DRC kry 'n polisiestasie

Rossing Uranium Limited (RUL) gaan 'n polisiestasie in die DRC-informele nedersetting in Swaiopmund oprig, met die sooispitseremonie wat vandeesweek amptelik plaasgevind het. Die stasie sal tussen die DRC- en Matutura-informele nedersettings geleë wees en 'n aanklagkantoor, aanhoudingselle, toiletgeriewe en kantoorruimte huisves. Die uitvoerende direkteur in die ministerie van binnelandse sake, immigrasie, veiligheid en sekuriteit, Etienne Maritz, het in die afwesigheid van minister Albert Kawana, die belangrikheid van die inisiatief beklemtoon om veiligheid en sekuriteit in die gemeenskap te versterk.

"Die inisiatief weerspieël die mag van vennootskappe om die kritieke behoefte vir verhoogde veiligheidsmaatreëls in ons gemeenskappe aan te spreek," het Maritz gesê.

Die konstruksie van die polisiestasie op grond wat deur die munisipaliteit geskenk is, simboliseer volgens hom 'n noodsaaklike stap om te verseker alle inwoners het toegang tot noodsaaklike dienste en beskerming.

"Die polisiestasie versinnebeeld ons regering se verbintenis daartoe om die welsyn van ons burgers te beskerm."

Maritz het namens minister Kawana beklemtoon "ons doelwit is duidelik: verminder misdaad, bevorder openbare vertroue en skep 'n veilige omgewing".

Luitenant-generaal Joseph Shikongo het op sy beurt gesê inwoners van DRC moes die dienste van die Mondesa-polisiestasie gebruik wat ver van die nedersetting geleë is.

"Die verbeterde ligging en toeganklikheid sal ongetwyfeld ons vermoë versterk om wet en orde te handhaaf en 'n veiliger omgewing vir almal skep," het Shikongo gesê.

Volgens die goewerneur van die Erongostreek Neville André het verwys na die invloei van migrante na die streek op soek na ekonomiese geleenthede en die gevolglike groter behoefte aan infrastruktuur en veiligheidsmaatreëls.

"Projekte soos die polisiestasie in DRC is noodsaaklik om die maatskaplike euwels hok te slaan wat saam met vinnige verstedeliking kom," het André gesê. - [email protected]