'Partyleiers moet in parlement wees'

Met die meeste opposisiepartye se leiers wat na verwagting as enkele verteenwoordigers van hul partye in die Nasionale Vergadering (NV) sal dien, voer die redakteur van Namibia Fact Check, Frederiko Links, aan dat hierdie reëling polities sin maak.

Hy het gereageer op kritiek wat gerig is teen leiers van politieke partye wat die enkele setel sal beklee wat die betrokke party in die NV-verkiesing in November verower het.

Volgens die Verkiesingskommissie van Namibië (ECN) het sewe van die 13 politieke partye wat op pad parlement toe is, net een setel verwerf. Dié partye sluit in die Namibia Economic Freedom Fighters (NEFF), die All People’s Party (APP), Body of Christ (BoC), Swanu of Namibia, die Republican Party (RP), die National Unity Democratic Organisation (NUDO) en die National Democratic Party (NDP).

Volgens lyste vir die NV wat in die Staatskoerant gepubliseer is, word die leiers van die bogenoemde politieke partye eerste geplaas en sal dien as die enigste verteenwoordiger van hul partye in die parlement.



UITDAGING

Die RP se leier, Henk Mudge, het verlede week aan Netwerk Media Hub (NMH) gesê sy party se leierskap sal besluit wie hul enkele setel sal beset.

Mudge het die uitdaging erken om parlementêre pligte en die party se leierskap te behartig, veral in partye wat net een setel het.

Volgens Mudge sal verskeie verteenwoordigers die moontlikheid bied om verantwoordelikhede meer doeltreffend te deel.

Kritici het ook kommer uitgespreek, veral oor leiers van partye wat setels in vergelyking met vorige verkiesings verloor het. Hulle voer aan dat sulke leiers nie daarin geslaag het om hul partye te laat groei nie en moet dit oorweeg om opsy te staan om ander toe te laat om die party in die parlement te verteenwoordig.



VERDEDIG

In teenstelling hiermee glo Links ’n leier van ’n politieke party moet in die parlement teenwoordig wees, ongeag die aantal setels wat die party het.

“As hulle nie die regering lei nie, moet die leier van jou politieke party in die parlement wees. Dit is hoe dit wêreldwyd is. In parlemente oraloor is die leiers van politieke partye in die parlement,” het Links gesê.

Volgens hom is dit ondoeltreffend wanneer iemand die party in die parlement verteenwoordig, terwyl die leier buite die nasionale besluitnemingsarena staan.

“Jy kan nie ’n leier wees as jy buite die nasionale besluitnemingsarena staan nie,” het hy beklemtoon.



VERANTWOORDELIKHEID

Links het ook argumente verwerp dat dit te veel druk op partyleiers is om beide parlementêre pligte asook verantwoordelikheide van die partyleierskap te hanteer.

Hy het daarop gewys dat politieke partye tipies administratiewe strukture in plek het om hierdie organisatoriese take te verrig.

“Daar is administrasie en al daardie, maar waarom is jy die leier van die party? As dit te veel werk is, waarom is jy in die politiek? Dit maak nie sin nie,” het hy gesê.

“Waarom is jy in die politiek as dit te veel werk is om op die hoogste vlak te wees en jou ondersteuners te verteenwoordig?”

Links het beklemtoon om partyleiers in die parlement te hê, verseker dat hulle verantwoordbaar tot hul ondersteuners bly en aktief aan nasionale besluitnemingsprosesse deelneem.

– [email protected]