Regering worstel met betalings aan veterane

Elizabeth Kheibes – Die regering het erken hy kan nie byhou met Swapo se 2022-kongresbesluit dat alle veterane van die vryheidstryd voor 2024 uitbetalings moet ontvang nie, ’n stap wat volgens waarnemers ten doel het om die vryheidsvegters te paai voor vanjaar se belangrike algemene verkiesing.Die minister van verdediging en veteranesake, Frans Kapofi, het bevestig dat “’n beduidende aantal veterane nie aandag sal geniet nie”, ’n situasie wat waarskynlik talle woedend sal maak voor die verkiesings in November.Kapofi het geworstel met die finansiering van Swapo se ambisieuse opdrag en het verlede jaar gesê terwyl die regering simpatiseer met vryheidsvegters wat nog nie hul “teken van waardering” ontvang het nie, die regering mededingende prioriteite gehad het om aan aandag te skenk.“Die regering finansier almal. Dit kan nie net veterane se projekte finansier nie. Ons moet net tevrede wees met wat ons het,” is hy destyds aangehaal.Die situasie het ’n jaar gelede tot ’n konfrontasie gelei toe Kapofi in ’n video wat tydens ’n vergadering geneem en wyd in die sosiale media versprei is, gesê die veterane het voorgestel dat die regering olifante moet doodmaak en verkoop om geld in te samel om sy verpligtinge aan die vryheidsvegters na te kom.DRUK NEEM TOEDie besluit oor uitbetalings wat by Swapo se kongres in 2022 geneem is, lui: “Die party beveel die regering om die kontantuitbetalings aan veterane van die vryheidstryd voor 2024 ten volle te verwesenlik en om die aansoek deur die veteranevereniging vir affiliasie-lidmaatskap te bespoedig en af te handel.”In die afgelope boekjaar is N$941 miljoen van die N$1,2 miljard wat aan veterane-aangeleenthede toegeken is aan kwalifiserende veterane en hul afhanklikes – altesaam 21 428 mense – bestee.“Die grootste kostedrywer in die begroting was die betaling van die maandelikse toelaes aan die veterane,” het Kapofi onlangs gesê in sy toespraak om sy ministerie se begroting te motiveer.Met die verkiesings wat in November plaasvind, neem die druk op die regering egter toe om geld uit te betaal aan die oorblywende kwalifiserende veterane, wat sê die regering neem te lank en sommige vrees dat hulle kan doodgaan voor hulle die geld ontvang.Tans het die ministerie ’n agterstand van 11 000 ongefinansierde individuele veteraanaansoeke wat van 2013 dateer, het Kapofi onlangs aan die parlement gesê.“Die aantal [individuele veteraanaansoeke] wat op finansiering wag, is egter nie konstant nie, want veterane wat voorheen nie aansoek gedoen het nie, doen nou aansoek, terwyl die veterane wie se aansoeke deur die appèlraad goedgekeur is ook vir daardie voordeel in aanmerking kom,” het hy gesê.In die huidige begroting is N$1,4 miljard vir veteranesake bewillig. Altesaam N$589 miljoen hiervan sal gekanaliseer word om die maandelikse toelaes aan kwalifiserende veterane te betaal.Altesaam N$17 miljoen sal gebruik word om ’n eenmalige bedrag aan 338 veterane te betaal wie se appelaansoeke onlangs suksesvol was, terwyl N$263 miljoen aan individuele projekte vir 1 548 veterane toegeken word.EFFENSE STYGINGKapofi het erken dat meer veterane vanjaar nie finansiering sal ontvang nie. “Met hierdie toekenning sal ’n aansienlike aantal veterane nie aandag geniet nie,” het hy toegegee. Die geld word betaal aan oudvegters van Swapo se militêre vleuel, die People’s Liberation Army of Namibia (Plan), asook aan voormalige politieke gevangenes van Robbeneiland en Kai //Ganaxab.Kapofi het gesê die huidige N$2 200 wat kwalifiserende veterane tans per maand ontvang, sal verhoog word, maar hy het nie aangedui met hoeveel nie. “Die toename word toegeskryf aan aftrede, mense wat medies ongeskik verklaar is om te werk (medical boarding) en suksesvolle appellante,” het hy gesê.Plan se voorsitter, Bamba Nghipandua, het Dinsdag aan Republikein se susterkoerant Namibian Sun gesê hoewel hy geen inligting het oor hoe ver die proses is om aan Swapo se kongresbesluit te voldoen nie, is hy bewus daarvan dat betalings sal afhang van die bedrag wat in die begroting beskikbaar gestel word.“Ek het geen inligting vir jou nie, maar wat ek in die huidige begroting gesien het [is dat] dit lyk of daar ’n effense toename in die betalings is. [Ek] hoop dat die hele doel is om die betaling van veteraneprojekte te dek,” het hy gesê. – republikein@republikein.com.na

Regering worstel met betalings aan veterane

Kommentaar

Republikein 2025-04-16

Meld asseblief aan om kommentaar te lewer

Regering worstel met betalings aan veterane

Kommentaar

Republikein 2025-04-16

Meld asseblief aan om kommentaar te lewer

MELD AAN

Advertensie