Nog is dit ten einde niet

Die Namibia Economic Freedom Fighters (NEFF) beplan om vandag weer ’n protesoptog in China Town te hou, en om daarna na die ministeries van binnelandse sake, immigrasie, veiligheid en sekuriteit, van handel en nywerheidsontwikkeling, die belastingagentskap NamRa en die Chinese ambassade op te ruk. Die protesaksie is teen die onwettige invoere van nagemaakte goedere deur Chinese burgers, volgens dié politieke party.Die aansoek om borgtog van NEFF se ekonomiese kommissaris, mnr. Michael Amushelelo, en AR-aktivis mnr. Dimbulukweni Nauyoma gaan vandag in die landdroshof in Katutura voort. Dié duo is saam met ses ander mense in hegtenis geneem in verband met verlede week se protesoptog by China Town in die hoofstad.Intussen het die voorsitter van die plaaslike burgerregteorganisasie ACTION Coalition, mnr Frederico Links, die polisie se gebruik van geweld gedurende verlede week se protesaksie, wat China Town vir die tweede dag toegemaak het, verwerp. Die organisasie is ook bekommerd oor die Namibiese polisie se praktyk om rubberkoeëls en traangas op betogers te gebruik. Joernaliste is ook verlede week beseer.Links sê die polisie het ook in Oktober 2020 ’n soortgelyke taktiek op betogers van die #ShutItAllDown-optog gebruik. “Ons herhaal ons beroep op die polisie om menseregte te respekteer en om sy taktiek om skare te beheer, te verbeter,” sê hy.Links waarsku dat ses jaar van ekonomiese resessie en die impak van Covid-19 groot dele van die Namibiese bevolking in armoede gedompel het, “veral die jeug wat 50% werkloosheid in die gesig staar. “Hierdie omstandighede sal waarskynlik meer protesaksies in die toekoms laat vlam vat. Terwyl protes altyd vreedsaam moet wees, is dit noodsaaklik dat die Namibiese owerhede, veral die polisie, taktieke gebruik wat mense se frustrasies kalmeer eerder as om onvermydelike openbare protes verder te laat opvlam,” sê hy.Die ministerie van nywerheidsontwikkeling en handel het gister ’n mediaverklaring uitgereik. Volgens die kantoor van minister Lucia Iipumbu, is die vyandigheid teenoor buitelanders se besighede ’n bedreiging vir handel en mededinging in Namibië. Die ministerie sê hulle werk sedert 2006 saam met die privaat sektor om oplossings tot kwessies te vind, en dat dit vanaf 2010 tot 2020 ’n komitee uit verteenwoordigers van die ministerie van finansies, NamRa, die arbeidsministerie, die ministerie van stedelike en landelike ontwikkeling, die ministerie van binnelandse sake, immigrasie, veiligheid en sekuriteit, die Maatskaplike Voorsorgkommissie (SSC) en Nampol, saamgestel het om beleidskwessies, wetgewing en toesig oor besigheidspraktyke te probeer verbeter. Ondersteuning vir die proses om toepaslike wetgewing te verbeter, is beter as om vyandigheid te kweek, volgens die ministerie.Swapo se jeugliga het gister ook ’n spreekbeurt gekry in ’n vrystelling waarin hulle ’n beroep op die finansministerie doen om ondersoek by China Town in te stel. Hulle doen ook ’n beroep op die arbeidskommissaris en vakbonde wat aan Swapo verbind is om meer te doen om arbeidskwessies te takel. Die jeugliga het die Windhoekse munisipaliteit versoek om dokumentasie vir die goedkeuring van besighede in China Town te verskaf.Intussen skryf ’n politieke ontleder die broeiende onrus en jong Namibiërs se woede aan die moeilike politieke klimaat in die land toe. “Daar is ’n magdom frustrasie en teleurstelling en mense is desperaat na die Covid-pandemie. Dit gaan sleg met mense,” sê mnr. Christie Keulder, navorser en politieke ontleder.“Ons sit met ’n situasie waar die regering hardop gesê het daar is nie geld nie en mense moet niks verwag nie.”Keulder sê hoewel NEFF ’n baie klein party is “en ‘n mens nie Amushehelo se persoonlikheid uit die ding kan haal nie”, is wat tans waargeneem word ‘n bewys dat die ouer, gevestigde politieke partye nie vir die jonger mense ‘n politieke tuiste bied nie.“Die meerderheid van jong Namibiërs voel hulle is nie na aan partye nie. Hulle vertroue in hierdie politieke partye en leiers het afgeneem,” sê Keulder.Hy sê Swapo as ‘n politieke beweging kweek nie nuwe leiers nie. “Vir jonger Namibiërs, wat ná onafhanklikwording gebore is, is die ouer leiers se geloofsbriewe uit die vryheidstryd nie meer relevant nie.Keulder sê die land gaan ’n tydperk van onsekerheid binne en hy verwag alliansies tussen partye om ‘n politieke heenkome vir jonger kiesers te skep. – republikein@republikein.com.na

Nog is dit ten einde niet

Kommentaar

Republikein 2025-01-28

Meld asseblief aan om kommentaar te lewer

Nog is dit ten einde niet

Kommentaar

Republikein 2025-01-28

Meld asseblief aan om kommentaar te lewer

MELD AAN

Advertensie