Omaruru se inwoners keelvol vir munisipaliteit
Sê burgemeester moet trekpas kry
Inwoners van Omaruru het onlangs hul ontevredenheid oor dié munisipaliteit se hantering van verskeie brandende kwessies uitgespreek.
Die inwoners van Omaruru het onlangs die dorp se munisipale leiers en personeel van “voortgesette wanbestuur weens onbevoegdheid en selfverryking” beskuldig in ’n klagskrif wat tydens ‘n vreedsame betoging aan die burgemeester oorhandig is.
In die klagskrif wat aan die burgemeester, mnr. Vincent Kahua, gerig is, beskuldig inwoners hom daarvan dat hy die dorp se geld verkwis en onwelvoeglik in die openbaar optree.
“Kahua hou aan om leë beloftes te maak. Hy is meer op die pad en buite kantoor as wat hy in die kantoor is. Hy sien nie die ondergang van Omaruru raak nie en verhoed dit nie, maar beweer daar is nie geld vir instandhouding en noodsaaklike herstelwerk nie. Hy moet as burgemeester en raadslid verwyder word en nooit toegelaat word om terug te keer nie.
“Josef Haipinge, die waarnemende uitvoerende hoof, is in beheer van munisipale sake en tog het hy nie daarin geslaag om die tegniese afdeling te bestuur nie. Watervoorsiening en rioolbeheer (onder sy direkte bestuur) is ’n brandende kwessie, bates word uitgeput, misbruik en nie in stand gehou nie. Is hierdie die regte persoon om as uitvoerende hoof op te tree? Ons wil nie hê enige van die huidige munisipale personeellede moet die pos van uitvoerende hoof beklee nie.”
Die klagskrif eis verder dat mnr. Ernest Wetha as streekraadslid verwyder moet word nadat hy die kragverskaffer Erongo RED in die tweede kwartaal van 2021 uit geld verkul het.
“Hy bestry nie armoede of werkloosheid in Omaruru nie – dit is nie die voorbeeld wat ons van die munisipaliteit nodig het vir die gemeenskap of vir ons toekomstige leiers nie.”
Inwoners het die raad verder daarvan beskuldig dat hulle raadsvergaderings nie volgens die Wet op Plaaslike Owerhede se bepalings gehou is nie.
“Slegs twee wettige raadsvergaderings is in 2022 gehou. Dit is weens die onbevoegdheid van die burgemeester, die raadsvoorsitter en sy volgelinge dat hierdie misdrywe ’n eens goed bestuurde munisipaliteit pootjie. Raadslede word betaal om vir raadsvergaderings te reis terwyl maandelikse vergaderings nie gehou word nie,” lui die klagskrif voorts.
TEGNIESE PROBLEME
Die inwoners het verder die rioolkwessie uitgelig, wat volgens hulle ’n gesondheidsgevaar in die dorp word.
“. . . in die hoofweg by die polisiekantoor, by Spar, agter Bank Windhoek, by die nywerheidsgebied agter Erongo RED waar dit deur ’n mensgemaakte rivier oorkant die straat in die bos en in ’n systroom van die Omarururivier weggelei word.
“Sedert November 2018 word klagtes geïgnoreer en die minste moeite word gedoen om dit onder beheer te bring en op te ruim. Vaste afval word nie behoorlik skoongehou nie. Vullishope word nie omhein nie en rommel versprei wanneer dit winderig is.
“Oortreders word nie aanspreeklik gehou wanneer hulle rommel op sypaadjies strooi nie. Munisipale werkers hou hulle blind daarvoor want hulle wil dit nie skoonmaak of die oortreders aankla nie, want dit sal hulle ongewild maak.”
Die klagskrif het ook verwys na die nuwe watermeters wat geïnstalleer is sonder ’n rekenaarstelsel om dit te bestuur.
