Uitlatings in parlement ‘ontstellend’

Die Popular Democratic Movement (PDM) se hoofsweep in die parlement, me. Elma Dienda, het verlede week gesê verkragting bestaan nie in die huwelik nie. Haar uitspraak volg oor ’n debat wat in die Nasionale Vergadering (NV) woed oor toenemende klagtes oor beweerde voorvalle van verkragting tussen eggenote – met ’n mate van bevraagtekening waar huweliksregte tussen paartjies begin en waar dit eindig.Volgens me. Dianne Hubbard, koördineerder van die Regshulpsentrum (LAC), is die wet op die bekamping van verkragting baie duidelik. “Die huwelik is geen verweer teen ’n klag van verkragting nie. Om enige persoon te dwing om ’n seksuele daad te pleeg, is onder enige omstandighede ’n misdaad in Namibië,” het sy gesê. Die vorige wet het bepaal ’n vrou kan nie haar man van verkragting aankla nie, maak nie saak hoe ernstig die geweld was nie. Die Wet op die Bekamping van Verkragting, (Wet 8 van 2000) bepaal egter geen huwelik of ander verhouding is ’n verweer teen ’n klag van verkragting nie. Dit geld vir beide burgerlike en tradisionele huwelike, sowel as ander verhoudings. As ’n voorval van verkragting buite die huwelik plaasvind, byvoorbeeld weens die gebruik van geweld of dreigemente van geweld, dan sal dit ook as verkragting binne die huwelik geklassifiseer word. Die nuwe wet bepaal verkragting is verkragting, maak nie saak in watter omstandighede dit plaasvind nie. Of dit binne of buite die huwelik plaasvind, is geen verskoning nie.“Die uitsprake oor verkragting binne ’n huwelik wat in die parlement geopper is, is baie ontstellend, aangesien dit die konsep van persoonlike waardigheid wat die Namibiese Grondwet waarborg, ondermyn. “Ons wetgewers moet daarop fokus om die wette van Namibië te bespreek in plaas daarvan om die parlementêre platform vir uitsprake oor hul persoonlike of godsdienstige ingesteldhede te gebruik.”Dienda het in die parlement gesê verkragting binne ’n huwelik bestaan nie, en bygevoeg dat gades outomaties tot konsensuele seks instem sodra hulle getroud is. “Ek is iemand wat nie hierdie konsep ondersteun van mans en vrouens wat mekaar verkrag nie. Asseblief mense, lees net julle Bybel – dié van ons wat die jawoord gee, julle word vertel in siekte en in wat? “Daar word gesê jy kan nie jou maat sy regte ontsê nie. Ek praat nie van kêrels en vriendinne nie,” het sy gesê.Me. Patience Masusa, die land se jongste parlementslid en ’n lid van Swapo, het vir Dienda onderbreek en gesê dit is ontnugterend dat ’n verkose parlementslid sulke uitlatings kan maak wat uiteindelik ’n bespotting van verkragtingslagoffers maak.“Jy gebruik die parlement om verkragting goed te keur en dit maak ’n bespotting van slagoffers van verkragting; mense wat deur hul eggenote verkrag word. Dit is verkeerd en ons kan nie daaroor lag nie,” het sy gesê.Me. Inna Hengari, nog ’n jong parlementslid wat die PDM verteenwoordig, het saam met Masusa gestem dat in enige verhouding – hetsy gebonde aan ’n huwelikskontrak of nie – toestemming ononderhandelbaar bly.Dienda het gesê sy kan nie deur ongetroude jeugdiges opgelei word nie – met verwysing na die twee jong parlementslede – en bygevoeg dat wanneer ’n persoon getroud is, is “jou man se liggaam jou liggaam en jou liggaam is jou man s’n”.Intussen het die adjunkminister van inligting en kommunikasietegnologie, me. Emma Teofilus, self ’n jong parlementslid, gesê Dienda se opmerkings toon die ontkoppeling en verskille in sienings tussen die verskillende generasies.Sy het ook vir Dienda gevra of dit aanvaarbaar sal wees as ’n man sy vrou slaan, aangesien “jou liggaam sy liggaam is”, waarop Dienda geantwoord het sy praat nie van geslagsgeweld nie. – republikein@republikein.com.na

Uitlatings in parlement ‘ontstellend’

Kommentaar

Republikein 2025-04-09

Meld asseblief aan om kommentaar te lewer

Uitlatings in parlement ‘ontstellend’

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie