Ontwikkeling van kusdorp se ou swembad sloer steeds

Swakopmund se munisipale raad het in ’n onlangse kennisgewing gesê hy het regsadvies ingewin rakende die kwessie van die ontwikkeling, wat algemeen bekend staan ​​as die ou munisipale swembad.

Die raad sê ook dat dit onder hul aandag gekom het dat die eiendom wat ontwikkel word, aan ander ontwikkelaars te koop aangebied is.

“Die raad het die afgelope paar jaar verskeie vergaderings met die betrokke ontwikkelaars belê en het regsadvies ingewin om die ingewikkeldheid van hierdie spesifieke ontwikkeling te bestuur.

“Ons erken die publiek se kommer en die sensitiwiteit rondom hierdie kwessie,” het die munisipaliteit in die kennisgewing gesê.

Die munisipaliteit het verder gesê die projek is gestaak ingevolge ’n openbare klagskrif en die gemeenskap se verontwaardiging rakende die hoogtebeperkings.

“Die raad verstaan ​​die belangrikheid van hierdie saak vir die gemeenskap en die raad verseker dat dit ewe belangrik en sensitief [vir ons] is,” luidens die kennisgewing.

Die ontwikkeling is vir jare al ’n brandpunt vir talle inwoners, aangesien dit glo die estetika van die omgewing sal versteur.

Nadat die dorp se komitee vir estetika se voorstelle in 2020 deur die munisipale raad verwerp is, is die kwessie na die nasionale erfenisraad verwys aangesien die ontwikkeling in ’n bewaringsgebied beplan word.

“Dit is ontstellende nuus aangesien dit vir baie duidelik is dat hierdie bouvoorstel swak beplan is en nie toegelaat behoort te word nie; en ons sal verwag dat ons munisipaliteit die moed en die integriteit sal hê om sulke aansoeke te weier,” het die Swakopmundse Inwonersvereniging destyds in hul omsendbrief in reaksie op die raad se besluit gesê.

– [email protected]