Maltahöhe word turksvykontrei

Nopal Carbon Farming, in samewerking met die Namibiese raad vir die bevordering van beleggings en ontwikkeling (NIPDB), het Donderdag ’n sooispitseremonie van hul turksvyprojek op die plaas Namseb by Maltahöhe gehad.Nopal doen baanbrekerswerk in die ontwikkeling van Opuntia Ficus-Indica-turksvyplase, wat klimaatsverandering bekamp deur koolstofdioksied te absorbeer, verwoestyning te voorkom en grondgesondheid verbeter. Hierdie inisiatief sal ook hernubare energie genereer terwyl ekonomiese geleenthede deur werkskepping, veevoer en voedselsekerheid verskaf word.Behalwe vir die omgewingsvoordele het die inisiatief ook ten doel om plaaslike gemeenskappe te bemagtig. Deur vennootskappe met plaaslike boere verseker dit inklusiewe ekonomiese groei en langtermyn-volhoubaarheid vir Namibië se landbou- en energiesektor. Deur onderbenutte woestyngrond in produktiewe landbougrond te omskep, het Nopal werksgeleenthede vir ’n geraamde 75 mense geskep.EERSTE FASEDie eerste fase van die projek in samewerking met die Gusinde von Wietersheim Successors Trust, strek oor 500 hektaar binne ’n breër 12 000 hektaar volhoubare landbougebied en verteenwoordig ’n belegging van ongeveer N$66 miljoen, met ’n geraamde totale belegging van meer as N$1 miljard.Stigter en Nopal-vennoot Nicole Maske van Windhoek, het saam met Nopal Corp van Portugal, die grootskaalse turksvyboerdery begin.Die Opuntia Ficus-Indica-turksvy is ’n geharde, veerkragtige gewas wat bekend is vir sy vermoë om in droë toestande te floreer. Nopal se Opuntia is doringlose, nie-indringer kaktusvariëteite uit Italië, soos die rooi Rossa- en oranje Gialla-kultivars. Dit word van Portugal na Namibië ingevoer en sal ’n geleentheid vir plaaslike en oorsese verbruik skep.VRUGTE, VEEVOERMet fase 1 wat in Mei 2024 van stapel gestuur is, beoog Nopal om uit te brei deur 5 000 hektaar turksvye teen 2027 te verbou en 17 500 hektaar teen 2028.Hoëdigtheid-aanplanting van 10 000 plante per hektaar sal maksimum opbrengs verseker deur doeltreffende drupbesproeiing te gebruik om waterverbruik te bestuur. Organiese bemesting van plaaslike vee sal gebruik word.Die vrugte sal geoes word vir verkope, terwyl die turksvyblare as veelsydige veevoer sal dien. Vars blare sal direk aan boere tydens droogtes verkoop word. Dit sal gedroog in grootmaat verkoop word, of verwerk word in korrels en voerblokke.DORINGLOOS, NIE-INDRINGERNopal se doringlose variëteit, wat in die moeilikste klimaatstoestande floreer, is nie net veerkragtig nie, maar ook as ’n nie-indringer bevestig, wat verseker dat dit volhoubaar met die Namibiese ekosisteem integreer.Die Namibiese visepresident en aangewese president, Netumbo Nandi-Ndaitwah, het die projek as die “eerste van sy soort vir Afrika” beskryf en Nopal as ’n katalisator vir ekonomiese groei en werkskepping geprys.Haar toespraak is namens haar deur die adjunk- uitvoerende direkteur in die kantoor van die visepresident, Mateus Kaholongo, gelewer“Vir te lank is die dorre Namibiese grond gesien as ’n struikelblok vir landbouproduktiwiteit, maar vandag herdefinieer ons wat moontlik is.“Die harde werklikheid van grondagteruitgang, droogte en voedselonsekerheid het die landbousektor en ekonomiese geleenthede in ons droë streke lank belemmer, maar deur innoverende oplossings soos die Nopal-projek, herskryf ons hierdie verhaal,” het Nandi-Ndaitwah gesê.BLOUDRUK“Die Nopal-projek dien as ’n bloudruk vir ons nasie se toekoms, waar ons grond, ons mense en ons ekonomie in harmonie saam met die natuur floreer.“Met die regte ondersteuning en vennootskappe kan ons hierdie model oraloor Namibië vestig, meer grond rehabiliteer en selfs meer werk skep,” het Nandi-Ndaitwah beklemtoon.Sy het gesê dat die projek ook Namibië se verbintenis tot die stryd teen klimaatsverandering bevestig.“Terwyl die wêreld worstel met die uitdagings van klimaatsverandering, droogte en voedselonsekerheid, tree Namibië beslissend op. Hierdie projek is ’n belangrike mylpaal in ons reis na energie-onafhanklikheid.“Met die biogas ontsluit ons ’n hernubare energiebron wat stabiele en volhoubare elektrisiteit sal voorsien en sodoende ons afhanklikheid van fossielbrandstowwe verminder, ons energiesekuriteit verbeter en Namibië as ’n leier in die globale skoonenergierevolusie posisioneer,” het die visepresident gesê.

Maltahöhe word turksvykontrei

Kommentaar

Republikein 2025-04-02

Meld asseblief aan om kommentaar te lewer

Maltahöhe word turksvykontrei

Kommentaar

Republikein 2025-04-02

Meld asseblief aan om kommentaar te lewer

MELD AAN

Advertensie