Mbumba: Itula maak ‘ongegronde geraas’

President Nangolo Mbumba het dr. Panduleni Itula, die leier van die Independent Patriots for Change (IPC), se regsuitdaging van die uitslae van verlede jaar se presidensiële verkiesing afgekeur en hom daarvan beskuldig dat hy “ongegronde geraas” maak.

Mbumba het Itula en die Landless People’s Movement (LPM) se leier, Bernadus Swartbooi, gekritiseer omdat hulle na bewering grondwetlike en kieswette verdraai het om by hul argumente te pas.

Mbumba het aangevoer Itula probeer ’n grondwetlike interpretasie afdwing wat met sy agenda strook en beklemtoon dat howe tipies openbare verkiesings handhaaf eerder as om dit nietig te verklaar.

Die hooggeregshof sal die saak op 10 en 11 Februarie aanhoor.

“As staatshoof het ek ’n mandaat om mense se grondwetlike reg om te stem te beskerm. Toe omstandighede ontstaan het wat sommige stemgeregtigde kiesers verhinder het om hul regte uit te oefen, het ek opgetree om hul deelname te verseker. Itula maak bloot geraas,” het Mbumba beweer.

Hy het ook Swartbooi se bewerings van magsmisbruik ontken en gesê dit is ongegrond.

Die aangewese president Netumbo Nandi-Ndaitwah, wie se oorwinning in hierdie hofaansoek betwis word, het Itula se regsargumente as swak en sonder feitelike inhoud beskryf.

Sy het bewerings dat Namibiërs se grondwetlike stemreg geskend is weens ’n tekort aan stembriewe verwerp en aangevoer dat Mbumba se ingryping nodig was om die stemproses te vergemaklik.

Sy het ook Itula se steun op Christine !Aochamus, die nasionale sekretaris-generaal van die IPC, se getuienis bevraagteken en gesê haar bewerings dat sy stembriefmateriaal by die Verkiesingskommissie van Namibië (ECN) ondersoek het, vals is.

“Itula beweer ’n reeks onreëlmatighede het plaasgevind, maar hy het baie daarvan in sy voorleggings laat vaar. Sy saak is swakker as vorige verkiesingsuitdagings wat voor hierdie hof gebring is. Dit moet met koste van die hand gewys word, insluitend die koste van drie regsadviseurs," het Nandi-Ndaitwah in hofstukke gesê.



VERKIESING ‘ONGELDIG’

Itula hou vol daar was verskeie onreëlmatighede in die verkiesings en voer aan dat die ECN sy regsplig versuim het deur nie hierdie kwessies te ondersoek nie en sodoende na bewering die verkiesing se geldigheid in die gedrang gebring het.

“In plaas daarvan het die ECN en Mbumba ’n onregmatige optrede gepleeg. Die ECN het gefaal in sy verpligting om onafhanklik op te tree deur raad van die prokureur-generaal, Festus Mbandeka, in te win.

“Hy het toe onregmatig aanbeveel dat Mbumba die stemproses moet verleng nadat stemmery reeds plaasgevind het. Dit is ondanks die gebrek aan die wetlike magtiging om dit te doen.

“Die president het onregmatig opgetree, aangesien hy geen wetlike bevoegdheid het om die stemtydperk te verleng nie,” het Itula aangevoer.

Hy voer aan dat kiesers op 27 November 2024 van hul stemreg ontneem is, aangesien slegs 36 stemdistrikte se stemtydperk verleng is terwyl die res van die land dieselfde geleentheid geweier is.

“Dit is in stryd met die beginsel van vrye en regverdige verkiesings, wat gelyke deelname vir alle stemgeregtigde kiesers vereis,” het hy bygevoeg.

Itula het ook die ECN se besluit bevraagteken om regsadvies van Mbandeka in te win. Hy meen dit kom neer op politieke vooroordeel weens sy bande met Swapo.

“Die ECN het sy wetlike verpligtinge verbreek. Eerder as om onafhanklik op te tree, het hy die prokureur-generaal geraadpleeg wat ’n gevestigde belang in die verkiesing se uitslag het.

“Ná hierdie vergadering het hy ’n onregmatige verlenging van die verkiesing aanbeveel,” het Itula aangevoer.

Die hooggeregshof se uitspraak in hierdie hofaansoek sal fyn dopgehou word aangesien dit ’n presedent vir verkiesingsgeskille in Namibië kan skep.

– [email protected]