Welsynsorganisasies gesoek

Meer as 120 welsynsorganisasies in Namibië moet binne 30 dae kontak met die direktoraat van maatskaplike dienste maak of die risiko van deregistrasie loop. Volgens die waarnemende direkteur Helen Mouton kan die geraakte 126 welsynsorganisasies onwettig verklaar word, indien hulle hul registrasies verloor.

Die ministerie het gister ‘n volbladadvertensie in die dagblad New Era geplaas om te vra dat die betrokke organisasies dringend met die direktoraat in verbinding moet tree.

Van die welsynsorganisasies wat die oog in die advertensie se dringende versoek gevang het, sluit in die Michelle McLean Children’s Trust, Alte Feste Lions-klub, die Hope-stigting asook die Namibië Nasionale Kommissie vir UNESCO. Kontak word ook vereis van organisasies soos die Aids Care Trust in Namibia, Change of Lifestyle Home Project beter bekend as COLS, die Trust vir Swapo-veterane en ook Hospice of Hope. Welsynsorganisies in landelike gebiede sluit in die Welvaartorganisasie vir Jeug op Gibeon, die Witvlei Sorg- en Rehabilitasiesentrum, die Mondesa Welvaartprojek, Kavango Bridges of Hope, die Gam Ontwikkelingsorganisasie, Groot-Aub Gemeenskapsontwikkeling en Plekkie in die Son.

Mouton sê van hierdie organisasies het jare laas hul besonderhede by die ministerie opgedateer, en is veronderstel om elke jaar hul finansiële state en hul jaarverslag by die direktoraat in te dien. Dit is in lyn met die nasionale Welvaartwet van 1965. Die ministerie hou ‘n databasis van 469 welsynsorganisasies wat geregisteer is in Namibië, maar volgens Mouton is dalk net 40% van hulle steeds aktief.

“Baie het slegs die aansoekvorm en ‘n registrasiesertifikaat by ons op rekord. Ons stuur elke jaar briewe uit, maar die meerderheid word teruggestuur na die afsender. Telefoonnommers word nie geantwoord nie en e-poskommunikasie word nie op gereageer nie. Die advertensie is ons laaste opsie om in kontak met die organisasies te tree,” sê sy. Mouton waarsku dat die wet die ministerie bemagtig om ná twee jaar sonder kontak ‘n organisasie te deregistreer, en 30 dae ná die aankondiging in die Staatskoerant, so ‘n organisasie onwettig te verklaar.

Sy erken dat welsynsbedrywighede in Namibië moeiliker raak, veral nadat vereistes vir finansiële verslaggewing die afgelope paar jaar strenger geraak het.

“Ons probeer dié wat na vore kom met kapasiteitsbou te help,” het Mouton gesê.

Baie welsynsorganisasies in Namibië verkies om volgens haar by die Owerheid vir Sake- en Intellektuele Eiendom (Bipa) as nie-winsgewende organisasie of as ‘n trust by die hoërhof te registreer. Mouton sê die regering probeer om beter beheer oor die sektor te vestig om geldwassery en belastingonduiking te bekamp.

“Ons moet ‘n balans bereik. Dit is ook nodig om die publiek te beskerm,” het sy beklemtoon.

Intussen is die ministerie besig om ‘n wetsontwerp te voltooi om die verouderde wet te vervang. Verskeie onlangse verwikkelinge word in die nuwe wetsontwerp aangespreek,wat moontlik volgende maand in die openbaar vrygestel kan word. Die dringendheid kom egter van die beplande sitting van die nasionale welsynsraad in die tweede week van Maart. Tydens dié sitting sal besluit word of organisasies wat nie die huidige wet nakom nie, deregistreer sal word, het Mouton gesê. Die raad vergader slegs twee keer per jaar. - [email protected]