“Dit is ontoeganklik na kantoorure, ongerieflik en nie gebruikersvriendelik nie, duur en word vanuit Windhoek bestuur. Gebruikers betaal maandelikse tariewe op die watermeterstelsel sonder om waarde vir hul geld te kry, byvoorbeeld om minder water te kry as wat verwag is. Dit het daartoe gelei dat ’n boekhoustelsel wat nie deur die munisipaliteit bestuur word nie, ingebring moes word aangesien die mense wat vir die werk aangestel is nie bevoegd daarvoor was nie.”
VERBREEKTE BELOFTES
Die inwoners het ook daarop gewys dat meer as vyf jaar se beloftes om Uitbreiding 7 en 8 te diens, nie nagekom is nie.
“Daar is geen straatligte, geen toilette, geen rioolstelsel en geen water nie en geen optrede is geneem nie. Die burgemeester het op 30 Mei belowe Amabokke sal vanaf twee weke ná daardie vergadering geëlektrifiseer word – niks het sedertdien gebeur nie.
“Daar is ook brandende kwessies wat in November met die goewerneur bespreek is en waaroor daar steeds geen terugvoering aan die inwoners gegee is nie. Titelaktes aan betaalde erwe is nog nie uitgereik nie, wat inwoners verhinder om hul krag te laat koppel. Die burgemeester het op die vergadering van 12 Maart belowe hy sal sertifikate laat uitstuur – niks het gebeur nie.”
’n Lid van die Inwonersvereniging van Omaruru se sekretariaat, mnr. Johan Nel, het gesê die lys van klagtes is verleng en by die munisipale kennisgewingbord opgehang sodat almal dit kan sien.
Die adjunkminister van stedelike en landelike ontwikkeling, me. Natalia !Goagoses, het Omaruru op 3 Junie besoek nadat die Inwonersvereniging gekla het oor sake wat in die klagtelys uiteengesit is.
Die adjunkminister het die munisipaliteit drie maande, wat 3 September sal eindig, gegee om die kwessies reg te stel.
“Ons sien egter geen volhoubare pogings met enigiets wat van hul kant af gebeur nie. Die Inwonersvereniging het die adjunkminister Maandag ingelig dat dit die geval is en ook ’n brief aan die burgemeester oorhandig waarin verduidelik word dat Omaruru keelvol is. As die bestuur teen 3 September nie na wense is nie, sal daar chaos wees,” het Nel gesê.
– [email protected]
In die klagskrif wat aan die burgemeester, mnr. Vincent Kahua, gerig is, beskuldig inwoners hom daarvan dat hy die dorp se geld verkwis en onwelvoeglik in die openbaar optree.
“Kahua hou aan om leë beloftes te maak. Hy is meer op die pad en buite kantoor as wat hy in die kantoor is. Hy sien nie die ondergang van Omaruru raak nie en verhoed dit nie, maar beweer daar is nie geld vir instandhouding en noodsaaklike herstelwerk nie. Hy moet as burgemeester en raadslid verwyder word en nooit toegelaat word om terug te keer nie.
“Josef Haipinge, die waarnemende uitvoerende hoof, is in beheer van munisipale sake en tog het hy nie daarin geslaag om die tegniese afdeling te bestuur nie. Watervoorsiening en rioolbeheer (onder sy direkte bestuur) is ’n brandende kwessie, bates word uitgeput, misbruik en nie in stand gehou nie. Is hierdie die regte persoon om as uitvoerende hoof op te tree? Ons wil nie hê enige van die huidige munisipale personeellede moet die pos van uitvoerende hoof beklee nie.”
Die klagskrif eis verder dat mnr. Ernest Wetha as streekraadslid verwyder moet word nadat hy die kragverskaffer Erongo RED in die tweede kwartaal van 2021 uit geld verkul het.
“Hy bestry nie armoede of werkloosheid in Omaruru nie – dit is nie die voorbeeld wat ons van die munisipaliteit nodig het vir die gemeenskap of vir ons toekomstige leiers nie.”
Inwoners het die raad verder daarvan beskuldig dat hulle raadsvergaderings nie volgens die Wet op Plaaslike Owerhede se bepalings gehou is nie.
