Namibië, Rusland skuur skouers

Jemima Beukes – Die Nasionale Raad (NR) het op 22 Maart ’n samewerkingsooreenkoms met die Russiese Federasieraad in Moskou onderteken na aanleiding van die tweede Rusland-Afrika internasionale parlementêre konferensie wat pas afgehandel is.Die voorsitter van die NR, Lukas Sinimbo, wat die ooreenkoms onderteken het, het gesê die beste manier om die moderne paradigma van multipolêre demokrasie te kweek, is deur ooreenkomste van hierdie aard waar parlemente ’n beduidende rol op bilaterale en multilaterale vlakke kan speel.Hy het ook namens Namibië die Russiese regering bedank vir sy ondersteuning tydens die bevrydingstryd, asook vir sy volgehoue ondersteuning ná Namibië se onafhanklikwording.Hy het voorts bygevoeg dat die raad se legitimiteit versterk moet word en dat maatreëls getref moet word om kapasiteit te verhoog vir die raad om sy pligte in die handhawing van internasionale vrede en veiligheid voldoende uit te voer.“Dit is een van die opdragte wat ek in die kantoor gekry het toe ek in Desember 2020 as voorsitter van die Nasionale Raad verkies is. Nadat ek die konsepdokument in Augustus 2021 van die Federasieraad ontvang het, het my kantoor ’n proses begin om die ooreenkoms te finaliseer. Maar die impak van Covid-19 het die hele proses vertraag. Ons twee rade het egter aangehou om te werk totdat ons onsself vandag by hierdie geleentheid bevind,” het hy gesê.Volgens die Russiese media het meer as 40 amptelike parlementêre afvaardigings van byna alle Afrikalande aan die Rusland-Afrika parlementêre konferensie deelgeneem.Die president van die Russiese Federasie, Wladimir Poetin, het konferensiegangers toegespreek en belowe hul ondersteuning aan Afrikalande sal vir jare voortduur.“Ek wil graag beklemtoon dat ons land nog altyd samewerking met Afrikastate geprioritiseer het en sal voortgaan om dit te doen. Dit sal nie ’n oordrywing wees om te sê dat dit een van die onveranderlike prioriteite van Russiese buitelandse beleid is nie,” het Poetin gesê.– republikein@republikein.com.na

Namibië, Rusland skuur skouers

Kommentaar

Republikein 2025-04-16

Meld asseblief aan om kommentaar te lewer

Namibië, Rusland skuur skouers

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie