RedForce moet verwyder word, eis Walvisbaaiers

Die inwoners van Walvisbaai het nog ’n klagskrif aan dié dorp se munisipaliteit oorhandig waarin hulle eis dat RedForce Debt Management CC se dienste onmiddellik beëindig word.RedForce se aanstelling word tans ondersoek nadat talle beweerde teenstrydighede in dié skuldinvorderaar se aanstellingsproses aan die lig gekom het. Elvis Goseb, wat die klagskrif namens die inwoners voorgelees het, het bevestig dat twee klagskrifte aan die raad voorgelê is en dat die raad tot op hede nog nie gereageer het op aangeleenthede wat in dié dokumente geopper is nie.“Ons beskou dit as ’n gebrek aan respek, arrogansie en onbeskofheid. Ons sal nie langer sulke gedrag of houding duld nie.”Die inwoners eis dat die voorsitter van die bestuurskomitee, Richard Hoaeb, besonderhede rondom sy botsing van belange in RedForce in die openbaar verklaar.“By ’n raadsvergadering wat op Dinsdag 7 Mei gehou is, het hy homself tydens besprekings oor RedForce onttrek en gesê die rede is weens ’n moontlike botsing van belange.”Die burgemeester van Walvisbaai, Trevino Forbes, het die klagskrif aanvaar.SKORSINGDie inwoners het ook hul misnoeë uitgespreek dat die geskorste personeellede, Frans !Gonteb, die hoofbestuurder vir finansies, en Johanna Shidute, die kredietbeheerbestuurder, reeds terug by die werk is terwyl die RedForce-ondersoek nog nie afgehandel is nie.“Toe ander personeellede geskors is weens bewerings van die vermiste N$24 miljoen, is hulle eers terug werk toe nadat die ondersoek afgehandel is. Hoekom speel jy dubbele standaarde in die RedForce-saak?”Die inwoners het ook gesê hulle het geen vertroue in drie raadslede van die bestuurskomitee nie, naamlik Richard Hoaeb, Buddy Bramwell en Olivia Andrews.Daarbenewens het die klagskrif die verwydering of skorsing van alle amptenare geëis wat betrokke is by die RedForce-saak tot die ondersoek afgehandel is “om die proses toe te laat om sonder inmenging voort te gaan”.‘VERDAG’Die klagskrif handel ook oor vergaderings om ’n bestuurder as die waarnemende uitvoerende hoof aan te stel.“Hoekom stel jy ’n bestuurder aan as daar senior algemene bestuurders beskikbaar is wat aangestel kan word om as die uitvoerende hoof op te tree? “Beteken dit jy het nie vertroue in jou senior bestuurders nie? Ons glo hierdie besluit is doelbewus geneem om seker te maak dat niemand met die RedForce-ondersoek inmeng nie. “Die aanstelling van ’n bestuurder om as uitvoerende hoof op te tree, is baie verdag.”In die klagskrif eis inwoners dat die besluit teruggetrek moet word om ’n bestuurder as waarnemende uitvoerende hoof aan te stel en vra dat ’n hoofbestuurder as waarnemende uitvoerende hoof moet optree.Die inwoners het weer eens die gebrek aan konsultasie met hulle oor die aanstelling van skuldinvorderaars bevraagteken. “Hoe regverdig jy ’n 12%-kommissieheffing – terwyl inflasie sowat 5% is – op verbruikers wat meestal werkloos is, pensioenarisse en lae-inkomsteverdieners?”Inwoners meen dat die raad sy eie beleid verontagsaam deur RedForce toe te laat om waterlesings te neem, water te ontkoppel en weer aan te sluit en funksies uit te voer wat niks met skuldinvordering verband hou nie. “Terselfdertyd ontvang die aangestelde munisipale meterlesers maandelikse salarisse omdat hulle niks doen nie.”Die inwoners het verder verklaar dat hulle die mosie wat ingedien is om die dienste van RedForce Debt Collectors te beëindig ten volle ondersteun.“Ons is bewus van die nienakoming van die wet op plaaslike owerhede waarin ’n raadsbesluit wat ’n kontrak aangegaan het, nie bestaan nie en dat die proses van die verkrygingswet nie gevolg is nie.”ONWETTIGIn die klagskrif het die inwoners geëis dat RedForce hul “onwettige aktiwiteite” staak. Dit sluit in om ’n perseel sonder toestemming te betree en om watertoevoer as ’n derde party te ontkoppel, asook om lede van die gemeenskap te dreig indien hulle versuim om RedForce se kantoor te besoek oor uitstaande skuld. Hulle meen dit is ook ’n strafregtelike oortreding om watermeters te verwyder.Die inwoners dreig dat indien daar nie aan die klagskrif se eise voldoen word nie, hulle sake teen die personeellede by die Namibiese polisie aanhangig sal maak. “Daar is geen ooreenkoms tussen RedForce en die gemeenskap van Walvisbaai nie, slegs met die munisipaliteit.”Die inwoners het ook daarop aangedring dat die bevindinge van die finale verslag oor die RedForce-ondersoek openbaar gemaak moet word ter wille van deursigtigheid. Die munisipaliteit se regsadviseur, Richard Metcalfe, het by navraag gesê die finale verslag sal teen 31 Julie voltooi wees.Die inwoners het die munisipaliteit 14 dae gegee om aan hul eise te voldoen.– republikein@republikein.com.na

RedForce moet verwyder word, eis Walvisbaaiers

Kommentaar

Republikein 2024-11-22

Meld asseblief aan om kommentaar te lewer

RedForce moet verwyder word, eis Walvisbaaiers

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie