Sooispitseremonie vir mediese sentrum by Karibib

Mediese dienste op Karibib en ­omliggende gebiede gaan verbeter met die konstruksie van ’n nuwe mediese sentrum.



Die sooispitseremonie van die nuwe mediese sentrum ter waarde van sowat N$20 miljoen het gister in die informele nedersetting Usab plaas­gevind. Dit is die grootste enkele korporatiewe maatskaplike belegging van die QKR Navachab-goudmyn.



Die besturende direkteur van die myn, George Botshiwe, het die projek beskryf as “wêreldklas” en sê dit sal nie as ’n private hospitaal funksioneer nie, maar as ’n staatsinstelling wat deur die ministerie van gesondheid en maatskaplike dienste bestuur, beman, toegerus en in stand gehou sal word.



“Hierdie belegging sal verseker dat gehalte-gesondheidsorgdienste diegene bereik wat dit die nodigste het,” het Botshiwe gesê.



BEHOEFTE AAN UITBREIDING



Dr. Kalumbi Shangula, die ­minister van gesondheid, het die behoefte aan die uitbreiding van gesondheids­orginfrastruktuur beklemtoon, met ­verwysing na die groeiende ­bevolking wat gedryf word deur ­ekonomiese ­bedrywighede soos mynbou en ­hawe-ontwikkeling.



“Die bestaande kliniek wat in 2004 ingewy is, het as ’n baken van hoop vir Karibib-inwoners gedien. Demografiese verskuiwings en ­ekonomiese groei het egter die uitbreiding van ­gesondheidsorgdienste in hierdie tyd genoodsaak,” het hy gesê.



Shangula het bygevoeg dat stedelike migrasie, gedryf deur droogte en werksgeleenthede, tot ’n toename in die vraag na mediese sorg gelei het.



“Omdat ons die behoefte erken om uit te brei, belê ons in ’n gesondheid­sentrum wat die kapasiteit om ­openbare gesondheidsorgdienste aan Karibib en omliggende gebiede te verskaf aansienlik sal verbeter.



Hy het beklemtoon openbare gesondheidsinisiatiewe “moet data-­gedrewe wees vir doeltreffende ­beplanning”. Distriksgesondheidsdata het ’n bestendige toename in pasiënte met tuberkulose aan die lig gebring wat in 2021 behandeling by die Karibib-­kliniek ontvang het.



Immuniseringsyfers en algehele ­pasiëntbesoeke het ook toegeneem, het Shangula gesê.



Om aan hierdie groeiende vraag te voldoen, het die ministerie ’n voltydse mediese dokter en ’n apteekassistent by die kliniek aangestel.



“Hierdie doelbewuste ingrypings verseker die verskaffing van kritieke gesondheidsorgdienste. Toeganklike gesondheidsorg bevorder gelykheid en verseker dat kwesbare individue die mediese sorg ontvang wat hulle nodig het, ongeag sosioëkonomiese status,” het die minister beklemtoon.



SWAKOPMUND



Hy het ook erkenning gegee aan die Karibib-dorpsraad vir die ­skenking van grond ter waarde van N$3 miljoen.



Benewens die Karibib-uitbreiding, het Shangula die voltooiing van ’n ­neonatale mediese sentrum by die Swakopmund- distrikshospitaal aangekondig met die oorhandiging wat vir 25 Maart geskeduleer is.



“Dit sal noodsaaklike gespesialiseerde sorg vir kwesbare pasgebore babas verskaf, wat die behoefte aan oorplasings na Windhoek uitskakel,” het hy gesê.



Daarbenewens het die myn onlangs ’n lykshuis by Otjimbingwe, ’n nedersetting 50 kilometer verder, geopen teen ’n koste van N$4,5 miljoen.



Die konstruksie van die nuwe mediese kliniek sal voor Junie begin en sal in drie fases voltooi word. Die eerste fase sal op die kraamsaal fokus, gevolg deur bykomende beddens, ’n teater, ’n kombuis, ’n wassery en ­personeelkwartiere.



Dienste sal traumasorg, rehabilitasie, X-strale, bevallings, ­ortopedie, psigiatriese dienste en algemene mediese sorg insluit.



“Anders as sommige myne wat kom en gaan, sal hierdie belegging lewens red. Dit is ’n voorbeeld van wat ons kan bereik wanneer ons saamwerk,” het Neville Andre, die goewerneur van die Erongostreek, gesê.



Karibib se burgemeester, Davey van Wyk, het die sentrum se ­voordele vir die gemeenskap beklemtoon en ­bygevoeg dat dit die groter kiesafdeling sal dien.



“Die grond behoort aan die mense, en hierdie belegging verseker dat elke inwoner toegang tot gesondheidsorg sal hê wanneer hulle dit nodig het,” het hy gesê. – [email protected]