie deurgegee dat die hervorming van die elektrisiteitsverspreidingsbedryf (EDI) onherstelbare skade aan die politieke, maatskaplike en ekonomiese aspek van ons besigheid as plaaslike owerheid sal aanrig,” het hy bygevoeg.

GEEN UITDAGINGS

Die CoW is die grootste kragverspreider, en dit is die rede waarom talle rolspelers in die EDI beheer oor sy mandaat wil hê, het Matyayi gesê.

Hy het verder Kahimise se siening verwerp dat die munisipaliteit waarskynlik probleme sou ondervind rakende sy verpligting om elektrisiteit aan sy kliënte te verskaf.

“Die CoW het geen uitdagings gehad nie, en ons het ook nie probleme met die bestuur van ons elektrisiteitsafdeling as deel van ons kernmandaat nie. Die munisipaliteit het die vermoë om voort te gaan om elektrisiteit vir die volgende 50 jaar te verskaf sonder EDI-hervorming. Ek is nie seker waar hul inligting vandaan kom nie, maar dit mislei die publiek,” het hy gesê.

“Ons skuld niks aan NamPower nie. Ons bestuur, sonder enige twyfel, ons elektrisiteit doeltreffend. Hoekom moet ons nou in twyfel getrek word, eerder as om ondersteuning te ontvang om hierdie goed bestuurde hulpbron te laat groei?”

Matyayi het bygevoeg dat RED’s min tot geen doel in die energie-ekosisteem gedien het nie, en plaaslike owerhede van inkomstegeleenthede weerhou het.

“Dit is waar dat die RED-model kannibalisties is en ’n volgehoue poging is om die plaaslike owerheidsektor af te breek en dit ondoeltreffend te maak. Dus is en sal ons nie deel wees van sulke bevooroordeelde oplossings nie,” het Matyayi opgemerk.

“’n Sentrale RED was met sy aankoms reeds dood en sal ’n dooie perd bly omdat ons verstaan dat dit maklik die land se ekonomie kan lamlê. Nasionale veiligheidskwessies is aan ’n RED-model vir die Stad, of EDI-hervorming gekoppel,’ het Matyayi gesê.

“Die huidige RED-model maak nie voorsiening vir aandeelhouers om waarde te maksimaliseer nie. RED’s het nog nooit enige dividend aan plaaslike owerhede betaal as aandeelhouerswaarde of opbrengs op beleggings (bates) nie.

“Ons kan nie net aandele in ’n maatskappy hou wat nooit die gewenste opbrengs lewer nie,” het hy bygevoeg.

Matyayi het belowe om nie die CoW aan enige RED te verbind nie, en noem dit ’n mislukte strategie.

“As ’n stad kan ons nie blindelings die mislukte strategie onderskryf sonder om eerlike introspeksie te doen oor die lesse wat geleer is en hoe om dit optimaal te verbeter om ’n bemagtigende omgewing vir alle rolspelers te vestig nie.”

– [email protected]