“Slegs twee wettige raadsvergaderings is in 2022 gehou. Dit is weens die onbevoegdheid van die burgemeester, die raadsvoorsitter en sy volgelinge dat hierdie misdrywe ’n eens goed bestuurde munisipaliteit pootjie. Raadslede word betaal om vir raadsvergaderings te reis terwyl maandelikse vergaderings nie gehou word nie,” lui die klagskrif voorts.
TEGNIESE PROBLEME
Die inwoners het verder die rioolkwessie uitgelig, wat volgens hulle ’n gesondheidsgevaar in die dorp word.
“. . . in die hoofweg by die polisiekantoor, by Spar, agter Bank Windhoek, by die nywerheidsgebied agter Erongo RED waar dit deur ’n mensgemaakte rivier oorkant die straat in die bos en in ’n systroom van die Omarururivier weggelei word.
“Sedert November 2018 word klagtes geïgnoreer en die minste moeite word gedoen om dit onder beheer te bring en op te ruim. Vaste afval word nie behoorlik skoongehou nie. Vullishope word nie omhein nie en rommel versprei wanneer dit winderig is.
“Oortreders word nie aanspreeklik gehou wanneer hulle rommel op sypaadjies strooi nie. Munisipale werkers hou hulle blind daarvoor want hulle wil dit nie skoonmaak of die oortreders aankla nie, want dit sal hulle ongewild maak.”
Die klagskrif het ook verwys na die nuwe watermeters wat geïnstalleer is sonder ’n rekenaarstelsel om dit te bestuur.
“Dit is ontoeganklik na kantoorure, ongerieflik en nie gebruikersvriendelik nie, duur en word vanuit Windhoek bestuur. Gebruikers betaal maandelikse tariewe op die watermeterstelsel sonder om waarde vir hul geld te kry, byvoorbeeld om minder water te kry as wat verwag is. Dit het daartoe gelei dat ’n boekhoustelsel wat nie deur die munisipaliteit bestuur word nie, ingebring moes word aangesien die mense wat vir die werk aangestel is nie bevoegd daarvoor was nie.”
VERBREEKTE BELOFTES
Die inwoners het ook daarop gewys dat meer as vyf jaar se beloftes om Uitbreiding 7 en 8 te diens, nie nagekom is nie.
“Daar is geen straatligte, geen toilette, geen rioolstelsel en geen water nie en geen optrede is geneem nie. Die burgemeester het op 30 Mei belowe Amabokke sal vanaf twee weke ná daardie vergadering geëlektrifiseer word – niks het sedertdien gebeur nie.
“Daar is ook brandende kwessies wat in November met die goewerneur bespreek is en waaroor daar steeds geen terugvoering aan die inwoners gegee is nie. Titelaktes aan betaalde erwe is nog nie uitgereik nie, wat inwoners verhinder om hul krag te laat koppel. Die burgemeester het op die vergadering van 12 Maart belowe hy sal sertifikate laat uitstuur – niks het gebeur nie.”
’n Lid van die Inwonersvereniging van Omaruru se sekretariaat, mnr. Johan Nel, het gesê die lys van klagtes is verleng en by die munisipale kennisgewingbord opgehang sodat almal dit kan sien.
Die adjunkminister van stedelike en landelike ontwikkeling, me. Natalia !Goagoses, het Omaruru op 3 Junie besoek nadat die Inwonersvereniging gekla het oor sake wat in die klagtelys uiteengesit is.
Die adjunkminister het die munisipaliteit drie maande, wat 3 September sal eindig, gegee om die kwessies reg te stel.
“Ons sien egter geen volhoubare pogings met enigiets wat van hul kant af gebeur nie. Die Inwonersvereniging het die adjunkminister Maandag ingelig dat dit die geval is en ook ’n brief aan die burgemeester oorhandig waarin verduidelik word dat Omaruru keelvol is. As die bestuur teen 3 September nie na wense is nie, sal daar chaos wees,” het Nel gesê.
– [email protected]
Kommentaar
Republikein
Geen kommentaar is op hierdie artikel gelaat nie