‘Banke moet sekuriteit opskerp’

Die Namibiese polisie se bevelvoerder in die Oshanastreek, Naftal Lungameni Sakaria, het banke versoek om hul sekuriteit op te skerp om bedrog te voorkom en hul kliënte teen swendelaars te beskerm. Hy het gister sy kommer uitgespreek oor die toenemende aantal bedrogvoorvalle wat deur bankkliënte aangemeld is, ná ’n onlangse vergadering met verteenwoordigers van die banksektor, insluitend First National Bank Namibia (FNB). Tydens die vergadering het hy die groeiende kwessie van bankkliënte wat deur swendelaars bedrieg word, uitgelig.“Dit gaan nie oor syfers nie. Miskien is hulle nie bekommerd nie en neem hulle dit ligtelik op, maar ons doen ’n beroep op banke om dit as ’n saak van dringendheid op te neem en hul sekuriteitstelsels op te skerp. As hulle kan sien die huidige stelsels werk nie, moet hulle hul vlakke van sekuriteit verdubbel,” het hy gister aan Network Media Hub (NMH) gesê. Sakaria het opgemerk dat veral FNB bekommerd moet wees oor die toenemende voorvalle van bedrog wat hul kliënte raak.Hy het gesê vir die Oshanastreek alleen is 11 bedrogsake tussen 2023 tot op hede aangemeld. Hiervan was 10 FNB-kliënte en een kliënt van Standard Bank betrokke, het hy gesê. Die meeste van hierdie voorvalle het in 2024 voorgekom.FNB Namibia het glo 103 bedrogvoorvalle in November en Desember verlede jaar ondersoek, wat ’n totale verliese van meer as N$4 miljoen tot gevolg gehad het.Verlede maand het die polisie in Omusati gesê ’n 60-jarige vrou van die Uukwamatsi-nedersetting op Okahao is tussen 15 en 17 Januarie van N$1,1 miljoen uit haar FNB-rekening bedrieg.“Hulle [FNB] wou eers dit afmaak en sê dit is omdat hulle meer kliënte as ander banke het en outomaties meer voorvalle sal aanteken,” het Sakaria gesê.Hy het gesê hierdie argument kan nie korrek wees nie, aangesien mense steeds geld verloor en die meeste daarvan is glo nog nie teruggekry nie.Sakaria sê die polisie werk hard om lede van die publiek te leer om nie met vreemdelinge te praat en vertroulike inligting uit te gee nie. “Hulle het so baie maniere om by die mense uit te kom en mense is kwesbaar,” sê hy.Hy sê verder: “As jy my kaart steel en die nommer kry, moet dit nie so maklik vir jou wees om toegang tot my geld te kry nie.” NIE NET FNBIn 2023 het FNB ook onder die vergrootglas gekom toe verskeie kliënte aangemeld het dat hulle geld verloor het deur dié bank se e-beursiediens te gebruik. FNB het destyds gesê hy kan nie verantwoordelik gehou word vir geld wat deur dié platform aan swendelaars verlore gaan nie.FNB se kommunikasiebestuurder, Kirsty Watermeyer, het gesê die toename in digitale misdaad raak nie net FNB alleen nie. Hierdie neigings word in nywerhede en wêreldwyd waargeneem, het sy gesê. Watermeyer het beklemtoon dat die bedryf bekommerd is en taakspanne gemobiliseer het om bykomende maatreëls te ondersoek om kliënte te help om beter voor te berei vir en bedrog te bekamp.“Ons het nog altyd kuberveiligheid geprioritiseer en het robuuste stelsels in plek om bedrogpogings te bekamp. In baie gevalle is ons in staat om bedrieglike aktiwiteite te keer,” het sy benadruk. Watermeyer het gesê die bank het ’n baie noue werksverhouding met die polisie en poog om hulle ten volle te ondersteun deur voort te gaan om bewusmakingsveldtogte rondom bedrogvoorkomingswenke met die publiek oor verskeie platforms te deel.“Ons is besig om ouetehuise te besoek om bedrogvoorkomingswenke met pensioenarisse te deel wat dikwels die teiken van kubermisdaad is. Die bekamping van bedrog is 'n topprioriteit vir ons en ons doen 'n beroep op die publiek om waaksaam te bly en om te stop en te verifieer as hulle verdagte oproepe, e-posse of SMS'e ontvang,” het sy gesê.– tuyeimo@nmh-hub.com.na

‘Banke moet sekuriteit opskerp’

Kommentaar

Republikein 2025-03-07

Meld asseblief aan om kommentaar te lewer

‘Banke moet sekuriteit opskerp’

Kommentaar

Republikein 2025-03-07

Meld asseblief aan om kommentaar te lewer

MELD AAN

Advertensie