Raaisel rondom ‘rooftog’ op Okahandja verdiep

Jemima Beukes en Jemimah Ndebele - Die polisie op streekvlak in Otjozondjupa sowel as die nasionale hoofkantoor in Windhoek het vrae gesystap oor die omstandighede waaronder vyf vermeende rowers ’n week gelede naby Okahandja doodgeskiet is.Polisie-intelligensiebronne het gesê die mans het ’n lang lys van misdade teen hulle en was reeds op die polisie se radar vir vorige sake, vandaar die gemak waarmee hulle opgespoor is.Marius Iipinge, een van die vyf wat doodgeskiet is, is in 2018 tot 15 jaar tronkstraf gevonnis vir die roof van Rocha’s Hotel op Oshakati in 2007, maar het ’n jaar later suksesvol teen sy skuldigbevinding en vonnis geappelleer.Vorige polisieverslae dui daarop dat Iipinge, wat van die dorp Onawa yaKilian in die Oshanastreek kom, in 2015 uit die tronk in Lubango, Angola, ontsnap het. Hy is daar aangehou omdat hy na bewering ’n bank beroof het. Die polisie het hom en sy makkers van ’n rits misdade aangekla wat wissel van moord, poging tot moord, besit van vuurwapens en ammunisie, ontsnapping uit wettige aanhouding, huisbraak en diefstal.Die sterftes – wat na bewering die gevolg van ’n skietgeveg was – het egter meer vrae as antwoorde laat ontstaan.Met die enigste oorlewende van die skermutseling wat na bewering op die vlug geslaan het, is die polisie se weergawe van gebeure al wat die nasie tot dusver gehoor het.“Nee nog nie. Hy moet nog geïdentifiseer word,” het ’n polisiebron gesê toe hy gevra is of die verdagte wat vermoedelik weggekom het, aangekeer is.GEEN ROOFTOG Beamptes van die Namibiese polisie (Nampol) se misdaadintelligensie-waarnemingseenheid het aan ons susterkoerant Namibian Sun gesê hulle het vooraf geweet ’n rooftog word vir Okahandja se JS Slots Gambling House beplan, en ’n plan is in werking gestel om die komplot te stuit.Aangesien die dobbelhuis nie beroof is nie, het vrae ontstaan oor watter misdaad op die noodlottige nag gepleeg is om die sterftes te regverdig.Werkers by die dobbelhuis het die afgelope naweek gesê daar was geen ontwrigting op daardie nag nie en hulle het eers die volgende dag van die voorval verneem toe die polisie die kringtelevisiebeeldmateriaal by hul werkplek kom kyk het.’n Senior personeellid by Beefcor, ’n slaghuis langs die misdaadtoneel, sê die polisie het hulle nog nie gekontak vir beeldmateriaal nie.In ’n polisieverslag deur beamptes wat by die skietery betrokke was, word beweer dat die voornemende rowers die eerste skote afgevuur het in die skermutseling wat hulle hul lewens gekos het.“Op die NaTIS-pad het verdagtes op die polisievoertuig begin skiet. Lede het gereageer en vyf verdagtes geskiet wat op slag dood is,” lui beamptes se boodskap aan hul base.Die polisie se oorverdowende stilte – vererger deur die ooglopende weglating van die voorval uit Sondag se weeklikse polisiemisdaadverslag – het gerugte net verder aangevuur.‘SOOS ’N HOND’’n Inwoner wat daar naby woon, het die wyse waarop die misdaadtoneel hanteer is bevraagteken.“Hulle het net die kar met die vier lyke binne-in geneem en dit op iets gesleep wat soos ’n boer se sleepwa lyk. En die een verdagte wat in die bosse gebloei het, is soos ’n hond opgetel en soos ’n karkas na daardie sleepwa gedra en daarop gegooi,” het die getuie gesê.“Wat vreemd is, is dat die binnekant van die sleepwa met foelie bedek was, terwyl die lyke gewoonlik met foelie bedek word en deur die polisievoertuig vervoer word. Ons verstaan ook dat die Okahandja-polisie eers die volgende dag van die skietery uitgevind het,” het die bron gesê.Leevi Ileka, die waarnemende hoof van Windhoek se stadspolisie, wie se magte die verdagtes saam met hul Nampol-eweknieë agternagesit het, was nie bereid om te verduidelik hoekom sy beamptes deel was van die operasie buite hul jurisdiksie nie. Hy het alle vrae na Nampol verwys.“Daardie deel van openbare betrekkinge word deur die Khomas-streekbevelvoerder, David Indongo, gedoen,” het hy gesê, ondanks die feit dat die skietery in die Otjozondjupastreek plaasgevind het. Indongo het ook geen antwoorde gehad nie en gesê die saak moet “op nasionale vlak hanteer word”.Die polisiewoordvoerder in die Otjozondjupastreek, insp. Maureen Mbeha, wou ook nie kommentaar lewer nie en het vrae na hoofinspekteur Elifas Kuwinga in Nampol se kommunikasieafdeling in Windhoek verwys.Kuwinga het gesê die polisie by die hoofkantoor is besig om ’n volledige verslag oor die aangeleentheid saam te stel, wat met die media gedeel sal word.“Ons is meegedeel dat die inspekteur-generaal [Joseph Shikongo] die verslag sal vrystel wanneer dit gereed is,” het hy gesê.REG OM TE LEWE Die menseregteprokureur Kadhila Amoomo, wat baie uitgesproke oor die voorval is, het gesê die polisie moet hul stilte verbreek.“Die polisie het ’n plig teenoor die publiek om die volle omstandighede rondom die vyf jong mans se sterftes bekend te maak. Dit sal beskuldigings en gerugte in die kiem smoor,” het hy gesê.“Artikel 6 van die Namibiese Grondwet maak dit duidelik dat almal ’n reg het om te lewe. Dit is waarom die doodstraf in Namibië afgeskaf is. Dit is maklik om te redeneer dat die polisie goeie werk gedoen het, maar hoeveel keer het die polisie dit verkeerd gekry?”– republikein@republikein.com.na

Raaisel rondom ‘rooftog’ op Okahandja verdiep

Kommentaar

Republikein 2025-04-07

Meld asseblief aan om kommentaar te lewer

Raaisel rondom ‘rooftog’ op Okahandja verdiep

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie