Joernalis onbewus van haar foto op verkiesingsmateriaal

’n Foto van die joernalis Elizabeth //Kheibes wat op die Popular Democratic Movement (PDM) se promosiemateriaal in aanloop tot volgende week se verkiesings verskyn, kan volgens die sekretaris-generaal van die Vakbond vir Namibiese Professionele Media (Nampu), Jemima Beukes, en die menseregteprokureur Norman Tjombe, openbare persepsies van haar onpartydigheid afbreek.“Dit is onaanvaarbaar en onverantwoordelik, jy kan nie net ’n joernalis se foto so gebruik nie. Dit is amper die verkiesing en nou dink mense sy is ’n PDM-joernalis,” sê Beukes.Tjombe sê om ’n foto te gebruik sonder om die fotograaf te kontak, of in dié geval die mediahuis, wat die intellektuele eiendom besit, is onverantwoordelik. Hy verduidelik dat dit openbare vertroue in //Kheibes se vermoë kan belemmer om onpartydig en regverdig in haar verslaggewing te wees.“Ek is geskok – ek het gedink ons politieke partye is beter as dit. Iemand moes hierdie deurdink het – daar is tyd, moeite en denke agter hierdie materiaal. “Iemand moes dit ontwerp en iemand moes dit goedgekeur het,” het //Kheibes gesê. Volgens haar is die foto in 2019 geneem vir ’n veldtog deur die jeugpublikasie, My Zone, om die jeug aan te moedig om tydens die vorige nasionale verkiesing te stem. //Kheibes was in daardie stadium ’n joernalis vir My Zone, ’n handelsmerk onder Network Media Hub (NMH) – destyds Namibia Media Holdings – en is later aangestel as ’n joernalis vir Namibian Sun, Republikein se susterkoerant, wat ook aan die NMH-groep behoort.Sy het na die Verkiesingskommissie van Namibië (ECN) uitgereik waar sy ingelig is dat sy ’n strafregtelike saak moet aanhangig maak voordat die ECN kan ingryp.Tjombe is van mening dat enige saak wat in hierdie verband gemaak sou word van ’n siviele aard moet wees en dat daar geen gronde vir ’n strafsaak is nie. “Dit kan my loopbaan skade berokken. . . ek is nie kop in een mus met die PDM nie,” sê //Kheibes.Die PDM het //Kheibes in 'n amptelike verklaring om verskoning gevra en gesê hulle was nie bewus daarvan dat die vrou op die foto ’n joernalis is nie.“Die PDM erken die onafhanklikheid en onpartydigheid van die media as ’n hoeksteen van ons demokratiese bedeling, en dit is op grond hiervan dat ons interne regstellende maatreëls ingestel het om te verseker dat so ’n fout nie herhaal word nie,” lui die PDM se verklaring.#NamibiaDecides2024– irene-mari@nmh-hub.com.na

Joernalis onbewus van haar foto op verkiesingsmateriaal

Kommentaar

Republikein 2025-04-07

Meld asseblief aan om kommentaar te lewer

Joernalis onbewus van haar foto op verkiesingsmateriaal

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie