Politieke partye gesny, finansiële state onthul

Die Verkiesingskommissie van Namibië (ECN) is besig met ’n veldtog om die lys politieke partye wat aan die komende nasionale verkiesings gaan deelneem, te verminder.Reeds teen die einde van Februarie het die ECN die snoeiskêr ingelê toe die deregistrasie van drie sluimerende partye aan die lig gekom het.Die politieke partye die Democratic Coalition of Namibia (DCN), die Federal Convention of Namibia (FCN) en die Namibia Democratic Movement for Change (NDMC) is gevolglik van die lys verwyder.Verlede Maandag is dit bekend gemaak dat die Christian Democratic Voice (CDV), die Democratic Party of Namibia (DPN), en die Namibia Economic Freedom Fighters (NEFF) ook gederegistreer is.NEFF se prokureur, Kadhila Amoomo, het gesê die ECN het nie die reg om dié party voor die sperdatum van 30 Junie te deregistreer nie.Die CDV se parlementslid, Gotthard Kandume, wat ook saam met twee NEFF-parlementslede sy setel in die nasionale vergadering moet prysgee, verwys ook na die sperdatum van 30 Junie, volgens berigte in Republikein se susterkoerant Namibian Sun.Die ECN se hoofkiesbeampte, Peter Shama, se verduideliking is Donderdagaand net ná middernag vrygestel.Hy het verwys na die Verkiesingswet van 2014 se artikels 140 en 158 se vereistes vir finansiële rekordhouding, indiening en openbaarmaking van staatsfinansiering vir partye wat in die parlement teenwoordig is.Die ECN nader reeds sedert 2019 al die politieke partye om aan die wet te voldoen. Artikel 152 van die wet laat die ECN toe om partye se registrasie op te skort, nadat die partye persoonlik genader en ingelig is, het Shama gesê.Volgens hom is dit in Junie 2023 gedoen, maar die CDV kon daarna slegs state vir die 2021-’22-boekjaar indien.Teen 25 April het die CDV ’n finale uitstel van 14 dae gekry, maar Shama sê tot op datum is geen verdere finansiële rekords ingedien nie.Hy sê die DPN het nog nie op enige kommunikasie gereageer nie.Met betrekking tot NEFF, sê Shama dat finansiële state vir die boekjare 2020-’21, 2021-’22 en 2022-’23 uitstaande was, ondanks beloftes van NEFF se ouditeure en herhaaldelike uitstel, en dat slegs state vir 2021 en 2022 op 31 Mei by die kommissie ingedien is.Die state vir 2022-’23 is steeds uitstaande en is ook nie teen die sperdatum van 10 Mei in twee nasionale koerante gepubliseer, soos deur die wet vereis word nie, sê hy.Hy sê die sperdatum van 30 Junie is vir die indiening van finansiële state drie maande ná die einde van ’n politieke party se boekjaar, in dié geval vir 2023-’24, en het niks te doen met die sperdatum van 10 Mei vir die openbaarmaking van state nie.Nietemin het die regerende Swapo-party, die United Democratic Front of Namibia (UDF) en die Independent Patriots for Change (IPC) almal hul verkorte finansiële state Vrydag in die Nuwe Era, Republikein, Namibian Sun en Algemeine Zeitung laat publiseer, op die laaste moontlike drukdag voor 30 Junie.Die gedrukte state is nie maklik om te ontleed nie. Dit blyk egter dat Swapo teen Maart vanjaar bates van sowat N$12 miljoen gehad het en die totale nagenoeg N$96,5 miljoen wat die party vir die 2024-boekjaar toegeken het, aan politieke uitgawes bestee het.Die UDF se gedrukte state is tot Maart 2023 en toon bates van N$436 346 met inkomste van N$3,462 miljoen teenoor uitgawes van N$3,511 miljoen vir die finansiële jaar.Die IPC se state is tot 31 Desember 2023 en toon bates van net meer as N$767 000, inkomste van sowat N$3,8 miljoen en uitgawes van N$4,458 miljoen vir dié boekjaar.NEFF se finansiële state is reeds op 26 Junie in Namibian Sun gepubliseer. Die party se verslag vir die boekjaar tot Februarie 2023 toon bates van nagenoeg N$985 000, inkomste van sowat N$1,73 miljoen en uitgawes van sowat N$2,36 miljoen, wat ’n verlies van sowat N$686 500 toon.NEFF-aktivis Michael Amushelelo sê op sosiale media: “Die Verkiesingskommissie van Namibië is heeltemal bevooroordeeld en korrup”, en “die ECN is nie ’n onafhanklike instelling wat vertrou kan word om ons verkiesings op ’n vrye en regverdige manier te hou nie”.Die optog wat hy vir 5 Julie teen die ECN beplan het, is egter Saterdag opgeskort weens regsadvies, volgens Amushelelo.Die ECN se woordvoerder, De Wet Siluka, het bevestig daar is tans 17 politieke partye geregistreer, nadat die Affirmative Repositioning (AR) verlede week geregistreer is.Die ECN kon egter nie die volledige lys van geregistreerde partye teen druktyd verskaf nie.– augetto@republikein.com.na

Politieke partye gesny, finansiële state onthul

Kommentaar

Republikein 2024-11-22

Meld asseblief aan om kommentaar te lewer

Politieke partye gesny, finansiële state onthul

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie