Partye daag deregistrasie ‘voor sperdatum’ uit

Die Namibia Economic Freedom Fighters (NEFF) daag die Verkiesingskommissie van Namibië (ECN) se besluit uit om dié party te deregistreer.Dit nadat die ECN die party in ’n brief gedateer 24 April ingelig het dat hy tot 30 Junie het om sy geouditeerde finansiële state in te dien en te publiseer. Nuus oor die deregistrasie van die NEFF, tesame met die Christian Democratic Voice (CDV), het Maandagaand gebreek – ses dae voor dié sperdatum. Daarin het Peter Shaama, die hoofkiesbeampte van die ECN geskryf: “Hierdie kommunikasie is ’n herinnering aan jou party dat daar volgens Artikel 158 van die Kieswet 5 van 2014, soos gewysig, van die party verwag word om nie later nie as 30 Junie ’n geouditeerde finansiële staat en sy koerantpublikasies vir die staatsbefondsde rekening in te dien.”Shaama het die party aangemoedig om by die sperdatum te hou en bygevoeg dat geen uitstel toegestaan sal word nie. Maar in ’n onverwagte wending is die NEFF en CDV meegedeel dat hulle gederegistreer is en dat hul wetgewers die parlement moet ontruim.Dit beteken die NEFF-leier, Epafras Mukwiilongo, en sy adjunk, Kalimbo Iipumbu, moet die parlement verlaat, asook die CDV se Gotthard Kandume.‘ONREëLMATIG’ NEFF het die prokureur Kadhila Amoomo se dienste ingeroep om te argumenteer dat die party se deregistrasie onreëlmatig is.Die ECN het die party daarvan beskuldig dat hy versuim het om sy geouditeerde finansiële state vir die tydperk van 2022-’23 in te dien, asook om 2020-’21 en 2021-’22 se verkorte weergawes van geouditeerde finansiële state in twee dagblaaie te publiseer wat oraloor Namibië gesirkuleer word, soos die die wet vereis.Amoomo het geskryf: “[Die ECN] het geen magte om ’n politieke party te deregistreer in die geval van sy versuim om sy geouditeerde rekeninge by die kommissie in te dien nie, totdat en tensy hy die bevoegdhede beoog in artikel 140(6) uitoefen, wat voorsiening maak vir die kommissie om die betrokke rekeninge te laat oudit en vereis dat die politieke party die geouditeerde rekeninge by die kommissie indien en dit publiseer in twee dagblaaie wat oraloor Namibië gesirkuleer word, vir die betrokke politieke party se onkoste.“Dit is ons opdrag dat die [ECN] nie ons kliënt ’n geleentheid gegee het om ingevolge Artikel 152(f) aangehoor te word nie. Die besluit moet dus tersyde gestel word op grond hiervan.”Hy het bygevoeg: “Die besluit strook ook nie met die korrespondensie wat deur die kommissie aan [NEFF] gerig is nie, waarin [NEFF] ’n sperdatum van 30 Junie toegestaan is.”Die prokureur het gesê die ECN tree op asof ’n derde party hom opdrag gegee het om hierdie drastiese stappe te neem.“Hierdie teenstrydighede in u optrede skep ’n vrees in die gedagtes van ons kliënt dat u moontlik onder die invloed van eksterne partye optree, aangesien ons hierdie jaar op ’n verkiesing afstuur. Ons moedig u aan, mnr, Shaama, om ’n oop gemoed te handhaaf en alle sin vir redelikheid en regverdigheid teenoor alle politieke partye in Namibië te behou.”‘SUIWER LEUENS’Gothard Kandume van die CDV het Dinsdag na die ECN gekap en gesê dit is “suiwer leuens”.“Ons het ’n sperdatum van 30 Junie wat nog nie hier is nie en wat ons met die ECN ooreengekom het. Hoe kan hulle so ’n besluit neem?” wou hy weet. Die ECN se woordvoerder, De Wet Siluka, het Dinsdag gesê die kommissie sal op vrae oor die partye se deregistrasie reageer, maar het egter nog nie teen druktyd nie. – republikein@republikein.com.na

Partye daag deregistrasie ‘voor sperdatum’ uit

Kommentaar

Republikein 2025-04-03

Meld asseblief aan om kommentaar te lewer

Partye daag deregistrasie ‘voor sperdatum’ uit

Kommentaar

Republikein 2025-04-03

Meld asseblief aan om kommentaar te lewer

MELD AAN

Advertensie