Onafhanklike kandidate uit

“Vir hierdie verkiesing is daar geen onafhanklike kandidate nie.”

Só het Elsie Nghikembua, die voorsitter van die Verkiesingskommissie van Namibië (ECN), gister gesê.

Dit was onmiddellik nadat sy die laaste drie aansoeke vir onafhanklike kandidate in die komende presidensiële verkiesing afgekeur het, en uitgebrei het oor die redes waarom Elsie Chen, Jeremia Kaambo of selfs Ally Angula se name nie later vanjaar op die stembrief sal verskyn nie.

Die ECN het gister die openbare vergadering afgesluit vir die amptelike aankondiging van kandidate en politieke partye wat aan die presidensiële en parlementêre verkiesings op 27 November sal deelneem.

Die onafhanklike kandidate het Woensdag uitstel gekry tot gister om tekortkominge in hul aansoeke reg te stel. Hulle het egter in hul pogings misluk.

Nghikembua sê Chen het nie die nodige handtekeninge van 500 geregistreerde kiesers in enige van die streke gekry vir haar nominasie as onafhanklike presidentskandidaat nie.

Kaambo het ook nie daarin slaag om aan dié vereiste te voldoen nie, maar boonop stem sy handtekening op aansoekvorm no. 17 nie ooreen met sy handtekening op die stemrol nie.

Ally Angula kon ook nie die nodige 7 000 kiesershandtekeninge landswyd insamel nie en van haar ondertekenaars se handtekeninge stem ook nie ooreen met die handtekeninge op die stemrol nie.

Sy kon volgens Nghikembua net 5 653 ondertekenaars van 8 uit die 14 streke kry, 1 347 te min. Angula het egter die skuld op die ECN se rekenaarstelsel geplaas.

“Nadat ons gister (vir die verlenging) hier weg is, is hierdie stelsel aangeskakel sodat ons net vier minute ná agtuur die aand kon laai.

“Die stelsel het vanoggend sesuur weer afgegaan. Daar is vir ons gesê ons sal tot negeuur vanoggend kan indien. Dus sal ons nie teen die stelsel veg nie.

“Dit is duidelik opgestel om ’n spesifieke doelwit te bereik, maar dit ondersteun nie onafhanklike kandidate nie,” sê sy.

Angula is vasbeslote dat sy ook nie namens enige politieke party aan die presidensiële verkiesing sal deelneem nie.

“Natuurlik is ek teleurgesteld,” sê sy.

Nghikembua het egter by navraag gesê onafhanklike kandidate word genooi om handgeskrewe vorms in te handig indien hulle probleme met die aanlyn stelsel ondervind.

“Ons het ook die fisieke vorms aanvaar,” volgens die voorsitter.



ITULA

Panduleni Itula, die president en presidentskandidaat vir die Independent Patriot for Change (IPC), wat in 2019 as ’n onafhanklike kandidaat meegeding het, sê “dit gaan nie net oor die insamel van handtekeninge nie, jy moet ook ’n strategie hê”.

Itula sê: “Ek verstaan ??die pyn en die frustrasie, veral vir diegene wat vir die nasie gesê het hulle sal onafhanklike kandidate wees.”

Hy voeg egter by dat niemand hom genader het om uit te vind hoe hy dit reggekry het nie.



AANVAARDE KANDIDATE

Nghikembua het by dieselfde geleentheid aangekondig dat Erastus Shuumbwa namens die Action Democratic Movement sal meeding, Job Amupanda namens die Affirmative Repositioning (AR), Ambrosius Kumbwa namens die All People’s Party (APP) en Festus Thomas namens die Body Of Christ Party.

Vaino Amuthenu sal die Congress of Democrats (CoD) verteenwoordig, Panduleni Itula die IPC, Bernadus Swartbooi die Landless People’s Movement (LPM), Epafras Mukwiilongo die Namibia Economic Freedom Fighters (NEFF), McHenry Venaani die Popular Democratic Movement (PDM), Mike Kavekotora die Rally for Democracy and Progress (RDP), Henk Mudge die Republican Party (RP), Evilastus Kaaronda vir Swanu, Netumbo Nandi-Ndaitwah vir Swapo, Hendrik Gaobaeb vir die United Democratic Front (UDF) en Sakaria Likuwa vir die United Namibians Party.

– [email protected]