Swakopmunders se lyne kruis oor 5G

Die Swakopmund-munisipaliteit het verskeie klagskrifte van sakelui en inwoners ontvang oor ’n sendontvanger-telekommunikasietoring, wat glo met 5G-tegnologie toegerus sal wees, wat in hul nabygeleë omgewing beplan word.Om die kapasiteit van telekommunikasie-konnektiwiteit in Swakopmund uit te brei, het Telecom Namibia se filiaal, Powercom, ’n gebied geïdentifiseer om so ’n toring op te rig, wat glo soortgelyk sal wees aan verskeie torings in die dorp wat vir estetiese doeleindes as palmbome “gekamoefleer” is. Die gebied ter sprake is by Telecom se Tamariskia-pakhuis, wat langs die Hentiesbaai-pad, en naby verskeie besighede soos ’n kwekery, hospitaal, X-straalsentrum en laboratoriumgeriewe geleë is.Verskeie klagskrifte wat Erongo 24/7 onder oë gehad het, behels vrese dat die toring van die wêreldwyd-omstrede 5G-tegnologie gebruik sal maak wat volgens sommige hoogs skadelik vir biologiese gesondheid is, en dat blootstelling aan 5G-radiogolwe tot verskeie siektes en uiteindelik die dood kan lei. “Hierdie is nie iets wat ons kan toelaat nie. Daar bestaan te veel vrae oor 5G, en terwyl dit as ’n meer doeltreffende vorm van telekommunikasietegnologie bemark word, is daar min studies wat bewys dat dit nie gevaarlik is nie,” sê een besorgde sake-eienaar. “Dit sal immoreel wees om toe te laat dat dit ons kinders en toekomstige geslagte raak.”‘n Omgewingsimpakstudie is van stapel gestuur, maar belangstellende en betrokke partye is nie oortuig van die deursigtigheid van die proses nie en glo dat hul besware nie ernstig opgeneem word nie. Nog ‘n besorgde sake-eienaar het gesê die toring sal in ‘n besige openbare ruimte wees, met ‘n speelgrond, restaurant en dosyne werkers, sowel as pasiënte van die hospitaal. “Hierdie torings kan alle biologiese lewe beïnvloed; dit sluit bye, visse, plante en bowenal ‘n mens se gesondheid in,” het die persoon gesê. “As dit gebeur, sal dit die einde van my besigheid wees.”Verwysing is na planne gemaak om 5G-tegnologie binnekort in Windhoek uit te rol om dit ‘n “slim stad” te maak, en dat Swakopmund dieselfde beoog. “Ek glo nie dat enige 4G- of 5G-diensverskaffer nou kan bewys dat hierdie torings nie gevaarlik vir mense is nie. Die torings moet ver van woongebiede en waar mense werk gebou word,” het ’n inwoner gesê. “Hulle kan sê dat dit nou 4G is, maar dis maklik om net die ontvanger met 5G te vervang.”Telecom Namibia se hoof van korporatiewe kommunikasie, me. Nomvula Kambinda, het aan Erongo 24/7 gesê Telecom se mobiele radionetwerkontplooiings was tot op hede beperk tot 2G-, 3G- en 4G-tegnologie. “Telecom Namibia het geen onmiddellike planne om 5G-tegnologie te ontplooi nie, maar evalueer die lewensvatbaarheid daarvan,” het sy gesê en bygevoeg die ontplooiing van 5G is onderhewig daaraan dat die Regulerende Owerheid vir Kommunikasie in Namibië (Cran) magtiging van die kabinet ontvang. “Cran het nog geen aanduiding gegee dat 5G-tegnologie ontplooi kan word nie.”Mnr. Alfeus Benjamin, uitvoerende hoof van die Swakopmund-dorpsraad, het gesê hy is bewus van al die kommer rondom dié kwessie en dat die saak binnekort deur die raad se bestuurskomitee bespreek sal word. Volgens hom het die munisipaliteit verlede jaar ‘n aansoek ontvang vir die uitbreiding van telekommunikasietorings, veral in die oostelike dele van die dorp, as deel van ‘n program om konnektiwiteit te verbeter. Hy het gesê elke aansoek moet deur ‘n goedkeuringsproses gaan, waarna die raad ‘n finale besluit sal neem.Volgens Benjamin is die voorneme vir die projek geadverteer, waarna die publiek genooi is om verskeie konsultasiesessies by te woon. Min mense het egter glo dié vergaderings bygewoon. “Ons het selfs twee bykomende vergaderings gereël, maar niemand het dit bygewoon nie - selfs toe ons in die media geadverteer het,” het hy gesê en bygevoeg dat die besware binnekort hersien sal word en die raad dan oor die volgende stap sal besluit. Volgens hom is daar geen 5G-planne vir Swakopmund nie aangesien die regering dit nog nie eens goedgekeur het nie. – republikein@republikein.com.na

Swakopmunders se lyne kruis oor 5G

Kommentaar

Republikein 2025-04-18

Meld asseblief aan om kommentaar te lewer

Swakopmunders se lyne kruis oor 5G

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie