Spekulasies oor NNN se keuse vir visepresident

Nuusredaksie – Lede in Swapo se binnekringe meen die aangewese president, Netumbo Nandi-Ndaitwah, het nog niks oor haar naderende kabinetsaanstellings verklap nie.Daar word egter binne die party bespiegel dat sy oudminister Alpheus !Naruseb as haar visepresident gaan verkies.Nandi-Ndaitwah, wat volgende maand as president ingesweer word, het tot dusver haar keuses ’n geheim gehou en partyleiers wag in spanning vir die name om bekend gemaak te word.Sommige partylede meen Nandi-Ndaitwah het verlede jaar ’n harde les geleer toe sy haar 10 parlementêre genomineerdes voortydig aangekondig het voor die stemmery by Swapo se kieskollege begin het.Onder diegene wat sy op Swapo se parlementêre lys benoem het, was Saara Kuugongelwa-Amadhila, Ephraim Nekongo, Indileni Daniel, Ruth Maseke, Elijah Ngurare, Linda Mbwale, Dino Ballotti, Fenny Tutjavi, Erastus Haitengela en !Naruseb.!NARUSEBDie voormalige minister van grond en hervestiging, !Naruseb, was ’n verrassende keuse by verlede jaar se Swapo-kieskollege nadat hy in politieke duisternis vervaag het ná sy bedanking uit die parlement in 2020. Sy vertrek het gekom nadat hy nie deur wyle president Hage Geingob in die kabinet aangestel is nie. Hy het laas tot Maart 2020 die portefeulje van die ministerie van landbou gehou.“Die visepresident moet gekies word uit diegene wat setels in die parlement verkry het, wat die agt niestemgeregtigde aangesteldes uitsluit. As jy op soek is na potensiële kandidate, moet jy die lys van 51 wat die parlement gehaal het, bestudeer,” het een van die partyleiers gesê.Die bron het bygevoeg: “Gewoonlik, met die inagneming van Swapo se beleid op 50/50-geslagsverteenwoordiging, sal ’n vrouepresident ’n mansvisepresident kies. Daar is heelwat sprake dat !Naruseb die keuse vir visepresident sal wees, aangesien daar min ander lewensvatbare opsies uit die parlementêre lys is.”!Naruseb word volgende maand 71 en het voorheen as minister in vier verskillende portefeuljes tussen 2005 en 2020 gedien. Dit sluit arbeid, grond, werke en landbou in. Sy senioriteit op Swapo se parlementêre lys versterk sy kandidatuur vir die pos van visepresident.PLANNE STEEDS DUISTERDie uitslae van die kieskollege het talle senior partyfigure, insluitend sommige van Nandi-Ndaitwah se getroue bondgenote, ’n harde slag toegedien.Een daarvan was die adjunkminister van werke en vervoer, Veikko Nekundi, wat laer as 70 op die lys geplaas is. Dit het Nandi-Ndaitwah later gedwing om Haitengela met Nekundi te vervang.“Die aangewese president het besef om haar planne te gou te onthul, kan gevolge hê (backfire). Ek kan met vertroue sê dat selfs die topleierskap min tot geen insig in haar kabinetskeuses het nie. Daar is geen openbaarmaking nie, nie eens spekulasie nie,” het 'n senior partyfiguur gesê.“Almal wag in spanning om te sien of hul name op die finale lys sal wees,” het die bron bygevoeg.‘OPSKUDDING ONVERMYDELIK’Ná Swapo se verlies van 12 setels in verlede jaar se verkiesing het nege senior ministers nie daarin geslaag om die lys van 51 te haal wat vir die parlement kwalifiseer nie. Hulle is Peya Mushelenga (internasionale betrekkinge), Tom Alweendo (myne en energie), Itah Kandjii-Murangi (hoër onderwys), Frans Kapofi (verdediging), Utoni Nujoma (arbeid), Christine //Hoebes (presidensiële sake), Erastus Uutoni (stedelike en landelike ontwikkeling), Obeth Kandjoze (nasionale beplanning) en Anna Nghipondoka (basiese onderwys).Sommige van hierdie ministers hoop om een van die agt setels sonder stemreg – wat Nandi-Ndaitwah in die parlement sal toeken – te verseker wat hulle in staat kan stel om hul kabinetsposisies te behou.Die lot van die minister van justisie, Yvonne Dausab, bly ook onseker aangesien sy nie deur die kieskollege gekwalifiseer het nie.Intussen het verskeie ministers hul voorneme om af te tree bekend gemaak. Dit sluit in Kalumbi Shangula (gesondheid), John Mutorwa (werke en adjunk- eerste minister), Doreen Sioka (geslagsgelykheid), Albert Kawana (binnelandse sake), Agnes Tjongarero (sport) en Calle Schlettwein (landbou).OPTIMISMEGegewe dat 16 huidige ministers nie deel van die nuwe parlementêre lys is nie, is daar groeiende optimisme onder diegene wat gekwalifiseer het omdat hulle ’n beter kans het om na die kabinet deur te dring.“Sommige adjunkministers sien nou ’n geleentheid vir bevordering, terwyl nuwelinge hoop om adjunkministerposte te kry," het ’n partylid opgemerk.Die toekoms van Kuugongelwa-Amadhila is ook ’n besprekingspunt. Sommige bespiegel sy kan dalk die volgende Speaker word, aangesien Peter Katjavivi – wat tans die pos beklee – na verwagting volgende maand sal uittree.– republikein@republikein.com.na

Spekulasies oor NNN se keuse vir visepresident

Kommentaar

Republikein 2025-03-06

Meld asseblief aan om kommentaar te lewer

Spekulasies oor NNN se keuse vir visepresident

Kommentaar

Republikein 2025-03-06

Meld asseblief aan om kommentaar te lewer

MELD AAN

Advertensie