Steeds geen besluit oor Windhoek-bestuurskomitee

Die Windhoek-stadsraad se besluitnemingsvermoë en werksaamhede is tans ernstig beperk na ’n tweede probeerslag om die stadsraad se belangrike bestuurskomitee saam te stel, weer verlede week misluk het. Volgens Stad Windhoek (CoW) se regsverteenwoordiger, Ngatatue Kandovazu, beteken die feit dat net drie raadslede tot die bestuurskomitee verkies is dat die komitee nie voldoende saamgestel is nie en dus nie geldige besluite sal kan neem nie. Die meerderheid van kwessies waaroor die stadsraad kan beraadslag moet ook eers deur die bestuurskomitee na hulle verwys word, brei hy uit. “Agenda-items kan nie oorweeg word nie en al die items wat die raad na die komitee terugstuur, staan ook stil. Gewone items moet deur die komitee gaan, alhoewel sommige items direk (vanaf die munisipale bestuur) onder die raad se aandag gebring kan word. Dit is noodsaaklik dat die komitee so spoedig moontlik volledig gevorm word,” voeg hy by.By verlede week se spesiale vergadering om die uitstaande twee setels in die komitee te vul, het opposisiepolitici op die stadsraad weer alle nominasies vir diegene wat op die komitee kan dien, verwerp. Op die vorige vergadering is die National Unity Democratic Organisation (Nudo) se Joseph Uapingene tot burgemeester verkies. Ondanks nominasies het geen van die opposisielede toe die geleentheid geneem om by die bestuurskomitee aan te sluit nie. Net Sam Nujoma, Queen Kamati en Austin Kwenani – almal Swapo-lede – is tot dusver as komiteelede verkies. Swapo se Magalena Pienaar-Lombardt is die hoofstad se adjunk-burgemeester. Volgens burgemeester Uapingene is die atmosfeer binne die stadsraad op die oomblik gespanne. “Ons moet nog kalmeer. Dit is nog op en af. Ons moet die raad kalmeer en normaliseer,” sê hy. Uapingene kon egter nie veel lig werp op die redes agter die hindernis voor die stadsraad se werksaamhede nie. “Alhoewel ek ook ’n opposisiepartylid is, weet ek nie presies wat die probleem is nie. Voor die verkiesing het die opposisie bymekaar gekom en besluit om die bestuurskomitee oor te neem - na die vergadering in Desember toe die regerende party en die IPC uitgestap het,” brei hy uit. “As Nudo het ons besluit om met enige iemand saam te werk wat saam met ons vir die beste belange van die inwoners sal werk. Dit is wat ons gedoen het,” voeg hy by.Gister het Windhoek se voormalige burgemeester, die Landless People’s Movement (LPM) se Sade Gawanas, egter meer insig in die verwikkelinge gegee. Volgens haar is die hoofrede agter opposisie-politici se weiering om by die nuwe bestuurskomitee aan te sluit, die verwerping van Swapo se meerderheid in besluitneming binne die stadsraad. “’n Party wat die meerderheid in die bestuurskomitee het, is gelyk aan absolute mag,” sê sy. Volgens haar het Swapo-lede gedurende hulle vorige vergadering met stadsraadslede van opposisiepartye gesê hulle soek ’n Nudo-voorsitter (burgemeester) en drie lede van die bestuurskomitee. Die opposisie het volgens haar ander voorstelle gemaak, maar Swapo het aangedring dat hulle ongeag daarvan sal voortgaan. “Ons kan nooit weer vir Swapo die meerderheid in die bestuurskomitee gee nie,” voer sy aan. Inteendeel soek opposisiepartye gesamentlike verantwoordelikheid, gesamentlike besluitneming en ’n gesamentlike bestuurskomitee. “Die Swapo-komiteelede moet bedank sodat ons lede vir die bestuurskomitee kan nomineer. Sommige sê ons moet die hele proses van voor af begin. Hulle is ook nie met die burgemeester en sy adjunk gelukkig nie,” sê sy.Die minister van stedelike en landelike ontwikkeling, Erastus Uutoni, het Vrydag al die stadsraadlede genooi na ’n dringende vergadering oor die stand van leierskap binne die Windhoek munisipale bestuur. Dié vergadering sal na verwagting môre om tienuur plaasvind. Die volgende poging om ’n volledige bestuurskomitee te verkies is tot 9 Februarie uitgestel.augetto@republikein.com.na

Steeds geen besluit oor Windhoek-bestuurskomitee

Kommentaar

Republikein 2025-04-07

Meld asseblief aan om kommentaar te lewer

Steeds geen besluit oor Windhoek-bestuurskomitee

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie