'Ons word besig gehou met nonsens'

Die leier van die Affirmative Repositioning Movement (AR), Job Amupanda, sê die LGBTQ+-bespreking is nie ’n wesenlike kwessie waaroor hy kop behoort te verloor nie.

Hy het dit as ’n “baie flou gesprek” beskryf en gesê dit is nie eens vir hom nodig om standpunt daaroor in te neem nie.

“Almal word geterroriseer. As jy ’n opinie oor iets het, sê hulle jy is homofobies. Jy het die reg om van iets te hou of nie.”

Die AR-aktivis het gereageer op vrae op InConversationWithJobAmupanda wat deur Mwahafar Ndilula op die X-platform uitgesaai word.

Ndilula het Amupanda gevra vir sy standpunt oor LGBTQ+ as ’n aspirant-president en of Namibiërs vir hom in die nasionale en presidentsverkiesings in November moet stem.

Amupanda sê hy is meer bekommerd oor die hoë werkloosheidsyfer en nie “mense se seksualiteit” nie.

Volgens hom is hy bekommerd oor die ekonomie van die land en kan hy nie “flou gesprekke” voer wat nie vir hom nodig is nie.

Amupanda sê die LGBTQ+-gemeenskap trek voordeel uit besprekings oor onderwys en gesondheid en alle nasionale onderwerpe het dit gedek omdat niemand van die groep in Namibië daaroor geteister word nie.

“Ek beskou dit nie as veel van ’n kwessie nie, want korrupsie raak almal. Is dit die basis van die stemming of ek gay ondersteun of nie?

“Laat ek daardie stem verloor. Niemand word in Namibië weens hul seksualiteit vermoor nie. Dit is nie ’n nasionale gesprek nie,” het Amupanda gesê.

Volgens hom is daar ’n reg vir die samelewing en ’n reg vir individue en dit geld ook vir die regte van homoseksuele mense.

’n Sigbaar geïrriteerde Amupanda het gesê daar is ’n nuwe neiging waar mense bevestiging soek en daar is ’n aanname dat daar ’n universaliteit is wat die hooggeregshof se uitspraak oor selfdegeslaghuwelike in Namibië betref.

Volgens hom is daar mense wat hul seksualiteit ken en hulle is waarskynlik tevrede daarmee. Hulle hou hul seksualiteit vir hulself en stal dit nie uit nie, volgens Amupanda.

“Kom ek na jou huis en sê ‘sien jy dat ek straight is?’ Hoekom het ons meer mans as vroue in die weermag? Of ons daarvan hou of nie, ons moet die natuur respekteer.

“Gaan ons begin vra hoeveel gays is in die tronk en hoeveel is korrup? Miskien mense wat niks het om te doen nie,” het hy gesê.

Amupanda het bygevoeg hy gaan nie rond en sê gay mense moet verbrand word nie en dit is genoeg.

“Deur hierdie minute te gebruik om daarop te reageer, is ’n mors van tyd. Ek behoort te reageer oor diamant- en mynboutransaksies sowel as landbou," het Amupanda gesê.

Ndilula gebruik sy platform om met leiers in gesprek te tree en inwoners die geleentheid te gee om deel te neem.

Tot op hede was hy gasheer vir die onafhanklike presidentskandidaat Ally Angula, die nasionale woordvoerder van die Landless People’s Movement (LPM), Lifalaza Simataa, asook die Independent Patriot for Change (IPC) se woordvoerder, Imms Nashinge.

– [email protected]