ECN stel sy visier op 1,7 miljoen kiesers

Die Verkiesingskommissie van Namibië (ECN) het sy visier daarop gerig om te verseker dat die 1 731 790 stemgeregtigde kiesers in die land geregistreer is voor Namibiërs later vanjaar na die stembus sal gaan.ECN het die skatting gemaak op grond van die onlangse voorlopige sensusuitslae wat deur die Namibië Statistiekagentskap (NSA) vrygestel is, wat Namibië se bevolking op net meer as drie miljoen plaas.“Die voorlopige bevolkingstatistiek wat op 13 Maart deur die NSA vrygestel is, dui daarop dat die Namibiese bevolking tot 3 022 401 gegroei het. As daar van die bevolkingsensus afgelei kan word, kom 1 731 790 Namibiese burgers in aanmerking om as kiesers te registreer. Daarom, gebaseer op ervarings en lesse wat gedurende 2014 se algemene registrasie van kiesers (GRV) geleer is, is noukeurige beplanning gedoen in die voorbereidings vir die 2024-proses, gegewe die hulpbronne wat in die uitvoer van hierdie proses belê is,” het die ECN in ’n verklaring gesê.Die kommissie het 4 297 registrasiepunte in al 121 kiesafdelings oraloor die land geïdentifiseer, met 3 849 registrasiebeamptes wat ontplooi moet word.Die registrasiepunte is bepaal op grond van verskeie faktore, soos die bevolkingsdigtheid, aldus die verklaring.Ten spyte van die ECN se pogings om te verseker dat burgers aan die registrasie- en stemproses deelneem, meen die politieke ontleder Rui Tyitende dat die ECN meer kan doen in terme van sy burgerlike onderrigproses.“Die gemiddelde Namibiër is onbewus van die ECN se bestaan. Ons hoor net van die ECN as daar ’n verkiesing is, maar hulle het permanente werknemers wat betaal word of daar verkiesings is of nie.“So, wat presies doen hulle tydens ’n nieverkiesingsiklus? Tel hulle vorige stembriewe? Skryf hulle verslae? Berei hulle vir vyf jaar voor vir die volgende verkiesing?” wou hy weet.Dit is noodsaaklik dat die ECN se teenwoordigheid nie net in ’n verkiesingsjaar gevoel word nie, maar deurgaans om te verseker dat die stemgeregtigde publiek bewus is van sy bestaan, het Tyitende bygevoeg.“Hulle moet oral, elke keer sigbaar wees, sodat hul mandaat deel van die publiek se psige is. ’n Aggressiewe veldtog moet van stapel gestuur word wat spreek van ’n verband tussen die land se swak toestand en lae verkiesingsdeelname.“Dit moet die primêre fokus van kiesergesprekke wees en nie onderrig nie. Kieseronderrig is neerbuigend en kiesergesprekke is bemagtigend.”Die woordvoerder van die Landless People’s Movement (LPM), Lifalaza Simataa, het Tyitende se sentimente beaam en bygevoeg dat daar nie veel aan die kant van die ECN gedoen word om deelname aan die verkiesingsproses aan te moedig nie.“Ons glo hulle doen nie genoeg nie. Dit was eers onlangs dat hulle van die inligting op hul webwerf opgedateer het oor hoe om te stem en wat Namibiese burgers sal nodig hê om te kan registreer om te stem,” het hy gesê.Volgens hom het die ECN ook nie ’n aktiewe veldtog van stapel gestuur om kiesers aan te moedig om te registreer en te stem nie.“Dit is weke nadat hulle die registrasiedatums aangekondig het. Hierdie inligting is bloot op hul webtuiste geplaas en daar is geen ander huidige en aktiewe veldtogte deur die ECN om die massas in te lig oor hoe om te registreer, die belangrikheid van registrasie of die datums van registrasie nie,” het hy gesê.Immanuel Nashinge, die woordvoerder van die Independent Patriots for Change (IPC), het gesê stemgeregtigdes het ook ’n rol om te speel om te verseker dat hulle aan die stemproses deelneem.“As burgers het ons ’n rol om te speel en ’n grondwetlike verpligting om verkiesingsaktiwiteite en ons betrokkenheid by verkiesings te prioritiseer. Dus glo ek dit is nie net die ECN wat ons moet bevraagteken nie, maar ons almal as burgers.“Daar is egter meer wat die ECN kan doen. Baie word nie gedoen nie, want as jy na hul aktiwiteite kyk, as jy werklik bekommerd is, as elke stemperiode dieselfde uitkoms lewer, moet jy jou strategieë verander,” het hy gesê.“Daar is meer wat die ECN kan doen in terme van die opskerping van hul burgerlike onderrigprogram en om deelname aan verkiesings aan te moedig. Dit sal ook geen skade doen om wetgewers te betrek om wette in te stel om elke burger te verplig om aan verkiesings deel te neem nie. Ek dink daar is geen kwaad daarin nie. As almal deelneem, versterk jy ons demokrasie.”Nashinge het ook ’n beroep op die regering gedoen om meer finansiering aan die ECN beskikbaar te stel om sy doeltreffende funksionering moontlik te maak.“Dis nie maklik om te verbeter en nuwe strategieë in te bring nie; dit verg geld. Finansiering is ook ’n probleem vir die sentrale regering. Dit kan dalk die rede wees waarom hulle nie veel doen nie, maar die ECN moet op die grond wees om die burgers van die land te verstaan.”– republikein@republikein.com.na

ECN stel sy visier op 1,7 miljoen kiesers

Kommentaar

Republikein 2024-11-27

Meld asseblief aan om kommentaar te lewer

ECN stel sy visier op 1,7 miljoen kiesers

Kommentaar

Republikein 2024-11-27

Meld asseblief aan om kommentaar te lewer

MELD AAN

Advertensie