NEFF in wedloop teen tyd gewikkel

Die Namibia Economic Freedom Fighters (NEFF) bevind hom in ’n wedloop teen tyd om sy momentum te herwin voor die nasionale verkiesings in November.Dit nadat die hof die Verkiesingskommissie van Namibië (ECN) se besluit om dié party te deregistreer tersyde gestel het.In Junie het die ECN besluit om NEFF en die Christian Democratic Voice (CDV) te deregistreer nadat hulle albei glo versuim het om geouditeerde finansiële state in te dien en dit in plaaslike koerante te publiseer.Sedert sy deregistrasie het verskeie NEFF-lede nuwe politieke tuistes gaan soek terwyl ander heeltemal uit die politiek getree het. Een van hierdie mense is die aktivis Michael Amushelelo wat sedertdien by die Landless People’s Movement (LPM) aangesluit het. Die uitspraak kom slegs twee maande voor die nasionale verkiesing en die NEFF het sy verkiesingsveldtog opsy gesit om die saak in die hof te beveg.‘DIT MAAK GEEN VERSKIL’Die politieke ontleder Rui Tyitende meen dat dié uitspraak geen verskil sal maak nie aangesien die party nie werklik relevant was voor die deregistrasie nie. Volgens hom was die vernaamste trekpleister by NEFF Amushelelo wat sedertdien weg is en by die LPM aangesluit het.“NEFF het eers prominent geword in die gedagtes van Namibiërs ná die betogings deur Amushelelo. NEFF is nie ’n georganiseerde party nie, daar is geen struktuur nie,” meen hy.Die politieke ontleder advokaat Tuarirovangu Kasirua het gesê NEFF sal die verkiesing met ’n agterstand betree, aangesien die tyd vir hulle veldtog beperk is.“Hulle is van veldtogtyd beroof en dit is onregverdig teenoor hulle. Ek weet nie of hulle werklik ’n kans staan om hul getalle te herwin nie. “Gegewe die deregistrasie, het die samelewing vertroue verloor om vir die NEFF-party te stem en daar is baie vrae van die publiek,” het sy gesê.AMUSHELELO BLY BY LPMNá gister se uitspraak gelewer is, het Amushelelo gesê hy sal nie weer na die party terugkeer nie.“Daar is niks by NEFF vir my nie en die feit dat hulle terug is, maak geen verskil nie.”Hy meen egter dit is ’n goeie teken dat ons regbank uitgedaag kan word.“Laat ons ons verbind tot politiek van volwassenheid, politiek van idees en om die belange van mense voor die belange van die politici te stel. “Ek wens hulle alles van die beste toe, maar ek bly ’n trotse lid van die Landless People’s Movement,” het Amushelelo gesê.HOFUITSPRAAKIn die uitspraak waarin regter Thomas Masuku die ECN se besluit om NEFF te deregistreer tersyde gestel het, het hy gesê na sy mening het NEFF “die kortste end van die stok ontvang”.Hy het bevind NEFF is nie die geleentheid gegun om oor die kwessie aangehoor te word voor hulle gederegistreer is nie en die ECN het nie die verwagting geskep dat hulle gederegistreer sou word indien hulle nie aan die vereistes voldoen nie.Die party het die vooraanstaande Suid-Afrikaanse prokureur Dali Mpofi ingespan om hul saak in die hoërhof te argumenteer, maar hy kon op die ou einde hulle nie in die hof verteenwoordig nie aangesien hulle nie betyds ’n werkspermit kon bekom nie. ‘HEKSEJAG’Die adjunkpresident van NEFF, Longinus Kalimbu, het gesê hul deregistrasie is bloot ’n politieke heksejag en hy voel die ECN moet verduidelik hoekom hulle nie in vorige boekjare gederegistreer is toe hulle nie finansiële state ingedien het nie.“Mense moet ophou sê die NEFF-leiers het die geld geëet. Die kwessie hier was die tydsberekening en ons kon dit nie beheer nie, want ons is nie in beheer van die ouditeure nie. “NEFF word gedruk deur sekere individue in die kommissie wat sommige mense in sekere politieke partye het, omdat hulle nie teenwoordigheid op die grond het nie. “Hulle sien NEFF is op die grond en om te dink ons het selfs sommige van hierdie kommissarisse gemotiveer en nou werk hulle teen ons,” beweer hy.Hy het ook bygevoeg dat hulle oop is om enige partylede wat vertrek het ná hul deregistrasie, terug te verwelkom.Kalimbo het verder opgemerk dat hulle tot op hede meer as N$450 000 aan die regsgeding alleen bestee het en nog nie inkomende fakture en uitgawes hanteer het nie.– republikein@republikein.com.na

NEFF in wedloop teen tyd gewikkel

Kommentaar

Republikein 2025-04-03

Meld asseblief aan om kommentaar te lewer

NEFF in wedloop teen tyd gewikkel

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie