Shikongo daag polisielede uit oor ‘tekort aan voertuie’

Die hoof van die Namibiese polisie (Nampol), luitenant-generaal Joseph Shikongo, het polisiebeamptes uitgedaag om die sigbare teenwoordigheid van polisievoertuie te regverdig terwyl gemeenskappe aanhou kla oor stadige reaksietye weens beweerde vervoertekorte.Shikongo het die naweek tydens ’n inligtingsessie vir misdaadvoorkoming by die Israel Patrick Iyambo-polisiekollege, waar ongeveer 40 polisievoertuie geparkeer was, die duidelike teenstrydigheid tussen die publiek se klagtes en die oënskynlike beskikbaarheid van hulpbronne uitgelig.“Wanneer julle teruggaan na jul stasies, sal die publiek bel, en julle sal sê: ‘Ons het nie voertuie nie.’ Maar wat het geword van die motors wat net daar by Patrick Iyambo was?” het Shikongo gevra en die groeiende frustrasie beklemtoon van burgers wat sukkel om tydige polisiebystand te kry.Terwyl hy erkenning gee aan voortdurende pogings om bykomende hulpbronne te bekom, het Shikongo dit duidelik gemaak die probleem strek verder as ’n eenvoudige tekort aan voertuie.Behoorlike bestuur en aanspreeklikheid is van kritieke belang, het hy gesê, en beamptes versoek om te verseker dat beskikbare hulpbronne doeltreffend gebruik word in plaas daarvan om toe te laat dat ondoeltreffendheid voortduur.KWESBAAR VIR MISDAADTwee weke gelede het NBC berig dat die boeregemeenskap by Epukiro sukkel met vertraagde polisiereaksies weens ’n beweerde tekort aan voertuie. Inwoners het ook frustrasie uitgespreek oor die gebrek aan terugvoering oor hangende veediefstalsake. Die meeste inwoners van Epukiro is afhanklik van veeboerdery, met diefstal wat ’n wesenlike bedreiging vir hul lewensbestaan inhou.Sonder tydige polisie-ingrypings en terugvoering oor ondersoeke, voel baie mense toenemend kwesbaar.Katjinduu Tjahuha, die voorsitter van die Oostelike Epukiro Boerevereniging, het gesê hul polisiekantoor is gereeld sonder ’n voertuig.“Soms rapporteer jy vermiste bokke in Otjimati of Okatuuo, en as jy die polisie bel, word daar vir jou gesê daar is geen voertuig nie. Ander kere is die voertuig in Gobabis vir herstelwerk en later hoor jy dit het nie ’n battery nie,” het hy gesê.Die polisiebevelvoerder in die Omahekestreek, Heinrich Tjiveze, voer aan elke polisiekantoor in die streek het ’n voertuig tensy dit tydelik vir herstelwerk ingeboek is.NDIYONALaurentius Mukoya, ’n raadslid vir die Ndiyona-kiesafdeling, het verlede jaar ’n dringende pleidooi aan die ministerie van veiligheid en sekuriteit en Shikongo gerig vir polisievoertuie.Tans funksioneer die Ndiyona-polisiekantoor glo sonder enige voertuie, wat sy vermoë verlam om op misdaadvoorvalle te reageer, veral in afgeleë binnelandse nedersettings.Mukoya het laat verlede jaar aan Network Media Hub (NMH) gesê: “Tydens ons vergadering twee maande gelede het ek die minister oor hierdie kwessie ingelig. Hy het vir my gesê om te wag vir die begroting, maar die waarheid is, as enige kriminele bedrywighede in hierdie kiesafdeling plaasvind, moet ons staatmaak op voertuie van Rundu of Mukwe. “Dit is ’n ernstige kwessie, en ek doen ’n beroep op die ministerie en die inspekteur-generaal om vir ons ten minste twee voertuie te stuur,” het hy gesê.WYDVERSPREIDE KOMMERIntussen het die polisiebevelvoerder in die Kavango-Oosstreek, kommissaris Andreas Kanyanga Haingura, geweier om kommentaar te lewer op Mukoya se opmerkings en gesê: “Dit is nie my plek om kommentaar te lewer oor wat politici sê nie.”Hy het egter erken dat die voertuigtekort ’n landswye uitdaging is. “Hierdie kwessie is nie uniek aan Ndiyona nie. Oraloor die land worstel polisiekantore met ’n gebrek aan betroubare vervoer, wat doeltreffende polisiëring belemmer. “Onbruikbare of verouderde voertuie is ’n groot struikelblok om openbare veiligheid te verseker,” het hy aan NMH gesê.In Mei verlede jaar het Swapo se parlementslid, Gerhard Shiimi, soortgelyke kommer geopper en ’n beroep op die ministerie van binnelandse sake, immigrasie, veiligheid en sekuriteit gedoen om die tekort aan polisievoertuie te takel. Hy het ook beamptes gekritiseer vir die misbruik van voertuie, met verwysing na beweerde voorvalle waar dit vir persoonlike gebruik of deur beamptes onder die invloed van alkohol gebruik is. Hy het ook ’n beroep op die strenger bestuur van polisiehulpbronne gedoen om te verseker dat dit hul beoogde doel dien.Landelike gebiede, veral in die twee Kavangostreke, is die swaarste deur die gebrek aan polisievoertuie getref.NMH het voorheen berig inwoners van Ncaute in Kavango-Wes het die plaaslike polisie gekritiseer omdat hulle staatgemaak het op ’n enkele 2x4-voertuig wat nie geskik is om afgeleë gebiede te bereik nie. Op ’n positiewe noot het Rössing Uranium verlede jaar N$750 000 aan die Namibiese polisie in Erongo geskenk. Dié bedrag is geoormerk vir die diens en instandhouding van polisievoertuie in Swakopmund, Walvisbaai en Arandis.– nikanor@nmh-hub.com.na

Shikongo daag polisielede uit oor ‘tekort aan voertuie’

Kommentaar

Republikein 2025-04-03

Meld asseblief aan om kommentaar te lewer

Shikongo daag polisielede uit oor ‘tekort aan voertuie’

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie