PDM, Swanu eerste met manifeste
Swapo skop naweek af met kieskollege
Net twee van die partye wat aan November se nasionale en presidensiële verkiesings deelneem, het tot dusver hul manifeste bekend gestel.
Met net minder as drie maande oor tot die nasionale verkiesing, skarrel die meeste politieke partye steeds om hul huise in orde te kry wanneer dit kom by die bekendstelling van hul manifeste en die finalisering van hul parlementêre lyste.
Met die vorige verkiesing het alle deelnemende politieke partye hul onderskeie manifeste reeds twee maande voor die kiesdatum bekend gestel.
Tot dusver het slegs die Suidwes-Afrika Nasionale Unie (Swanu) en die Popular Democratic Movement (PDM) uit die 20 geregistreerde politieke partye hul verkiesingshandveste vrygestel. Nie een van die partye het hul konvensies gehou om verteenwoordigers tot die Nasionale Vergadering (NV) te verkies nie.
Wanneer kiesers gereed maak om hul stem uit te bring, sal die manifeste van die partye hulle help om ’n ingeligte besluit te neem oor waar om hul kruisie te trek.
Swanu se president, Evilastus Kaaronda, het tydens die bekendstelling van die partymanifes gesê die party sal sy aandag daarop toespits om die land se gesondheid- en onderwysstelsels en die groei van die landelike ekonomie te verbeter indien die kiesers se keuse op dié party val om die land te lei.
McHenry Venaani, die president van die PDM, het van sy kant beloof om die land se werkloosheid- en behuisingskrisisse te takel.
Op die gebied van landbou het Venaani gesê sy party sal verseker dat 10% van die nasionale begroting aan voedselproduksie toegewys word.
Die Instituut vir Openbare Beleid en Navorsing (IPPR) het in sy 2019-verslag oor verkiesingsmanifeste gewaarsku dat die laat publikasie hiervan – in sommige gevalle minder as drie weke voor die verkiesing, of glad nie – toegang tot inligting vir kiesers beperk, aangesien hulle dan beperkte tyd het om hulself ten volle te vergewis van die beloftes van die deelnemende politieke partye.
Die ACTION-koalisie het op hul beurt dié neiging afgekeur en gesê dat “politieke partye traag was om hul manifeste vry te stel, wat nie genoegsame tyd bied vir kiesers om ingeligte keuses te maak oor die party waarvoor hulle stem nie.”
Die IPPR het gesê Namibiese politieke partye fokus dikwels op verkiesings as ’n gebeurtenis en fokus hul kommunikasie op die veldtogperiode eerder as om hul kommunikasie in lyn met die hele verkiesingsiklus te sien.
“Die kiesers, as deel van sy reg om aan politieke aktiwiteite deel te neem, moet ingelig word oor hoe politieke partye en politieke kandidate die sleutelkwessies takel wat in die samelewing en in die parlement ter sprake kom,” het die IPPR gesê.
“Hulle moet weet dat die party waarvoor hulle gestem het – wen of verloor – toegewyd is om te veg vir die kwessies waarvoor hulle gesê het hulle sal veg.
“Hulle moet ernstig en op ’n deurlopende basis betrokke wees. En hulle het beloftes nodig wat gekoppel word met optrede,” het die instituut beklemtoon.
Wat die kieskollege betref, sal Swapo eerste hiermee uit die blokke wees met sy kieskollege wat na verwagting eerskomende naweek in die hoofstad sal plaasvind.
– [email protected]
Met die vorige verkiesing het alle deelnemende politieke partye hul onderskeie manifeste reeds twee maande voor die kiesdatum bekend gestel.
Tot dusver het slegs die Suidwes-Afrika Nasionale Unie (Swanu) en die Popular Democratic Movement (PDM) uit die 20 geregistreerde politieke partye hul verkiesingshandveste vrygestel. Nie een van die partye het hul konvensies gehou om verteenwoordigers tot die Nasionale Vergadering (NV) te verkies nie.
Wanneer kiesers gereed maak om hul stem uit te bring, sal die manifeste van die partye hulle help om ’n ingeligte besluit te neem oor waar om hul kruisie te trek.
Swanu se president, Evilastus Kaaronda, het tydens die bekendstelling van die partymanifes gesê die party sal sy aandag daarop toespits om die land se gesondheid- en onderwysstelsels en die groei van die landelike ekonomie te verbeter indien die kiesers se keuse op dié party val om die land te lei.
McHenry Venaani, die president van die PDM, het van sy kant beloof om die land se werkloosheid- en behuisingskrisisse te takel.
Op die gebied van landbou het Venaani gesê sy party sal verseker dat 10% van die nasionale begroting aan voedselproduksie toegewys word.
Die Instituut vir Openbare Beleid en Navorsing (IPPR) het in sy 2019-verslag oor verkiesingsmanifeste gewaarsku dat die laat publikasie hiervan – in sommige gevalle minder as drie weke voor die verkiesing, of glad nie – toegang tot inligting vir kiesers beperk, aangesien hulle dan beperkte tyd het om hulself ten volle te vergewis van die beloftes van die deelnemende politieke partye.
Die ACTION-koalisie het op hul beurt dié neiging afgekeur en gesê dat “politieke partye traag was om hul manifeste vry te stel, wat nie genoegsame tyd bied vir kiesers om ingeligte keuses te maak oor die party waarvoor hulle stem nie.”
Die IPPR het gesê Namibiese politieke partye fokus dikwels op verkiesings as ’n gebeurtenis en fokus hul kommunikasie op die veldtogperiode eerder as om hul kommunikasie in lyn met die hele verkiesingsiklus te sien.
“Die kiesers, as deel van sy reg om aan politieke aktiwiteite deel te neem, moet ingelig word oor hoe politieke partye en politieke kandidate die sleutelkwessies takel wat in die samelewing en in die parlement ter sprake kom,” het die IPPR gesê.
“Hulle moet weet dat die party waarvoor hulle gestem het – wen of verloor – toegewyd is om te veg vir die kwessies waarvoor hulle gesê het hulle sal veg.
“Hulle moet ernstig en op ’n deurlopende basis betrokke wees. En hulle het beloftes nodig wat gekoppel word met optrede,” het die instituut beklemtoon.
Wat die kieskollege betref, sal Swapo eerste hiermee uit die blokke wees met sy kieskollege wat na verwagting eerskomende naweek in die hoofstad sal plaasvind.
– [email protected]
Kommentaar
Republikein
Geen kommentaar is op hierdie artikel gelaat nie